សៀមរាប៖ សាកលវិទ្យាល័យ ឯកទេស នៃកម្ពុជា សាខាខេត្តសៀមរាប មានមោទនភាពដោយបានរៀបចំសន្និសីទ ស៊ី យូ អេស ២០២៤ ស្តីពី «ការសិក្សានៅឧត្ដមសិក្សា និងឱកាសការងារ” ក្នុងគោលបំណងជួយតម្រង់ទិសដល់ប្អូនៗសិស្សានុសិស្សក្នុងការជ្រើសរើសជំនាញ ឯកទេសសិក្សា នៅថ្នាក់ឧត្តមសិក្សាឲ្យបានត្រឹមត្រូវ ការស្វែងយល់អំពីកត្តាជោគជ័យក្នុងការងារ និងមុខរបរ និងការយល់ដឹងអំពីលក្ខណ សម្បត្តិរបស់បុគ្គលជោគជ័យសម្រាប់ជាជំនួយស្មារតីដល់ប្អូនៗក្នុងការរៀបចំអនាគតរបស់ខ្លួនឲ្យបានល្អប្រសើរ ព្រមទាំងបង្កើនភាពជាដៃគូ និងពង្រីកកិច្ចសហប្រតិបត្តិការរបស់ សាកលវិទ្យាល័យ ជាមួយស្ថាប័ននានា ដែលមានសក្តានុពលក្នុងការជួយលើកស្ទួយ សេវានិស្សិតរបស់ សាកលវិទ្យាល័យឱ្យកាន់តែប្រសើរឡើង។
វឌ្ឍនភាពរបស់សាកលវិទ្យាល័យឯកទេសនៃកម្ពុជា សាខាខេត្តសៀមរាប ដូចតទៅ៖
• សាកលវិទ្យាល័យ ឯកទេស នៃកម្ពុជា សាខាខេត្តសៀមរាប ត្រូវបានបង្កើតឡើងដោយ ឯកឧត្តមបណ្ឌិត ស្តើង សុខុម តាមរយៈ តាមអនុក្រឹត្យលេខ ០១ អនក្រ. បក ចុះថ្ងៃទី ១៦ ខែមករា ឆ្នាំ២០០៤
• ស្ថិតនៅផ្លូវជាតិលេខ ៦ “ភូមិគ្រួស សង្កាត់ស្វាយដង្គុំ ក្រុងសៀមរាប ខេត្ត សៀមរាប ដែលមានផ្ទៃដីសរុបទំហំ 3000ម៉ែត្រការេ។ អាគារមានកម្ពស់៤ ជាន់។
• សាកលវិទ្យាល័យរួមមានសាលប្រជុំតូចធំ
• ការិយាល័យធ្វើការចំនួន ៨ការិយាល័យ
• បន្ទប់សិក្សា មានបំពាក់ LCD Projector និងម៉ាស៊ីនត្រជាក់គ្រប់បន្ទប់
• បន្ទប់អនុវត្តចំនួន ៧បន្ទប់ មានដូចជា៖ បន្ទប់អនុវត្តគណនេយ្យ បន្ទប់ពិសោធន៍វិទ្យាសាស្ត្រ (រូបវិទ្យា គីមីវិទ្យា និង ជីវវិទ្យា) សាលសវនការប្រឌិត បន្ទប់ Lab ស្តាប់ភាសា បន្ទប់បណ្ណាល័យ និងសាលសម្រាប់អាន បន្ទប់ស្រាវជ្រាវ ICT បន្ទប់អនុវត្តកុំព្យូទ័រ
• ធ្វើការបណ្តុះបណ្តាលកម្រិតបរិញ្ញាបត្ររង បរិញ្ញាបត្រ និងបរិញ្ញាបត្រជាន់ខ្ពស់ មាននិស្សិតកំពុងសិក្សាចំនួន ២៦០០នាក់។
• អត្រាមានការងារធ្វើរបស់និស្សិត មានកម្រិតខ្ពស់
• មានមហាវិទ្យាល័យចំនូន៤ និងឯកទេសសិក្សាចំនួន១៥ ឯកទេស
1. មហាវិទ្យាល័យ សិល្បៈ មនុស្សសាស្ត្រ និងភាសា មានឯកទេស អក្សរសាស្ដ្រអង់គ្លេស អក្សរសាស្ដ្រខ្មែរ ប្រវត្ដិវិទ្យា ភូមិវិទ្យា និងឯកទេសវិទ្យាសាស្ត្រអប់រំ។
2. មហាវិទ្យាល័យ វិទ្យាសាស្ត្រ និងបច្ចេកវិទ្យា មានឯកទេសវិទ្យាសាស្ដ្រកុំព្យូទ័រ គណិតវិទ្យា រូបវិទ្យា គីមីវិទ្យា និងឯកទេសជីវវិទ្យា។
3. មហាវិទ្យាល័យ គ្រប់គ្រងពាណិជ្ជកម្ម និងសេដ្ឋកិច្ច មានឯកទេសគ្រប់គ្រងពាណិជ្ជកម្ម គណនេយ្យ ហិរញ្ញវត្ថុ និងធនាគារ គ្រប់គ្រងសណ្ឋាគារ និងទេសចរណ៍ និងឯកទេស ម៉ាឃីតធីង ។
