ខេត្តបាត់ដំបង ៖ សេចក្តីរាយការណ៍ឲ្យដឹងថា កាលពីរសៀលថ្ងៃទី២១ ខែមករា ឆ្នាំ២០២៥ កម្លាំង សមត្ថកិច្ចនគរបាលក្រុងប៉ោយប៉ែតខេត្តបន្ទាយមានជ័យ សហការជាមួយកម្លាំងស្នងការដ្ឋាននគរបាខេត្តបាត់ដំបង បានចុះអនុវត្តដីកាបង្គាប់ឲ្យចាប់ខ្លួនរបស់ចៅក្រមជំនុំជម្រះសាលាដំបូងខេត្តបាត់ដំបង ទៅលើជនជាប់ចោទម្នាក់ឈ្មោះ គន្ធា វីធួន ភេទប្រុស អាយុ២៥ឆ្នាំ មានទីលំនៅបច្ចុប្បន្នភូមិព្រៃគប់ សង្កាត់អូរឫស្សី ក្រុងប៉ោយប៉ែត ខេត្តបន្ទាយមានជ័យ ។
តាមដីកាបង្គាប់ឲ្យចាប់ខ្លួន តម្រូវឱ្យនាំជនជាប់ចោទយកទៅឃុំខ្លួនដាក់ពន្ធនាគារអស់មួយជីវិត ពាក់ព័ន្ធពីបទឃាតកម្មគិតទុកជាមុន ដែលប្រព្រឹត្តនៅចំណុចក្រុមទី១២ ភូមិព្រែកមហាទេព សង្កាត់ស្វាយប៉ោ ក្រុងបាត់ដំបង ខេត្តបាត់ដំបង កាលពីថ្ងៃទី៨ ខែធ្នូ ឆ្នាំ២០២២ ពាក់ព័ន្ធករណីបាញ់ប្រហារបណ្តាលឲ្យស្លាប់ និងរបួស រឿងដណ្តើមស្រីគ្នា ។
សូមជម្រាបដែរថា ក្រុមជនដៃដល់យ៉ាងតិច៣នាក់ បានប្រើអាវុធខ្លីបាញ់ប្រហារទៅលើគូភាគីម្ខាងទៀត បណ្ដាលឲ្យស្លាប់ម្នាក់ និងរងរបួសចំនួន២នាក់ ព្រោះតែរឿងដណ្ដើមស្រី ។ ពេលនេះ សមត្ថកិច្ចកំណត់បានអត្តសញ្ញាណជាក់លាក់ចំនួន២នាក់ហើយ ថែមទាំងកំពុងតាមចាប់ខ្លួនទៀតផង ។ នេះបើតាមការផ្ដល់ព័ត៌មានបន្ថែមពីលោក លឹម ពុទ្ធីឡា ស្នងការរងទទួលផែនព្រហ្មទណ្ឌបានបញ្ជាក់ប្រាប់កោះសន្តិភាពតាមទូរស័ព្ទ ។
លោក លឹម ពុទ្ធីឡា បានឲ្យដឹងថា បើតាមការស្រាវជ្រាវពេញមួយកំណាត់ថ្ងៃនេះ ពីករណីបាញ់ប្រហារគ្នាយ៉ាងឃោរឃៅគឺផ្ដើមចេញពីគំនុំរឿងស្រី ពួកគេជាមនុស្សធ្លាប់ស្គាល់គ្នា ។ ប៉ុន្តែយ៉ាងណា យើងបានដឹង និងកំណត់បាននូវមុខសញ្ញាជនដៃដល់២នាក់ ហើយក្នុងចំណោមបក្សពួកគេចំនួន៣នាក់ ។
ដោយឡែក ចំពោះរថយន្តដែលក្រុមជនដៃដល់ជិះធ្វើសកម្មភាពវិញ បើតាមលោកស្នងការរងរូបនេះ បានប្រាប់ថា «យើងមិនទាន់ប្រាកដថា មានចំនួនប៉ុន្មានគ្រឿង ហើយរថយន្តម៉ាកអ្វីខ្លះនោះទេ ព្រោះកម្លាំងជំនាញកំពុងធ្វើការស្រាវជ្រាវ និងត្រូតពិនិត្យកាមេរ៉ាសុវត្ថិភាពនានាដែលគេបំពាក់នៅទីនោះ » ។
