ចាប់ពីឆ្នាំ២០២៣តទៅ សិស្សជាប់និទ្ទេស A, B, C ចូលធ្វើគ្រូបង្រៀនដោយស្វ័យប្រវត្តិ ប៉ុន្តែត្រូវមានលក្ខខណ្ឌមួយចំនួន
ភ្នំពេញ៖ ក្រសួងអប់រំ យុវជន និងកីឡា នឹងជ្រើសរើសសិស្សប្រឡងជាប់និទ្ទេស A, B, C ឲ្យចូលធ្វើគ្រូបង្រៀនដោយស្វ័យប្រវត្តិ ចាប់ពីឆ្នាំ២០២៣ នេះទៅ ប៉ុន្តែត្រូវមានលក្ខខណ្ឌមួយចំនួន។ នេះបើយោងតាមឯកសារស្ដីពីការសម្រួចអាទិភាព នៃកំណែទម្រង់វិស័យអប់រំ យុវជន និងកីឡា សម្រាប់ឆ្នាំ ២០២៣-២០២៨ ដែលចេញផ្សាយនៅក្នុងខែសីហា ឆ្នាំ២០២៣ ដែល Maha Khmer ទទួលបាន។
ឯកសារដដែល បានបញ្ជាក់ថា ក្រសួងអប់រំ បានកំណត់កូតាសម្រាប់ «សិស្សនិទ្ទេស A, B, C ដើម្បីជ្រើសរើសចូលធ្វើគ្រូបង្រៀន» ដោយឆ្លងកាត់ការវាយ តម្លៃទៅតាមលក្ខណៈវិនិច្ឆ័យដែលនឹងបានកំណត់ (អាចជ្រើសរើសផ្អែកតាមលំដាប់ពិន្ទុពេលប្រឡង)។ ដោយឡែក កូតានៅសល់សម្រាប់បេក្ខជនផ្សេងទៀត ដោយត្រូវឆ្លងកាត់ការប្រឡងជ្រើសរើសដូច ធម្មតា ដែលនឹងដឹកនាំដោយក្រុមការងារថ្នាក់ជាតិ និងមានការចូលរួមពីសំណាក់តំណាងទីស្ដីការគណៈរដ្ឋមន្ត្រី។
ក្នុងឯកសារដដែលនោះ ក៏បានលើកឡើងពីការអនុវត្ត “«វិធានការម៉ឺងម៉ាត់ក្នុងការគ្រប់គ្រងគ្រូបង្រៀន និងបុគ្គលិកអប់រំ» ដោយទប់ស្កាត់មិនឲ្យមានករណីអន្តរាគមន៍។ រៀបចំ«រង្វាន់លើកទឹកចិត្តគ្រូល្អ និងនាយកល្អ» ដែលសម្រេចបានសមិទ្ធកម្មល្អប្រសើរ តាមរយៈការរៀបចំជាប្រាក់លើកទឹកចិត្ត ប្រាក់តំបន់ជួបការលំបាក និងប្រាក់ស្នាដៃ ដោយសារបៀវត្សគ្រូបង្រៀនមិនអាចកើនលើសពីមន្ត្រីរាជការផ្សេង។
រៀបចំការសិក្សា និងយន្តការ «ដោះស្រាយបញ្ហាលើស ខ្វះគ្រូ» ដោយផ្ដោតលើការគ្រប់គ្រងប្រកបដោយប្រសិទ្ធភាពគ្រូដែលមានស្រាប់ ជាជាងការផ្តោតលើការជ្រើសរើសគ្រូថ្មី (ដោយរៀបចំក្រុមការងារ អចិន្ត្រៃយ៍) និងរៀបចំយន្តការលើកទឹកចិត្ត, ព្រមទាំងផ្សារភ្ជាប់ជាមួយការអនុវត្តគន្លងអាជីព។
ទាក់ទិននឹងកិច្ចការខាងលើនេះ ក្រសួងអប់រំ នឹងប្រើប្រាស់ថវិកាគម្រោង និងថវិកាជាតិ មកសិក្សាអំពីការដោះស្រាយបញ្ហាលើសខ្វះគ្រូ។ ទន្ទឹមនឹងនេះ ក្រសួង នឹងធ្វើអាទិភាពចំណាយ ដើម្បីប្រមូលផ្ដុំធនធានសម្រាប់ការដោះស្រាយបញ្ហារបស់គ្រូបង្រៀន ដូចជា ការសាងសង់ផ្ទះគ្រូ, ការបង្កើនប្រាក់ឧបត្ថម្ភគ្រូបង្រៀននៅតំបន់ជួបការលំបាក ។ល។ ពិនិត្យឡើងវិញ តំបន់ជួបការលំបាក និងតំបន់ដាច់ស្រយាល និងការពិនិត្យឡើងវិញការឧបត្ថម្ភ សម្រាប់តំបន់ដាច់ស្រយាល និងតំបន់ជួបការលំបាក ដោយយកថវិកាគម្រោងមកសិក្សា និងរៀបចំក្រុមការងារ៕
