សម្តេចតេជោ ប្រដៅអភិបាលខេត្តតាកែវ រឿងគ្រប់គ្រងចំណូលមិនច្បាស់លាស់
ខេត្តតាកែវ ៖ សម្តេចតេជោ ហ៊ុន សែន នាយករដ្ឋមន្ត្រី បានប្រដៅ និងរិះគន់អភិបាលខេត្ត តាកែវ នៅចំពោះមុខកម្មករជាច្រើនពាន់នាក់ រឿងសមត្ថកិច្ចនៃការគ្រប់គ្រងខ្លួន ជាពិសេសនោះគឺការគ្រប់គ្រងចំណូលក្នុងខេត្ត។
ថ្លែងក្នុងពិធីសំណេះសំណាលជាមួយជាមួយកម្មករ កម្មការិនី សរុបជិត២ម៉ឺននាក់មកពីរោងចក្រ សហគ្រាសចំនួន១២ នៅក្នុងស្រុកត្រាំកក់ ខេត្តតាកែវ នាព្រឹកថ្ងៃទី១១ ខែមិថុនា ឆ្នាំ២០២៣នេះ សម្តេចតេជោបានសួរទៅលោកអភិបាលខេត្តតាកែវ ពីករណីចំនួនកម្មករ និងរោងចក្រ និងប្រាក់ចំណូលរបស់កម្មករ តែអភិបាលខេត្តឆ្លើយមិនច្បាស់លាស់ ខណៈលើកឡើងថា នៅខេត្តតាកែវ មានកម្មករជាង៦ម៉ឺននាក់ និងប្រាក់ចំណូលរបស់ប្រជាពលរដ្ឋខ្លួនថាមិនច្បាស់លាស់។
សម្តេចតេជោ បាននិយាយចំៗទៅកាន់លោក អ៊ូច ភា អភិបាលខេត្តតាកែវ យ៉ាងដូច្នេះថា «នេះអាចមិនច្បាស់ អញ្ចឹងច្បាស់សមព្រនង់ហើយ ថ្ងៃក្រោយធ្វើចៅហ្វាយខេត្ត ត្រូវតែដឹងឲ្យច្បាស់ពីប្រាក់ចំណូលប៉ុន្មានក្នុងខេត្តរបស់ខ្លួន «…» បើលោកឯងក្តាប់មិនបាន មិនចាំបាច់ធ្វើ ចៅហ្វាយខេត្តទេ! ថ្ងៃក្រោយត្រូវឲ្យរាង»។
សម្តេចតេជោ បានលើកឡើងថា «គ្រាន់តែចំណូលកម្មករក្នុងខេត្តខ្លួនក្តាប់មិនបានផង ថ្ងៃនេះសូមប្រដៅចៅហ្វាយខេត្តម្តងហើយ វាត្រូវតែដឹងពីចំណូលរបស់ខ្លួនមកពីខាងណា ដូចជាមកពីវៀតណាមប៉ុន្មាន? នឹងត្រូវដឹងពីស្រូវប្រមូលបានប៉ុន្មាន សល់ប៉ុន្មានសម្រាប់នាំចេញ រាប់ទាំងទំនិញនាំចូល នាំចេញប៉ុន្មានភាពរយ»។ សម្តេចតេជោ បានដាក់ចំៗទៅកាន់អភិបាលខេត្តតាកែវថា «ការគ្រប់គ្រងចំណូលកម្មករ គឺជារឿងធំមួយ មិនត្រូវមិនដឹងច្បាស់នោះទេ»។