សូមបញ្ជាក់ថា ក្រុមជនដៃដល់ជិះរថយន្តស៊េរីទើបនបានដកកាំភ្លើងខ្លីដែលគេសង្ស័យជាប្រភេទឡុក បាញ់រះទៅលើភាគីម្ខាងទៀតដែលគេអះអាងថា ជាក្រុមជនរងគ្រោះកំពុងអង្គុយលើបង់ថ្មនៅលើសួនច្បារមាត់ស្ទឹង កាលពីវេលាម៉ោង៤ទៀបភ្លឺថ្ងៃទី៨ ធ្នូ នៅផ្លូវលេខ១ ត្រង់ចំណុចខាងមុខធនាគារ FTB ស្ថិតក្នុងភូមិ ព្រែកមហាទេព សង្កាត់ស្វាយប៉ោ ក្រុងបាត់ដំបង បណ្ដាលឲ្យបុរសម្នាក់ស្លាប់ ពេលបញ្ជូនដល់មន្ទីរពេទ្យរីឯ បក្សពួក២នាក់ទៀតរបួសស្រាល ។
ជនរងគ្រោះទាំង៣នាក់នោះ មាន ១-ឈ្មោះ រឿន សំរ៉ង ភេទប្រុស អាយុ៣២ឆ្នាំ នៅភូមិកន្ទូត សង្កាត់ក្ដុលដូនទាវ ក្រុងបាត់ដំបង (ស្លាប់) ។ ២-ឈ្មោះ ស ដារ៉ូ ភេទប្រុស អាយុ៣២ឆ្នាំ នៅភូមិព្រែកឆ្ដោ ឃុំពាមឯក ស្រុកឯកភ្នំ ( របួសស្រាល ) ។ ៣-ឈ្មោះ តឹប បញ្ញា ភេទប្រុស អាយុ២៧ឆ្នាំ នៅភូមិព្រែក មហាទេព សង្កាត់ស្វាយប៉ោ ក្រុងខេត្តបាត់ដំបង (របួសស្រាល) ។
ប្រភពព័ត៌មានដែលសារព័ត៌មានយើងទទូលបានពីកន្លែងកើតហេតុបានឲ្យដឹងថា ក្រុមខ្មាន់កាំភ្លើងនិងភាគីរងគ្រោះជាមនុស្សស្គាល់គ្នាច្បាស់លាស់ធ្លាប់ដើរផឹកស៊ីជាមួយគ្នា ហើយថែមទាំងធ្លាប់ប្រើប្រាស់ថ្នាំញៀនជាមួយគ្នាទៀតផង ។ ប៉ុន្តែចុងក្រោយ ពួកគេបែរជាចងគំនុំស៊ីសាច់ហុតឈាមគ្នា រហូតឈានដល់ការប្រើប្រាស់កាំភ្លើងបាញ់សម្លាប់គ្នាយ៉ាងឃោរឃៅ ព្រោះតែរឿង«ស្នេហាត្រីកោណ» ។
បើតាមអ្នកដឹងហេតុការណ៍បាននិយាយថា តួអង្គសំខាន់នៅក្នុងសំណុំរឿងបាញ់សម្លាប់គ្នានេះ គឺ « ឈ្មោះតុង និងឈ្មោះរ៉ង» ។ ពួកគេបានប្រើប្រាស់កាំភ្លើងខ្លីបាញ់ប្រហារគ្នា ព្រោះតែរឿងដណ្ដើមស្រីគ្នា ។
ប្រភពដដែលបានបន្តថា ដំបូងពួកគេណាត់គ្នាចូលផឹកស៊ីក្នុងក្លិបរាត្រីមួយកន្លែងនៅក្នុងក្រុងបាត់ដំបង ។ នៅក្នុងក្លិបរាត្រីនាយប់នោះ ខណៈកំពុងសប្បាយស្រាប់តែឈ្មោះ រ៉ង (ស្លាប់) និងតុង (ភាគីដៃដល់) បានឈ្លោះប្រកែកគ្នារឿងស្រីញីដែលគេដឹងថា ឈ្មោះតុង បានព្យាយាមដណ្ដើមនារីម្នាក់ដែលជាសង្សាររបស់ឈ្មោះរ៉ង ។
