ខេត្តសៀមរាប ៖ លោក បូ ម៉េងទ្រី អភិបាលស្រុកជីក្រែង បានប្រាប់ឱ្យដឹងថា ក្រោយពីទទួលបានព័ត៌មានពីអ្នកសារព័ត៌មាន លោកក៏បញ្ជាឱ្យកម្លាំងចម្រុះចុះទៅពិនិត្យមើលសកម្មភាពអេស្កាជីកកាយដីចំណីស្ទឹងខុសច្បាប់យកខ្សាច់ទៅលក់១កន្លែងនៅស្រុកជីក្រែង។ ករណីនេះបានកើតឡើងនៅដងស្ទឹងជីក្រែង ចំណុចអន្ទង់អាំង ស្ថិតក្នុងភូមិចំបក់ធំ ឃុំកំពង់ក្តី ស្រុកជីក្រែង ខេត្តសៀមរាប។
បន្ទាប់ពីចុះពិនិត្យ ដែលមានសមាសភាពចូលរួមមាន មន្ត្រីសាលាស្រុកជីក្រែង , កងរាជអាវុធហត្ថស្រុកជីក្រែង ប៉ូលិសប៉ុស្តិ៍នគរបាលរដ្ឋបាលកំពង់ក្ដី និងមន្ត្រីសូរិយោដីស្រុកជីក្រែង។ ជាលទ្ធផល គឺបានឃើញតែស្នាមកាយថ្មីៗ រីឯអេស្កាវិញ ត្រូវបានដកចេញពីរណ្ដៅភ្លាមៗមុនពេលកម្លាំងចុះទៅដល់បន្តិច ហាក់ដូចមានមេខ្យល់បានប្រាប់មុន។
យោងតាមសម្ដីរបស់ប្រជាពលរដ្ឋបានប្រាប់អ្នកសារព័ត៌មានថា ការជីកកាយដីចំណីស្ទឹងយករ៉ែខ្សាច់ទៅលក់នោះ គឺបានកើតឡើងជាច្រើនឆ្នាំមកហើយ ប៉ុន្តែអាជ្ញាធរស្រុកជីក្រែង ក្នុងជំនាន់លោក ពៅ ប៊ុនធឿន អភិបាលស្រុកជីក្រែងមុន បានបិទអាជីវកម្មនេះប៉ុន្មានឆ្នាំមកហើយដែរ ទើបតែចាប់ផ្តើមធ្វើសកម្មភាពនាពេលនេះម្តងទៀតតែប៉ុណ្ណោះ។ ហើយដោយឃើញទង្វើរំលោ.ភបំពា.នច្បាប់បែបនេះ ដែលលោកបានហាមឃាត់មិនឱ្យធ្វើអាជីវកម្មដីចំណីស្ទឹង ដោយបានជីកជាច្រើនរណ្តៅ។ ម្យ៉ាងវិញទៀត រណ្តៅដីថ្មីៗនេះ មានប្រវែងមិនខ្លីជាង២០០ម៉ែត្រ និងជម្រៅរហូតដល់ក្បាលប្រេត។
ពលរដ្ឋបានបញ្ជាក់ទៀតថា ម្ចាស់អាជីវកម្មដែលគឃ្លើនបំពា.នច្បាប់រដ្ឋបាលស្រុកមុននេះ មានប្ដីឈ្មោះ ពន់ និងប្រពន្ធឈ្មោះ សួយ បច្ចុប្បន្នរស់នៅភូមិចំបក់ធំ ឃុំកំពង់ក្តី ស្រុក-ខេត្តខាងលើ។ ទន្ទឹមនឹងនោះផងដែរ នៅពេលដែលពួកគាត់បានឃើញ លោក ពន់ បានចាប់ផ្តើមធ្វើការជីកដីក្នុងរណ្តៅចាស់បន្តសារជាថ្មីទៀត ទើបពួកគាត់ទូរស័ព្ទទៅអ្នកសារព័ត៌មាន ដើម្បីទៅចុះយកព័ត៌មាន។
ក្រោយពីអ្នកសារព័ត៌មានបានថតផ្តិតយករូបភាពរួច ក៏បានរាយការណ៍ជូនលោកអភិបាលស្រុកភ្លាមៗ។ ហើយដោយខ្លាចកម្លាំងរកផ្លូវចូលមិនឃើញ អ្នកសារព័ត៌មានក៏នាំគ្នាទៅចាំច្រកចូល លុះពេលកម្លាំងជុំគ្នាក៏នាំគ្នាទៅដល់គោលដៅ ស្រាប់តែអេស្កាដកចេញពីរណ្ដៅបាត់តែម្តង។ ដោយសារតែឃើញសកម្មភាពភ្លាម អ្នកសារព័ត៌មានក៏រាយការណ៍ទៅលោកអភិបាលស្រុកភ្លាមៗ លុះពេលកម្លាំងចម្រុះចុះមកដល់ភ្លាម អេស្កាក៏ត្រូវដកចេញពីរណ្តៅក៏ភ្លាមផងដែរ សុទ្ធតែរហ័សរហួនដូចគ្នា។
ទើបធ្វើឱ្យប្រជាពលរដ្ឋដាក់ជាសំណួរថា ឱ! បងអើយ តើនេះជាកំហុសអ្នកណា? បណ្ដោយឱ្យ អេស្កាដកចេញពីរណ្ដៅផុត។ ទោះបីជាកម្លាំងចម្រុះ ចុះទៅមិនឃើញអេស្កា កំពុងតែធ្វើសកម្មភាព ដូចអ្វីដែលអ្នកសារព័ត៌មានបានរាយការណ៍ពិតមែនក៏ដោយ តែក្រុមការងារបានឃើញពីទិដ្ឋភាពរណ្ដៅដី ដែលជីកកាយថ្មីៗតែប៉ុណ្ណោះ។
លោក បូ ម៉េងទ្រី អភិបាលស្រុកជីក្រែង បានសរសើរអរគុណ និងលើកទឹកចិត្តដល់អ្នកសារព័ត៌មានដែលបានផ្ដល់ព័ត៌មានពិត មិនបំភ្លើស។
បើតាមមន្ត្រីរដ្ឋបាលព្រៃឈើខេត្តបានប្រាប់ភ្នាក់ងារសារព័ត៌មានយើងខ្ញុំ នៅរសៀលថ្ងៃទី២០ ខែសីហា ឆ្នាំ២០២៣ នេះថា ឈ្មួញដែលយកអេស្កាមកជីកខ្សាច់ ឬដីទៅលក់នោះ គឺជាដីរបស់រដ្ឋ ដែលបរិស្ថានគ្រប់គ្រងរាល់ថ្ងៃ មិនមែនជាដីរបស់ប្រជាពលរដ្ឋនោះទេ៕
