ជនបរទេសប្រមាណជា១០នាក់ ទម្លាយបង្អួចអគារស្រែកយំ និងសំពះសុំឲ្យជួយមហាជនជួយ(វីដេអូ)
ខេត្តស្វាយរៀង ៖ បើតាមសេចក្តីរាយការណ៍បានឱ្យដឹងថា មានករណីភ្ញាក់ផ្អើលមួយបានកើតឡើងនៅលើអគារកាស៊ីណូក្រុងបាវិតមួយកន្លែង ដោយមានជនបរទេស (ជនជាតិវៀតណាម)ប្រមាណជា១០នាក់ បានវា.យទម្លាយបង្អួចអគារដែលមានកម្ពស់៥ជាន់ ហើយស្រែកទ្រហោយំ រួចលើកដៃសំពះសុំឲ្យមហាជនជួយ និងអ្នកខ្លះទៀតបម្រុងលោ.តពីលើអគារ ដោយមិនដឹងថា តើមានមូលហេតុអ្វីនោះទេ? ឬក៏ជាការចាប់បង្ខាំ.ងមនុស្សជម្រិតទារប្រាក់ក៏មិនដឹងដែរ? បង្កឲ្យមហាជនមានការភ្ញាក់ផ្អើលយ៉ាងខ្លាំង និងនាំគ្នាមកចោមរោមមើល ព្រមទាំងប្តឹងទៅសមត្ថកិច្ចឲ្យមកជួយធ្វើអន្តរាគមន៍ផងដែរ។
សេចក្តីរាយការណ៍បន្តថា ករណីខាងលើនេះ បានកើតឡើងកាលកពីវេលាម៉ោង៤និង៤០នាទីរសៀល ថ្ងៃទី១៨ ខែកក្កដា ឆ្នាំ២០២៣ នៅចំណុចអគារកាស៊ីណូដែលមានកម្ពស់៥ជាន់ ដោយសរសេរជាអក្សរចិន ដែលទីតាំងនោជិតកាស៊ីណូ «ប៉ារិស បរបរឆោសាន» ស្ថិតក្នុងភូមិបាវិតកណ្តាល សង្កាត់បាវិត ក្រុងបាវិត។
បន្ទាប់ពីមានហេតុការណ៍ភ្ញាក់ផ្អើលខាងលើនេះ ក៏ឃើញមានសមត្ថកិច្ចនគបាលនៃអធិការដ្ឋាននគបាលក្រុងបាវិតបានមកដល់កន្លែងកើតហេតុ ក៏ប៉ុន្តែក៏ត្រូវជនជាតិចិនទាញទ្វាររបងបិទ ដោយមិនអនុញ្ញាតិឲ្យអាជ្ញាធរក្រុង និងសមត្ថកិច្ចចូលទៅក្នុងបរិវេណអគារដែលមានជនជាតិវៀតណាមស្រែកទ្រហោយំ និងសំពះសុំឲ្យសមត្ថកិច្ចជួយនោះឡើយ។ រហូតដល់វេលា ម៉ោង៦ល្ងាច គេក៏ឃើញវត្តមានឯកឧត្តមអភិបាលខេត្ត លោកព្រះរាជអាជ្ញានៃអយ្យការអមសាលាដំបូងខេត្ត លោកអភិបាលក្រុងបាវិត និងកម្លាំងនគបាលកងរាជអាវុធហត្ថក្រុងបាវិតមកដល់ ទើបម្ចាស់កាស៊ីណូជាជនជាតិចិននោះ ព្រមបើករបងឲ្យចូល ក៏ប៉ុន្តែមិនអនុញ្ញាតិឲ្យអ្នកសារព័ត៌មានណាម្នាក់ចូលទៅថតរូបភាពខាងក្នុង និងយកព័ត៌មាននោះដែរ គឺបានត្រឹមតែឈរនៅបរិវេណខាងក្រៅលើចិញ្ចើមថ្នល់តែប៉ុណ្ណោះ។
ហើយសមត្ថកិច្ចចូលទៅខាងក្នុងអស់រយៈពេលជិត៣ម៉ោង គឺចាប់ពីម៉ោង៦និង០០នាទីល្ងាច រហូតដល់វេលាម៉ង៧និង៥០នាទីយប់ ទើបឃើញសមត្ថកិច្ច និងអាជ្ញាធរចេញមកវិញ ក៏ប៉ុន្តែមិនឃើញនាំក្រុមជនរងគ្រោះណាម្នាក់មកជាមួយនោះទេ។
ទាក់ទិនករណីខាងលើនេះដែរ សមត្ថកិច្ចម្នាក់សុំមិនបញ្ចេញឈ្មោះ បានបង្ហើបឲ្យដឹងថា មានជនជាតិវៀតណាមចំនួន៣២នាក់នៅក្នុងបន្ទប់អគារនោះ ហើយក៏ឃើញមានដំបង បំពង់ទីប និងដាវនៅក្នុងបន្ទប់នោះដែរ។ ប៉ុន្តែជនជាតិចិនបានប្រាប់ថា បំពង់ទីប និងដាវនេះ ជារបស់ជនជាតិវៀតណាម ប្រើប្រាស់ធ្វើសកម្មភាពវា.យបំបែកទ្វារបង្អួចអគារ ក្រៅពីនេះគឺលោកមិនដឹងថា តើជារឿងអ្វីទេ? ។ ខណៈពេលសមត្ថកិច្ចទៅដល់ ជនជាតិចិនបាននាំជនជាតិវៀតណាមទាំង៣២នាក់ទៅបន្ទប់ផ្សេងអស់ ហើយគាត់មិនបានចូលទៅខាងក្នុងទេ គឺឈរយាមនៅខាងក្រៅ ដូច្នេះមិនដឹងថា តើជាករណីបង្ខាំ.ងចាប់ជម្រិត ឬជាការតវ៉ារឿងអ្វីទេ?។
បើតាមសមត្ថកិច្ចនគបាលក្រុងបាវិត បានប្រាប់កោះសន្តិភាពនារសៀលថ្ងៃទី១៩ ខែកក្កដាឆ្នាំ២០២៣ នេះដែរថា សមត្ថកិច្ចកំពុងតែធ្វើការហៅអ្នកពាក់ព័ន្ធមកសាកសួរនៅអធិការដ្ឋាននគរបាលក្រុងបាវិតហើយ ដូច្នេះមិនអាចផ្តល់ព័ត៌មានបានទេ។
ទាក់ទិនករណីខាងលើនេះផងដែរ លោក ម៉ែន អេង អភិបាលរងខេត្ត អ្នកនាំពាក្យរដ្ឋបាលខេត្តស្វាយរៀង បានមានប្រសាសន៍តាមទូរស័ព្ទនៅវេលាម៉ោង៣រសៀលថា លោកមិនទាន់ទទួលបានរបាយការណ៍ និងពុំទាន់ដឹងមូលហេតុថា តើជាករណីអ្វីនៅឡើយទេ? ខណៈសមត្ថកិច្ចកំពុងតែធ្វើការសាកសួរនៅអធិការដ្ឋាននគរបាលក្រុងបាវិត នៅមិនទាន់បញ្ចប់នៅឡើយ។
ដូច្នេះបើសិនជាមានអ្វីថ្មី ឬហេតុការណ៍អ្វីផ្សេងទៀត សូមរង់ចាំព័ត៌មានបន្តទៀតនៅពេលក្រោយ៕ ប្រភព៖ កោះសន្តិភាព
Picture
