ខេត្តសៀមរាប៖ នៅថ្ងៃទី១៩ ខែតុលា ឆ្នាំ២០២៣ យោងតាមការចុះផ្សាយរបស់ រដ្ឋបាលខេត្តសៀមរាប បានចេញសេចក្តីជូនដំណឹង ស្តីពីការរៀបចំព្រះរាជពិធីបុណ្យអុំទូក បណ្ដែតប្រទីប និងសំពះព្រះខែ អកអំបុក រយៈពេល២ថ្ងៃ នៅថ្ងៃទី២៦ ដល់ថ្ងៃទី២៧ ខែវិច្ឆិកា ឆ្នាំ២០២៣ខាងមុខនេះ។
ដើម្បីរួមចំណែកក្នុង ការថែរក្សា និងលើកកម្ពស់វប្បធម៌ អរិយធម៌ ទំនៀមទម្លាប់ និងប្រពៃណីជាតិ ក៏ដូចជាការផ្ដល់ឱកាសជូនប្រជាជន ភ្ញៀវទេសចរជាតិ និងអន្តរជាតិ បានចូលរួមកម្សាន្តសប្បាយ រដ្ឋបាលខេត្តសៀមរាប នឹងរៀបចំប្រារព្ធព្រះរាជពិធីបុណ្យអុំទូក បណ្តែតប្រទីប និង សំពះព្រះខែ អកអំបុក រយៈពេល២ថ្ងៃ ចាប់ពីថ្ងៃអាទិត្យ ១៤កើត ដល់ថ្ងៃចន្ទ១៥កើត ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៦ ដល់ថ្ងៃទី២៧ ខែវិច្ឆិកា ឆ្នាំ២០២៣ នៅតាមបណ្ដោយដងស្ទឹងសៀមរាប ចាប់ពីស្ពានអតីតមន្ទីរទេសចរណ៍ចាស់ រហូតដល់ស្ពានវត្តដំណាក់ ដែលមានកម្មវិធីដូចខាងក្រោម៖
ថ្ងៃទី២៦ ខែវិច្ឆិកា ឆ្នាំ២០២៣៖
– ម៉ោង១៥៖០០នាទី ៖ ពិធីបើកការប្រណាំងទូក “ង”
ថ្ងៃទី២៧ ខែវិច្ឆិកា ឆ្នាំ២០២៣៖
– ម៉ោង០៨៖០០នាទី ៖ ការប្រណាំងទូកពាក់កណ្តាលផ្តាច់ព្រាត់
– ម៉ោង១៥៖០០នាទី ៖ ការប្រណាំងទូក “ង” វគ្គផ្តាច់ព្រាត់
– ម៉ោង២៣៖០០នាទី ៖ ពិធីដង្ហែ និងបណ្តែតប្រទីប ពិធីសំពះ ព្រះខែ អកអំបុក
ក្រៅពីនេះ រដ្ឋបាលខេត្តសៀមរាប សហការជាមួយសហភាពសហព័ន្ធយុវជនកម្ពុជាខេត្តសៀមរាប ព្រមទាំងវិស័យ ឯកជននានា រៀបចំកម្មវិធីមួយចំនួនទៀតរួមមាន៖ ការជិះទូកកម្សាន្ត ផ្សារទឹក ការតាំងពិព័រណ៍ផលិតផលផ្សេងៗ ព្រមទាំង មានការប្រគុំតន្ត្រី សិល្បៈបុរាណសម័យ និងការប្រកួតប្រដាល់ “គុនខ្មែរ” ដែលនឹងប្រព្រឹត្តិទៅចាប់ពីថ្ងៃសៅរ៍ ១៣កើត ដល់ថ្ងៃអង្គារ ១រោច ខែកត្តិក ឆ្នាំថោះ បញ្ចស័ក ព.ស.២៥៦៧ ត្រូវនឹងថ្ងៃទី២៥ ដល់ថ្ងៃទី២៨ ខែវិច្ឆិកា ឆ្នាំ២០២៣ ដើម្បីញ៉ាំងឱ្យព្រះរាជពិធី បុណ្យនេះ កាន់តែមានភាពអធិកអធមថែមទៀត។
រដ្ឋបាលខេត្តសៀមរាប សង្ឃឹម និងជឿជាក់យ៉ាងមុតមាំថា ព្រះថេរានុត្ថេរៈគ្រប់ព្រះអង្គ សម្តេច ទ្រង់ ឯកឧត្តម លោកជំទាវ អ្នកឧកញ៉ា លោក លោកស្រី អ្នកនាងកញ្ញា សាធារណជន ភ្ញៀវទេសចរជាតិ និងអន្តរជាតិ និមន្ត និងអញ្ជើញចូលរួមកម្សាន្តសប្បាយ ឱ្យបានច្រើនកុះករ។ សម្រាប់ព័ត៌មានបន្ថែម សូមទាក់ទងតាមរយៈទូរសព្ទលេខ (855)17 687 333 ឬ (855)12 239 699 ៕