4. មហាវិទ្យាល័យ វិទ្យាសាស្ត្រសង្គម និងនីតិសាស្ត្រ មានឯកទេសនីតិសាធារណៈ។
សាកលវិទ្យាល័យបានបណ្ដុះបណ្ដាលដោយផ្ដោតទៅលើ «គុណភាព» បង្រៀន រៀន អនុវត្ដ ស្រាវជ្រាវ សេវាកម្ម «សមត្ថភាពវិជ្ជាជីវៈ» ចំណេះដឹង ចំណេះធ្វើ «បុគ្គលិកលក្ខណសម្បត្ដិល្អ» ចរិយាសម្បត្ដិ រូបសម្បត្ដិ ភាពសកម្មការងារ និងសិល្បៈនៃការរស់នៅ។
សាកលវិទ្យាល័យមានបទពិសោធន៍លើការបណ្ដុះបណ្ដាលជាង១៩ឆ្នាំ ប្រកបដោយភាពជោគជ័យ មានសាស្ត្រាចារ្យ បុគ្គលិកគ្រប់គ្រាន់ ដែលមានសញ្ញាបត្រខ្ពស់ បទពិសោធន៍ជំនាញច្បាស់លាស់ និងបានធ្វើកិច្ចសហប្រតិបត្តិការ ព្រមទាំងចុះអនុស្សារណៈយោគយល់ជាមួយស្ថាប័ន្តជាច្រើន។ បានសហការជាមួយស្ថាប័ន ក្រុមហ៊ុនដៃគូសហប្រតិបត្តិការ ដើម្បីបង្កលក្ខណៈងាយស្រួលដល់និស្សិត ចុះកម្មសិក្សា ហាត់ការ រកការងារធ្វើ ជាក់ស្តែងដូចជាថ្ងៃនេះសោត សាកលវិទ្យាល័យ បានចុះអនុស្សារណៈយោគយល់ជាមួយសាលាជំនាញព័ត៌មានវិទ្យា អេស អាយ ធី អេស និងសាលា ប៊ី ស៊ី ស្គូល ព្រមទាំងបានសហការ ជាមួយធនាគារវិនិយោគ និងអភិវឌ្ឍន៍កម្ពុជា ភីអិលស៊ី (BIDC) និងក្រុមហ៊ុន FWD Life Insurance Cambodia ដើម្បីធ្វើសន្និសីទរួមគ្នាប្រយោជន៍ដើម្បីឲ្យការយល់ដឹងរបស់និស្សិតកាន់តែខ្ពស់។
លោក បណ្ឌិត កែវ ជា សាកលវិទ្យាធិការរង បានលើកឡើង អំពី ប្រវត្តនៃការបង្កើត សាកលវិទ្យាល័យ ដំបូង សាកលវិទ្យាល័យ ឯកទេស នៃកម្ពូជា មានឈ្មោះដើមថា “វិទ្យាស្ថាន ឯកទេស នៃកម្ពជា, CIS” ត្រូវបានបង្កើតឡើងដោយអនុក្រឹត្យលេខ ៩១ អនក្រ.បកចុះថ្ងៃទី ២៦ ខែសីហា ឆ្នាំ២០០២ និងក្លាយជា “សាកលវិទ្យាល័យ ឯកទេស នៃកម្ពូជា, CUS” ដោយអនុក្រឹត្យរាជរដ្ឋាភិបាលលេខ ០១ អនក្រ.បក ចុះថ្ងៃទី ១៦ ខែមករា ឆ្នាំ២០០៤។
សាកលវិទ្យាល័យ ឯកទេស នៃកម្ពូជា នេះជារោងចក្របញ្ញាញាណ ក្នុងការកសាងធនធានមនុស្ស ប្រកបដោយ គុណភាព គុណតម្លៃ និងជោគជ័យឆ្នើមសម្រាប់សង្គមជាតិ វប្បធម៌ជាតិចាប់ពីពេលនេះ និងឆ្ពោះទៅកសាងកិត្តិនាម ក្នុងឆាកអន្តរជាតិចាប់ពីឆ្នាំ២០២៧តទៅ។
សាកលវិទ្យាល័យ ឯកទេស នៃកម្ពូជា ទីតាំងគោលរាជធានីភ្នំពេញ និងតាមសាខាខេត្ត ត្រូវបានទទួលស្គាល់ គុណភាពអប់រំពេញសិទ្ធ (Full Accreditation)ពីគណៈគម្មាធិការទទួលស្គាល់គុណភាពអប់រំនៃកម្ពុជាផងដែរ។ លោកបានលើកពីសកម្មភាពសំខាន់ៗ ក្នុងការបណ្តុះបណ្តាល កន្លងមក មានដូចជា៖
-សមិទ្ធិផលសំខាន់ៗរបស់សាកលវិទ្យាល័យ
-អត្រាការងារ និងអាជីវកម្មរបស់និស្សិត
-ធនធាន និងសម្ភារៈរូបវ័ន្ត
