ក្តៅៗ! ពលរដ្ឋ៣ឃុំ ស្មើនឹង២០ភូមិ នាំគ្នាតវ៉ាជាមួយមន្ត្រីអាជ្ញាធរអប្សរា ដែលចុះរុះរើផ្ទះ(វីដេអូ)
ខេត្តសៀមរាប ៖ ពលរដ្ឋរាប់ពាន់នាក់មកពីចំនួន៣ឃុំ ស្មើនឹង២០ភូមិ ស្ថិតក្នុងស្រុកប្រាសាទបាគង ខេត្តសៀមរាប បាននាំគ្នាធ្វើការតវ៉ាជាមួយមន្ត្រីអាជ្ញាធរអប្សរា ខណៈចុះរុះរើផ្ទះចំនួន៣ នៅក្នុង២ភូមិរបស់ពួកគាត់ ដែលបានយកតង់កៅស៊ូមកប្រក់ពីលើ ដើម្បីកុំឱ្យភ្លៀងលិច។ ហេតុការណ៍ផ្ទុះការតវ៉ានេះ ធ្វើនៅថ្ងៃទី៧ ថ្ងៃទី៨ និងថ្ងៃទី៩ ខែសីហា ឆ្នាំ២០២៣ ស្ថិតនៅក្នុងភូមិសាស្ត្រស្រុកប្រាសាទបាគង ខេត្តសៀមរាប ។
បើតាមតំណាងមេភូមិរលួសខាងកើត ដែលជួយប្រជាពលរដ្ឋមកពីឃុំចំនួន៣ ស្មើនឹង២០ភូមិមានប្រជាពលរដ្ឋប្រមាណជាង១០០០នាក់នោះ បាននាំគ្នាធ្វើការតវ៉ាជាមួយមន្ត្រីអាជ្ញាធរជាតិអប្សរា ដែលចុះមករុះរើផ្ទះពួកគាត់នោះ គឺនៅឃុំរលួស ឃុំមានជ័យ និងឃុំបាគង។ ក្នុងនោះមន្ត្រីអាជ្ញាធរជាតិអប្សរា រុះរើផ្ទះមុនគេបង្អស់បានចំនួន៣ផ្ទះ គឺភូមិតាប្រាក់ ចំនួន២ផ្ទះ ស្ថិតក្នុងឃុំមានជ័យ និងនៅភូមិកញ្ជោរ ចំនួន១ផ្ទះ ស្ថិតក្នុងឃុំរលួស ស្រុកប្រាសាទបាគង ខេត្តសៀមរាប ដើម្បីដេញមន្ត្រីអាជ្ញាធរអប្សរាពាក់ព័ន្ធនឹងករណីចុះរុះរើសំណង់ និងផ្ទះរបស់ពួកគាត់ដោយគ្មានក្តីមេត្តា។
តំណាងពលរដ្ឋនៅក្នុងឃុំចំនួន៣ ក្នុងស្រុកប្រាសាទបាគង ខេត្តសៀមរាប ទទួចសុំឱ្យអាជ្ញាធរពាក់ព័ន្ធ ជាពិសេសអគ្គនាយកដ្ឋាន នៃអាជ្ញាធរជាតិអប្សរា មេត្តាជួយគិតគូរ និងមានការអនុគ្រោះចំពោះសំណង់តូចតាចរបស់ពួកគាត់ផង ដែលធ្វើអំពីឈើប្រក់តង់កៅស៊ូ ជញ្ជាំងបាំងស្លឹក។
ពាក់ព័ន្ធក្នុងករណីខាងលើនេះដែរ លោក ឡុង កុសល អគ្គនាយករង និងជាអ្នកនាំពាក្យ និងជាប្រធានសណ្តាប់ធ្នាប់ នៃអាជ្ញាធរជាតិអប្សរា បានប្រាប់តាមតេឡេក្រាមនៅរសៀលថ្ងៃទី៩ ខែសីហា ឆ្នាំ២០២៣ នេះថា មន្ត្រីរបស់អាជ្ញាធរជាតិអប្សរា ចុះរុះរើសំណង់នេះ គឺអត់ខុសសំណង់ខុសច្បាប់របស់ពួកគាត់ទាំងអស់នោះឡើយ។
