ប្រំាថ្ងៃក្រោយគ្រោះរញ្ជួយដ៏មរណៈដ៏កំណាចបំផុតមិនធ្លាប់មាន ពលរដ្ឋភូមាបន្តស្នាក់នៅតាមទីវាល តាមផ្លូវថ្នល់ ឬចំការ ក្នុងភាពតក់ស្លុត ដោយខ្លាចជួបការបំផ្លិចបំផ្លាញថ្មីទៀត ព្រោះដីនៅតែបន្តរញ្ជួយឥតឈប់។
ចំនួនជនរងគ្រោះបាត់បង់ជីវិតបានឡើងជាង២៧០០នាក់ និងរបួសជាង ៤៥០០នាក់ ព្រមទាំងបាត់ខ្លួនជាង៤៤១នាក់។ នេះបើតាមតុល្យការផ្តល់ដោយអាជ្ញាធរភូមា នៅព្រឹកថ្ងៃអង្គារទី ១មេសា។ ឯអ្នកជំនាញ យល់ថាចំនួនអ្នកស្លាប់អាចមានជាច្រើនពាន់នាក់បន្ថែមទៀត។ ប្រតិបត្តិការសង្គ្រោះប៉ុន្មានថ្ងៃមកនេះ បានស្រោចស្រង់ជីវិតមនុស្សបានប្រមាណ៦៥០នាក់។
ក្នុងក្របខ័ណ្ឌជ្រោមជ្រែងអន្តរជាតិ ក្រុមសង្គ្រោះបរទេសជាង១០០០នាក់ បានទៅដល់ភូមាដើម្បីជួយក្រុមការងារតាមមូលដ្ឋានដែលគ្មានមធ្យោបាយធំ។ ប៉ុន្តែ ជាមួយសីតុណ្ហភាពឡើងក្តៅខ្លាំងដល់៤០អង្សាតាំងពីថ្ងៃចន្ទម្សិលមិញមកក្តីសង្ឃឹមរកឃើញជនរងគ្រោះនៅមានជីវិតកាន់តែស្តួចស្តើងឡើងៗ។
អង្គការសុខភាពពិភពលោក បានប្រកាសចាត់ទុករញ្ជួយដីនៅភូមានេះ ជាភាពបន្ទាន់ខ្ពស់បំផុត។ ចំណែកអង្គការកាកបាទក្រហមអន្តរជាតិបានប្រកាសអំពាវនាវថា ប្រជាពលរដ្ឋនៅក្រុងម៉ង់ដាឡៃ ដែលហិនហោចខ្លាំងជាងគេ ត្រូវជាចាំបាច់នូវ ជម្រក ស្បៀងអាហារនិងទឹក ជាបន្ទាន់ តែសង្គ្រាមស៊ីវិលដឹកនាំដោយរបបសឹកតាំងពីឆ្នាំ២០២១មក ទំនងជាឧបសគ្គរារាំងមិនឱ្យជំនួយបានទៅដល់ជនដែលត្រូវការខ្លាំង។ នេះជាពាក្យព្រមានរបស់កាកបាទក្រហមដដែល។
នៅប្រទេសថៃ ដែលរងគ្រោះមរណៈដោយរញ្ជួយដីកាលពីថ្ងៃសុក្រទី២៨មីនាដែរ ទាហានសង្គ្រោះកំពុងបន្តស្វែងរកជនរួចពីស្លាប់ក្នុងគំនរអគាររលំ។ មានស្លាប់យ៉ាងហោចណាស់២០នាក់ និងជាច្រើនសិបនាក់ទៀតកំពុងបាត់ខ្លួននៅឡើយ។ នេះបើតាមតុល្យការផ្តល់ដោយអាជ្ញាធរបាងកក នៅថ្ងៃអង្គារទី១មេសានេះ៕ដោយ៖ លឹម សំបូរ