សម្តេចថា «ថ្ងៃនេះស្តីឲ្យចៅហ្វាយខេត្តតាកែវម្តង ក៏ដូចជាសារប្រាប់ចៅហ្វាយខេត្តនានាផងដែរ។ អាហ្នឹងថ្ងៃនេះស្តីឲ្យតែម្តង ចៅហ្វាយខេត្តដែលក្តាប់មិនបានចំពោះចំណូលរបស់ប្រជាពលរដ្ឋខ្លួន»។ សម្តេចលើកឡើងថា «ការស្តីឲ្យចំពោះសារធារណៈនឹង គឺដើម្បីឲ្យរាង ព្រោះថាបើនិយាយតែពីរនាក់ ថ្ងៃក្រោយមិនរាងនោះទេ។ ហើយការប្រដៅចៅហ្វាយខេត្តតាកែវមួយនឹងផ្អើលដល់ចៅហ្វាយផ្សេងៗ»។
ជាមួយគ្នានោះដែរ សម្តេចតេជោ ក៏បានលើកឡើងថា «អភិបាលខេត្តដែលឆ្លាត គឺបានបង្កើតការងារឲ្យប្រជាពលរដ្ឋធ្វើបានច្រើន ក្នុងកៀរគរអ្នកវិនិយោគទន់មកធ្វើការវិនិយោគក្នុងទឹកដីខ្លួនឲ្យបានច្រើន»។ សម្តេចតេជោបានបន្តថា «ឥឡូវរោងចក្ររបស់យើងបានពង្រាយស្ទើរគ្រប់២៥ ខេត្តក្រុង។ ការវិនិយោគយើង ត្រូវពង្រាយហេដ្ឋារចនាសម្ព័ន្ធទៅកាន់បណ្ដាខេត្តនានា ដើម្បីអូសទាញវិនិយោគ ហើយខេត្តណាដែលមានការឆ្លាតក្នុងការដឹកនាំខេត្តរបស់ខ្លួន គឺជាខេត្តដែលទាក់ទងបាននូវវិនិយោគច្រើន។ ចេះយកចិត្ត ចេះទាក់ទាញ ចេះតាមដានសភាពការណ៍ តែងទទួលបាននូវផលប្រយោជន៍ពីការវិនិយោគនេះ»។
សម្តេចតេជោបន្តថា «ចំណុចនេះ គឺជាការបង្ហាញអំពីការពង្រាយរោងចក្រទៅកាន់បណ្ដាខេត្ត។ យើងចាប់ផ្ដើមតម្រង់ទិសធ្វើយ៉ាងម៉េចកុំឲ្យនាំគ្នាសម្រុកការវិនិយោគទៅទីក្រុងភ្នំពេញ។ ភ្នំពេញ ពិតជាត្រូវការហើយ ប៉ុន្តែបើរោងចក្រទាំងអស់ប្រមូលផ្ដុំទៅទីក្រុងភ្នំពេញ វានឹងបង្កឲ្យមានសម្ពាធប្រជាជនកាន់តែខ្លាំង។ ឥឡូវរោងចក្ររបស់យើងវាបានពង្រាយនេះ ស្ទើរគ្រប់ ២៥ខេត្តក្រុង ។ ការវិនិយោគយើងត្រូវពង្រាយហេដ្ឋារចនាសម្ព័ន្ធទៅកាន់បណ្ដាខេត្តនានាដើម្បីអូសទាញវិនិយោគ»។
សម្តេចតេជោបន្តថា «ខេត្តតាកែវ បានក្លាយជាខេត្តទី៤ ដែលមានកម្មករ និងរោងចក្រច្រើន បន្ទាប់ពីរាជធានីភ្នំពេញទី១, ទី២ ខេត្តកំពង់ស្ពឺ, ទី៣ខេត្តកណ្ដាល។ ចំណុចនេះ ចង្អុលបង្ហាញឲ្យឃើញប្រសិទ្ធភាពរបស់គោលនយោបាយរបស់រាជរដ្ឋាភិបាល ដែលបានដាក់ចេញសម្រាប់ការទាក់ទាញវិនិយោគតាមរយៈនៃការកសាងផ្លូវថ្នល់ ធ្វើម៉េចឲ្យមានភាពងាយស្រួលកសាងហេដ្ឋារចនាសម្ព័ន្ធផ្លូវ ស្ពាន អ្វីដែលចាំបាច់ដែលបម្រើដល់ការវិនិយោគ»៕