លោកបន្តថា នេះជាបញ្ហា ដែលពួកគាត់ធ្វើផ្ទុយជាមួយនឹងសកម្មភាពច្បាប់។ ព្រោះដែលគាត់នាំគ្នាធ្វើការប្រឆាំងតវ៉ា ដោយពួកគាត់ធ្វើកិច្ចការងារបែបហ្នឹង វាផ្ទុយពីកិច្ចការងារថែរក្សាបេតិកភណ្ឌពិភពលោក។ យើងដឹងហើយថា ព្រះរាជាណាចក្រកម្ពុជាយើង បង្កើតក្រុមការងារចម្រុះ តម្រង់ទិស ដែលដឹកនាំដោយលោកឧបនាយករដ្ឋមន្ត្រី ជា សុផារ៉ា រដ្ឋមន្ត្រីក្រសួងដែនដីនគរបូរីកម្ម និងសំណង់។ ហើយក្នុងនោះ ក៏បានអញ្ជើញបងប្អូនប្រជាពលរដ្ឋស្ម័គ្រចិត្តចាកចេញទៅរស់នៅតំបន់ដែលមានទីកន្លែងដោយមានការអភិវឌ្ឍន៍ រុនតាឯក និងពាក់ស្នែង ហើយរៀបចំឱ្យបានល្អប្រសើរផងដែរ។ ហើយក្នុងឱកាសនោះដែរ មានបងប្អូនយើងមួយចំនួន ឆ្លៀតឱកាសក្នុងអំឡុងពេលបោះឆ្នោតនឹង លួចធ្វើសំណង់ខុសច្បាប់នឹង ហើយរឿងនេះ មិនមែនជារឿងថ្មីទេ គឺជារឿងយូរមកហើយ បងប្អូនប្រជាពលរដ្ឋយើង នៅតែធ្វើសកម្មភាពដដែលៗ។
លោកបញ្ជាក់ទៀតថា រឿងដែលប្រជាពលរដ្ឋធ្វើការតវ៉ានោះ លោកមិនដឹងទេ រឿងនឹងសំខាន់ ពួកគាត់ធ្វើអ្វីមួយត្រូវតែសុំការអនុញ្ញាតជាមុនសិន ត្រូវមានច្បាប់ ដើម្បីអនុញ្ញាតឱ្យពួកគាត់រៀបចំ ឬក៏រៀបចំអ្វីមួយ យើងត្រូវមាននីតិវិធី អនុវត្តការងារ មិនមែនទើបតែឥឡូវទេ គឺយើងអនុវត្តតាំងពីយូរមកហើយ។ ចឹង បើសិនជាម្នាក់ៗធ្វើអ្វីមួយស្រេចតែទៅតាមចិត្តចង់បានរបស់ពួកគាត់នោះ អាហ្នឹង មិនចាំបាច់មានអ្នកគ្រប់គ្រងទេ ថែមទាំងគ្មានច្បាប់ទម្លាប់ក្នុងការគ្រប់គ្រងទៀត បានន័យថា ធ្វើអីក៏បានដែរ ធ្វើបានស្រេចតែចិត្តទៅ។ អ្វីៗដែលយើងត្រូវអនុវត្តហ្នឹង យើងមានតាមវិធីការងាររដ្ឋបាលផង ក៏ដូចជាការអនុវត្តទៅតាមគោលការណ៍ផង។
លោកបញ្ជាក់ទៀតថា បើពួកគាត់ធ្វើចឹង លោកមិនដឹងថា ម្តេចដែរ បានន័យថា អាហ្នឹង គ្មានច្បាប់ គ្មានទម្លាប់។
គួរបញ្ជាក់ផងដែរថា ពលរដ្ឋនៅក្នុងស្រុកប្រាសាទបាគង ទាំងមូល ដែលពួកគាត់បានសាងសង់ខ្លះផ្ទះថ្មក្រោម ឈើលើ ប្រក់សង្ក័សី ខ្លះទៀតធ្វើផ្ទះឈើប្រក់ស្បូវ ជញ្ជាំងបាំងស្លឹក តាំងពីអំឡុងឆ្នាំ២០០០ រហូតដល់ឆ្នាំ២០២៣មកម្ល៉េះ។ ប៉ុន្តែខ្លះត្រូវភ្លៀង ត្រូវថ្ងៃ បានលិចចូល រហូតក្មេងៗគេងមិនបានក៏សុំអនុញ្ញាតពីអាជ្ញាធរមូលដ្ឋាន ពួកគាត់ក៏ឱ្យដូរដំបូល ខណៈពេលកំពុងដូរនៅថ្ងៃទី៧ ខែសីហា ឆ្នាំ២០២៣ ស្រាប់តែមានមន្ត្រីអាជ្ញាធរអប្សរា ចុះមករុះរើផ្ទះចំនួន៣ ក្នុង២ភូមិ ធ្វើឱ្យបងប្អូនប្រជាពលរដ្ឋឃើញខឹងសម្បារខ្លាំង ក៏នាំគ្នាជិះម៉ូតូដេញឱ្យពួកមន្ត្រីរបស់អាជ្ញាធរអប្សរា រត់ចេញព្រាត ដោយខ្លះឡើងបើកឡាន និងខ្លះទៀតជិះម៉ូតូគេចបាត់អស់៕ ដោយ៖ សហការី
