តុលាការកូរ៉េខាងត្បូង បានសម្រេចចេញដីកាបង្ខំឲ្យនាំខ្លួន ប្រធានាធិបតី យូន ស៊ុកយោល ឲ្យចូលបំភ្លឺចំពោះមុខច្បាប់ ក្នុងសំណុំរឿងប្រកាសច្បាប់អាជ្ញាសឹក កាលពីដើមខែធ្នូ ឆ្នាំ២០២៤។ ការចេញដីកាបង្ខំចាប់ខ្លួននេះ ក្រោយពីលោកបានបដិសេធមិនចូលខ្លួនបំភ្លឺ ចំនួន ៣ ដង។ មេធាវីការពារប្រធានាធិបតី លើកឡើងថា ដីកានោះ មិនត្រឹមត្រូវ និងខុសច្បាប់។ ចំណែក ការិយាល័យស៊ើបអង្កេតប្រឆាំងអំពើពុករលួយរបស់ឥស្សរជនជាន់ខ្ពស់ បញ្ជាក់ថា ដីកាបង្ខំឲ្យនាំខ្លួននេះ មានសុពលភាព រហូតដល់ថ្ងៃទី៦ ខែមករា ២០២៥។
ជាអតីតរដ្ឋអាជ្ញា ចេះសូត្រច្បាប់ហូរដូចទឹក ប្រធានាធិបតីក្នុងវ័យ៦៤ឆ្នាំ លោក យូន ស៊ុកយោល បានបដិសេធមិនចូលខ្លួនបំភ្លឺចំពោះមុខតុលាការ តាមដីកាកោះហៅ រហូតដល់ ៣ លើកទៅហើយ។ ពេលនេះ សាលាជម្រះក្តីកូរ៉េខាងត្បូង បានប្រើធម៌ក្តៅចេញដីកាបង្ខំឲ្យចូលខ្លួនតែម្តង។
ដីកានាំខ្លួនលោកប្រធានាធិបតីព្យួរតំណែងនិងដីកាឆែកឆេរ ត្រូវសម្រេចដាក់ចេញនៅព្រឹកថ្ងៃអង្គារ ទី៣១ធ្នូ។ នេះបើតាមអាជ្ញាធរស៊ើបអង្កេតកូរ៉េខាងត្បូង ដែលប្រកាសបញ្ជាក់នៅក្នុងសេចក្តីថ្លែងការណ៍ ដោយលម្អិតថា ដីកាចាប់ខ្លួននេះ ពុំទាន់បញ្ជាក់ពីកាលបរិច្ឆេទថាត្រូវអនុវត្តនៅថ្ងៃណាឲ្យច្បាស់ទេ តែវាមានសុពលភាព រហូតដល់ថ្ងៃទី ៦ មករា ឆ្នាំថ្មីឯណោះ។
បន្ទាប់ពីទទួលដំណឹងដីកាចាប់ខ្លួនកូនក្តី លោក Yoon Kab-keun មេធាវីការពារប្រធានាធិបតី យូន ស៊ុកយោល បានប្រតិកម្មប្រាប់ទីភ្នាក់ងារសារព័ត៌មានអាអែហ្វប៉េ (AFP) ថា ដីកានេះ មិនត្រឹមត្រូវ និង ខុសច្បាប់ទាំងស្រុង។
ទោះម្តេចក្តី ដីកាបង្ខំឲ្យនាំខ្លួនប្រធានាធិបតីកូរ៉េខាងត្បូង ឲ្យចូលបំភ្លឺចំពោះមុខច្បាប់នេះ ជាលើកទី១ក្នុងប្រវត្តិសាស្ត្រប្រជាធិបតេយ្យកូរ៉េ ដែលប្រមុខរដ្ឋកំពុងអនុវត្តមុខនាទី ត្រូវប្រឈមនីតិវិធីយ៉ាងដូច្នោះ។ តាមភាពជាក់ស្តែង លោក យូន ស៊ុកយោល នៅតែជាប្រធានាធិបតីស្របច្បាប់នៅឡើយ បើទោះបីជាមុខនាទីរបស់គាត់ ត្រូវរដ្ឋសភា ព្យួរទៅហើយក្តី។ តុលាការធម្មនុញ្ញ មានពេលពិចារណាករណីនេះ ដល់ខែមិថុនា ឆ្នាំ២០២៥។
បន្ទាប់ពីដាក់ចេញច្បាប់អាជ្ញាសឹក នៅថ្ងៃទី៣ធ្នូ លោក យូន ស៊ុកយោល ត្រូវជាប់ក្នុងសំណុំរឿងស៊ើបអង្កេត, អាជ្ញាធរហាមឃាត់រូបលោកមិនឲ្យចេញក្រៅប្រទេស, លោកត្រូវរងការចោទប្រកាន់ពីបទល្មើសបះបោរក្បត់ជាតិ ដែលជាអំពើឧក្រិដ្ឋកម្ម អាចប្រឈមមុខទោសប្រហារជីវិត។
តាំងពីដើមខែធ្នូមក ប្រទេសកូរ៉េខាងត្បូង ធ្លាក់ក្នុងវិបត្តិនយោបាយជាខ្លាំង។ បាតុកម្មពេញផ្ទៃប្រទេស មានមនុស្សចូលរួមរាប់សែននាក់។ រដ្ឋសភា បានបោះឆ្នោត ដល់ទៅ ២ដង ទើបសម្រេចលើនីតិវិធីទម្លាក់ប្រធានាធិបតី ។ លោក យូន ស៊ុកយោល បានត្រូវព្យួរតំណែងបណ្តោះអាសន្ន ដោយរង់ចាំតុលាការធម្មនុញ្ញសម្រេចអំពីធម្មនុញ្ញភាព។ រីឯ ប្រធានគណបក្សកាន់អំណាច បានសុំលាលែងពីប្រមុខបក្ស ហើយ រដ្ឋសភា ត្រូវធ្លាក់ទៅលើកណ្តាប់ដៃបក្សប្រឆាំង។ មិនតែប៉ុណ្ណោះ ប្រធានាធិបតីស្តីទីក៏ត្រូវសភាដកសេចក្តីទុកចិត្តថែមទៀត ដោយរងការចោទប្រកាន់ថា យកជើងរាទឹក មិនឲ្យស៊ើបអង្កេតលើប្រធានាធិបតី យូន ស៊ុកយោល។ ពេលនេះ អ្នកជំនួសមុខតំណែងប្រធានាធិបតីបណ្តោះអាសន្ន គឺរដ្ឋមន្ត្រីក្រសួងសេដ្ឋកិច្ច។
នៅមុខនិវេសនដ្ឋានរបស់ លោក យូន ស៊ុកយោល មានបាតុករគាំទ្ររូបលោក ជួបជុំ សម្តែងមតិ ហើយក៏អាចចាំរារាំងមិនឲ្យប៉ូលិសចូលឆែកឆេរ ឬនាំខ្លួនអ្នកនយោបាយដែលខ្លួនស្រឡាញ់ ទៅដែរ។ ក៏ប៉ុន្តែ តាមច្បាប់កូរ៉េ នរណារារាំងការអនុវត្តដីកានាំខ្លួន ក៏ត្រូវចាប់ខ្លួនដែរ ៕ ប្រភព៖ RFI
