អ្វីដែលជាកត់សម្គាល់នោះគឺបុរសចំណាស់ជាសន្តិសុខសាលាផារា៉ហ្គន គឺជាគ្រូរបស់អភិបាលខេត្តរតនគីរី លោកញ៉ែម សំអឿន ដោយគេឃើញលោកបានជូនថវិកាដល់លោកគ្រូរបស់ខ្លួន និងបានឱបរឹតដោយក្ដីនឹករលឹក ។ ចំណែកលោកគ្រូវិញក៏ឃើញថាបានសំដែងការគោរពចំពោះកូនសិស្សរបស់ខ្លួនដែលបានក្លាយជាចៅហ្វាយមួយរូបផងដែរ ។
អ្នកលេងបណ្ដាញសង្គមជាច្រើនបានសំដែងការអបអរនិងបានបញ្ចេញមតិថា នេះគឺជាកាយវិការដ៏ល្អនិងជាគំរូសម្រាប់សង្គមខ្មែរ ។ ខ្លះបានបញ្ចេញមតិថា គ្រូមិនអាចក្លាយជាសេដ្ឋី តែគ្រូអាចបង្រៀនកូនសិស្សឱ្យក្លាយជាសេដ្ឋីបាន ជាក់ស្ដែងលោកគ្រូរូបនេះ ទោះបីមិនបានធ្វើធំ ក្នុងការងាររាជការ តែលោកគ្រូក៏បានបង្រៀនកូនសិស្សឱ្យក្លាយជាអ្នកដឹកនាំមួយរូប ។ នេះជាអ្វីដែលគ្រូចង់បាន ចង់ឃើញការរីកចម្រើនរបស់កូនសិស្ស ។
គួររំលឹកថា នៅសល់តែប៉ុន្មានថ្ងៃទៀត នឹងដល់ទិវារម្លឹកគុណគ្រូ ហើយសម្រាប់រូបភាពនិងកាយវិការរបស់អភិបាលខេត្តរូបនេះ ក៏នឹងធ្វើឱ្យកូនសិស្សទាំងអស់ដែលបានធំធាត់រីកចម្រើនទាំងឡាយទាំងពួង នឹងនឹករលឹកដល់គុណគ្រូរបស់ខ្លួនតាំងពីតូចដល់ធំ ៕
