ភ្នំពេញ៖ មរណទុក្ខដ៏ក្រៀមក្រំនៃការធ្វើអត្តឃាតរបស់ ឧកញ៉ា ឈាង រ័ត្ន កំពុងក្លាយជាប្រធានបទដ៏ក្តៅគគុកដែលមហាជនមានការភ្ញាក់ផ្អើលជាខ្លាំង។ ជាក់ស្តែងមិនមាននរណាម្នាក់ដឹងរឿងផ្ទៃក្នុងគ្រួសាររបស់ ឧកញ៉ា ឈាង រ័ត្ន និង ស្រីអូន ដែលជាភរិយាឡើយដោយគ្រប់គ្នាតែងនឹកសរសើរថា គ្រួសារមួយនេះពោរពេញដោយសុភមង្គល និងមានទ្រព្យសម្បត្តិទន្ទឹមគ្នាទៀតផង។
ប៉ុន្តែស្ងាត់ៗ កាលពីរសៀលថ្ងៃទី១១ ខែតុលា ឆ្នាំ២០២៣ ម្សិលមិញនេះបែរជាផ្ទុះដំណឹងថា ឧកញ៉ា ឈាង រ័ត្ន បានយកខ្សែអង្រឹងចងកសម្លាប់ខ្លួននៅក្រោយផ្ទះបញ្ចប់ជីវិតដោយមិនដឹងមូលហេតុ។ យ៉ាងណាមិញ តាមរយៈការបំភ្លឺពីប្អូនប្រុសថ្លៃដែលត្រូវជាស្វាមីប្អូនស្រីរបស់ ឧកញ៉ា ផ្ទាល់បានឱ្យដឹងថា នៅថ្ងៃកើតហេតុខ្លួន និងគ្រួសារបាននាំគ្នាទៅខេត្តព្រៃវែងដើម្បីធ្វើបុណ្យ ប៉ុន្តែបងថ្លៃខ្លួនជាឧកញ៉ា ឈាង រ័ត្ន បានប្រាប់ថាមិនបានទៅជាមួយឡើយ។
លុះពេលត្រលប់មកពីខេត្តវិញក៏ឃើញរថយន្តបងថ្លៃខ្លួនចតនៅមុខផ្ទះ និងពេលដើរចូលដល់ផ្ទះក៏ប្រទះឃើញបងថ្លៃចងកសម្លាប់ខ្លួននៅក្រោយផ្ទះបង្កឱ្យគ្រប់គ្នាស្លុតចិត្តជាខ្លាំង។ លោកថែមទាំងបានបញ្ជាក់ផងដែរថា មូលហេតុមកពីសម្ពាធផ្លូវចិត្ត ព្រោះជាក់ស្តែងបញ្ហាគ្រួសារវាងបងថ្លៃដែលជាឧកញ៉ា ឈាង រ័ត្ន និងភរិយាឈ្មោះ ស្រីអូន បានលែងលះគ្នាកាលពីពេលថ្មីៗនេះ ប៉ុន្តែនៅមិនទាន់ដាច់ស្រលះគ្នានៅឡើយ។
តាមការធ្វើកោសល្យវិច័្ចយពីសមត្ថកិច្ចបានបញ្ជាក់ថាការស្លាប់របស់ឧកញ៉ា ឈាង រ័ត្ន ពិតជាការធ្វើអត្តឃាតពិតមែន។ ទោះជាយ៉ាងណា បងស្រីរបស់ឧកញ៉ាផ្ទាល់បានឱ្យដឹងថា ប្អូនប្រុសរបស់ខ្លួនមិនមែនធ្វើអត្តឃាតឡើយ ប៉ុន្តែមានគេសម្លាប់ដោយសារនៅក្បែរមាត់ឃើញមានរបួសដូចត្រូវនរណាម្នាក់ដាល់ រីឯក្បែរភ្នែកក៏ឃើញមានស្នាមរបួសដែរ។
ក្រលេកទៅចាប់អារម្មណ៍ពី ស្រីអូន វិញគ្រប់គ្នាកំពុងងឿងឆ្ងល់ថា នាងនឹងមានប្រតិកម្មបែបនេះក្រោយដឹងដំណឹងមួយនេះ។ តាមរយៈផុសមួយនៅហ្វេសបុកឈ្មោះ Sereyratha Nuon ជាបងស្រីបានបញ្ជាក់ឱ្យដឹងថា “ជម្រាបបងប្អូនដែលខលមកខ្ញុំ សុំទោសខ្ញុំមិនលើកទូរស័ព្ទ ដោយមូលហេតុខ្ញុំឡើង ពីខេត្ត ជាមួយស្រីអូន ខ្ញុំបានរៀបចំដំណើរកម្សាន្តឱ្យគាត់បានលម្ហែអារម្មណ៍បន្ទាប់ពីគាត់មានបញ្ហាធំ! ហើយខ្ញុំព្យាយាមលាក់គាត់ ប្រាប់គាត់ហើយឥឡូវគាត់ប៉ះអារម្មណ៍ខ្លាំង ខ្ញុំក៏សម្រេចបញ្ចូនគាត់មកពេទ្យ ព័ត៌មានលម្អិតខ្ញុំនឹងជម្រាបនាពេលក្រោយទៀត ខ្ញុំសុំមើលគាត់សិន សុំទោស”។
គួរបញ្ជាក់ដែរថា ការស្លាប់របស់ឧកញ៉ា ឈាង រ័ត្ន បានធ្វើឱ្យអ្នកនិយមលេងបណ្តាញសង្គមនាំគ្នាភ្ញាក់ផ្អើលជាខ្លាំង ចំណែកឯអ្នកដែលបានស្គាល់ឧកញ៉ាផ្ទាល់បាននាំគ្នាផុសរូបកាន់ទុក្ខគ្រប់គ្នាដ្បិតត្រូវបាត់បង់មនុស្សល្អដូចឧកញ៉ា ឈាង រ័ត្ន ដែលតែងទទួលបានការកោតសរសើរពីមនុស្សជុំវិញខ្លួន៕