សាក្សីម្នាក់នេះបានបន្តថា ពេលនោះ ភាគីទាំង២ហាក់ដំឡើងសរសៃកដាក់គ្នាយ៉ាងខ្លាំងឌឺទៅឌឺមកខ្លាំងរៀងខ្លួន មិនចុះចាញ់គ្នាទេ ។ ប៉ុន្តែបន្ទាប់មក ហាក់សម្របសម្រួលគ្នាត្រូវវិញ តែក្រោយចេញពីក្នុងក្លិបក៏ស្រាប់តែមានរឿងតាមបាញ់ប្រហារគ្នាតែម្ដង ។
ប៉ុន្តែសាក្សីខ្លះទៀតបាននិយាយថា ពួកគេបានបែកគ្នាហើយ ពេលចេញពីក្នុងក្លឹបរាត្រី ។ ពេលនោះ ភាគីជនរងគ្រោះបាននាំគ្នាជិះម៉ូតូទៅឈប់អង្គុយលើបង់ថ្មកន្លែងកើតហេតុ ។ គេមិនដឹងថា ពួកគេណាត់គ្នាឬបែបណា ស្រាប់តែបន្តិចក្រោយមក គេឃើញក្រុមខ្មាន់កាំភ្លើងបានជិះរថយន្តទៅឆាបទីនោះ រួចក៏បត់ត្រឡប់មកវិញឈប់រថយន្តហើយចុះដកកាំភ្លើងបាញ់រះទៅលើក្រុមជនរងគ្រោះគ្មានសំចៃដៃឡើយ ។
បើតាមសាក្សីចុងក្រោយនេះបានបញ្ជាក់ថា ខ្មាន់កាំភ្លើងក៏មានគ្នាច្រើនដែរ ហើយគេឃើញចុះពីរថយន្តនាំគ្នាដកកាំភ្លើងខ្លីចំនួន៣ដើមបាញ់ប្រណាំងគ្នាដូចរឿងកុនសំដៅទៅលើក្រុមជនរងគ្រោះកំពុងអង្គុយលើបង់ថ្ម ។ ក្រោយពីឃើញជនរងគ្រោះត្រូវរបួស ក្រុមជនដៃដល់ក៏បើករថយន្តចាកចេញយ៉ាងលឿនបាត់ស្រមោលតែម្ដង ។
ពាក់ព័ន្ធនឹងរឿងអាវុធខ្លី៣ដើមបាញ់ប្រណាំងគ្នាដូចព្យុះផ្អើលក្រុងបាត់ដំបង នេះបើតាមលោក លឹម ពុទ្ធីឡា ស្នងការរងផែនព្រហ្មទណ្ឌបានថ្លែងថា ក្រុមប្រដាប់អាវុធនោះទំនងបានប្រើប្រាស់អាវុធខ្លីតែ១ដើមទេ បាញ់ទៅលើក្រុមជនរងគ្រោះព្រោះនៅកន្លែងកើកហេតុ មន្ត្រីជំនាញរកឃើញសំបកគ្រាប់ តែមួយប្រភេទ ប៉ុណ្ណោះចំនួនជាង១០គ្រាប់ដែលគេសន្និដ្ឋានថា សុទ្ធតែជាសំបកគ្រាប់កាំភ្លើងខ្លីម៉ាកឡុក ។
ប៉ុន្តែយ៉ាងណាក្ដី លោកស្នងការរងមិនបានផ្ដល់ព័ត៌មានលំអិតទេ ពាក់ព័ន្ធនឹងអត្តសញ្ញាណក្រុមជនដៃដល់ព្រោះលោកបានបញ្ជាក់ថា «ពេលនេះ កម្លាំងជំនាញបាននិងកំពុងតាមចាប់ខ្លួនក្រុមជនដៃដល់ប៉ុន្មាននាក់នោះហើយ » ៕
