សៀមរាប៖ ក្រុមការងារព័ត៌មាន និងប្រតិកម្មរហ័ស នៃអធិការដ្ឋាននគរបាលក្រុងរុនតាឯក តេជោសែន នៅព្រឹកថ្ងៃទី១ ខែវិច្ឆិកា ឆ្នាំ២០២៤ ឃើញមានបណ្តាញសង្គមមួយចំនួនបានសរសេររិះគន់ មកលើកម្លាំងសមត្ថកិច្ច នៃអធិការដ្ឋាននគរបាលក្រុងរុនតាឯកតេជោសែន ដែលបានចុះទៅអនុវត្តចាប់ និង ដកហូតសាច់គោចំនួន ១៥គីឡូ ។
ពាក់ព័ន្ធនឹងករណីខាងលើនេះ អធិការ នៃអធិការដ្ឋាននគរបាលក្រុងរុន តាឯកតេជោសែន សូមធ្វើការបំភ្លឺថា៖ ការអនុវត្តនេះ ដោយមានបណ្តឹងពីប្រជាពលរដ្ឋ និងការស្នើសុំសហការពីខាងមន្ត្រីជំនាញពេទ្យសត្វ របស់មន្ទីរកសិកម្មខេត្ត និងម្ចាស់ទីតាំងសត្វឃាតនៅក្រុងឈ្មោះ វាសនា ក្នុងគោលបំណងទប់ស្កាត់នូវការនាំសាច់គោដែលមិនមានប្រភពច្បាស់លាស់ ដែលអាចធ្វើឱ្យប៉ះពាល់ដល់ សុខភាពប្រជាពលរដ្ឋ ឬគុណភាព និងតម្លៃសាច់គោនៅក្រុងរុនតាឯក អធិការ នៃអធិការដ្ឋាននគរបាល ក្រុងរុនតាឯកតេជោសែន បានចាត់តាំងកម្លាំងជំនាញ ដើម្បីចុះសហការជាមួយមន្ត្រីពេទ្យសត្វ ទៅធ្វើការ ពិនិត្យ និងដកហូតយកសាច់គោចំនួន ១៥គីឡូ ពីតូបលក់សាច់គោឈ្មោះ យូ ស៊ីនឌីន ភេទប្រុស ដែល បានយកមកពីស្រុកស្រីស្នំ ដើម្បីយកមកលក់នៅក្នុងទីតាំងក្រុងរុនតាឯក ។
ក្រោយពីបានពិនិត្យ និងធ្វើការណែនាំដល់ម្ចាស់តូបលក់សាច់គោខាងលើ ម្ចាស់តូបក៏បានយល់ព្រម ទទួលស្គាល់កំហុសខុសឆ្គងរបស់ខ្លួន ហើយកម្លាំងសមត្ថកិច្ចយើងក៏បានធ្វើការអប់រំ និងធ្វើកិច្ចសន្យាប្រគល់ សាច់គោចំនួន ១៥គីឡូ ជូនគាត់វិញ ។
អាស្រ័យហេតុនេះ សូមអ្នកនិយមតាមដានតាមបណ្ដាញទំនាក់ទំនងសង្គម និងសាធារណជន មេត្តា ជ្រាបជាព័ត៌មាន ៕