-ដៃគូសហប្រតិបត្តិការជាតិ និងអន្តរជាតិ
-ដំណើរទស្សនកិច្ចដៃគូក្នុងស្រុក និងក្រៅប្រទេស
-ទស្សនកិច្ចសិក្សា
-សិក្ខាសាលា សន្និសីទ វេទិការជាតិ និងអន្តរជាតិ
-សកម្មភាពសង្គម និងមនុស្សធម៌
-សកម្មភាពសំខាន់ៗ របស់សាកលវិទ្យាល័យ និងសកម្មភាពផ្សេងៗជាច្រើនដែលសាកលវិទ្យាល័យបានធ្វើជារៀងរាល់ឆ្នាំ។
លោក សេង វ៉ាន់សាយ អនុប្រធានផ្នែកទំនាក់ទំនងអតិថិជន ធនាគារ BIDC បានធ្វើបទបង្ហាញលើប្រធានបទស្តីព “ដំណើរឆ្ពោះទៅកាន់អាជីពជាបុគ្គលិកធនាគារ” ជូនដល់សិក្ខាកាមដែលបានចូលរួម។
លោក ឈី ច័ន្ទមុនីរក្ស ប្រធានផ្នែកជ្រើសរើសក្រុមហ៊ុនធានារ៉ាប់រង FWD បានធ្វើបទបង្ហាញលើប្រធានបទ ស្តីពី “បង្កើតបទពិសោធន៍ថ្មី និងចូលបម្រើការងារជាមួយ FWD” ជូនដល់សិក្ខាកាមដែលបានចូលរួម។
លោក បណ្ឌិត មាស បូរ៉ា សាកលវិទ្យាធិការ សាកលវិទ្យាល័យ ឯកទេស នៅកម្ពុជា (CUS) បានផ្ដល់ពន្លឹះ ដល់និស្សិតឲ្យចេះរៀបចំផែនការ ដើម្បីរៀនពូកែនៅថ្នាក់ឧត្តមសិក្សា។ ការធ្វើបទបង្ហាញនេះ ធ្វើឡើងនៅព្រឹកថ្ងៃទី 21 ខែធ្នូ ឆ្នាំ ២០២៤ នៅសាខាសាកលវិទ្យាល័យ ឯកទេស នៃកម្ពុជា ខេត្តសៀមរាប ក្នុងពិធីសន្និសីទឆ្នាំ ២០២៤ ស្តីពី ការសិក្សានៅឧត្ដមសិក្សា និងឱកាសទីផ្សារការងារ ។
លោក បណ្ឌិត មាស បូរ៉ា បានមានប្រសាសន៍ថា ការធ្វើសន្និសីទថ្ងៃនេះពិតជាមានសារៈសំខាន់ ដែលប្រធានបទថ្ងៃនេះ នឹងប្រាប់គ្រប់ព័ត៌មានទាំងអស់ ជូនដល់ប្អូនៗនិស្សិតទាំងថ្មី ទាំងចាស់អាចគិតយកទៅពិចារណាដើម្បី រៀបផែនការពីឆ្នាំទី ១ ដល់ឆ្នាំទី ៤ ធ្វើម៉េចរៀនឱ្យពូកែ បានលទ្ធផលល្អ និងចង់បញ្ចប់ ទទួលបានការងារធ្វើ មានប្រាក់បៀវត្សខ្ពស់ ។
លោកបណ្ឌិតបានបញ្ជាក់ថា ក្នុងសន្និសីទនេះ ប្អូនៗនិស្សិតត្រូវដឹង ពីប្រភេទការងារ មានតម្រូវការអ្វីខ្លះ ដែលនឹងត្រូវបកស្រាយដោយវាគ្មិន សេង វ៉ាន់សាយ អនុប្រធានផ្នែកទំនាក់ទំនងអតិថិជន ធនាគារ BIDC ។ បន្ទាប់មក និងមានការបកស្រាយ ដោយវាគ្មិន ឈី ច័ន្ទមុនីរក្ស ប្រធានផ្នែកជ្រើសរើសក្រុមហ៊ុនធានារ៉ាប់រង FWD បានធ្វើបទបង្ហាញលើប្រធានបទ ស្តីពី “បង្កើតបទពិសោធន៍ថ្មី និងចូលបម្រើការងារជាមួយ FWD” ប្រាប់អំពីគុណសម្បត្តិ អ្នកដែលអាចមានសមត្ថភាព ក្នុងការបម្រើការងារនៅក្នុងធនាគារ ឬក្នុងស្ថាប័នផ្សេងៗជាច្រើនទៀតដែលនឹងកំពុងដាក់តាំងប៊ូតក្នុងកម្មវិធីនេះផងដែរ។ ដូច្នេះសូមឲ្យនិស្សិតទាំងអស់យកចិត្តទុកដាក់ស្ដាប់ ដើម្បីយកទៅពិចារណា ហើយរៀបចំផែនការធ្វើយ៉ាងណាឱ្យប្អូនៗ រៀនបានពូកែ និងទទួលជោគជ័យ អនាគត់ល្អ ទៅថ្ងៃមុខ៕
