អ្នកឧកញ៉ាឡេង ណាវ៉ាត្រាសម្រេចធ្វើកិច្ចសន្យាបន្ថែមសុំពន្យារពេល៣ឆ្នាំ ដើម្បីបញ្ចប់គម្រោង និងហាមអតិថិជនផ្សព្វផ្សាយអាក្រក់ពីខ្លួន
ភ្នំពេញ ៖ បន្ទាប់ពីអតិថិជនជាច្រើនរបស់អ្នកឧកញ៉ាឡេង ណាវ៉ាត្រាទាមទារផ្ទះ តែមិនមានផ្ទះ ផ្ដល់ជូន អ្នកឧកញ៉ាឡេង ណាវ៉ាត្រាបានធ្វើកិច្ចសន្យាថ្មីជាមួយអតិថិជន ដោយក្នុងនោះចំណុចសំខាន់ចំនួនគួរឱ្យកត់សម្គាល់ គឺសុំឱ្យអតិថិជនទុកពេលឱ្យក្រុមហ៊ុន៣៦ខែ ឬ៣ឆ្នាំ ហើយក្នុងអំឡុងពេល៣ឆ្នាំ អតិថិជនរបស់គម្រោងមិនអាចធ្វើសកម្មភាព ឬផ្សព្វផ្សាយអវិជ្ជមាននានាដែលធ្វើឱ្យប៉ះពាល់ដល់កេរ្តិ៍ឈ្មោះ និងផលប្រយោជន៍របស់ក្រុមហ៊ុនឡើយ ។
យោងតាមកិច្ចសន្យាដែលបានផ្សព្វផ្សាយបានឱ្យដឹងថា កិច្ចសន្យាបំពេញបន្ថែមត្រូវបានធ្វើឡើងតែរវាងក្រុមហ៊ុនម្នាក់ឯង ដោយមិនទាន់មានការយល់ព្រមពីអតិថិជននោះឡើយ ព្រោះក្នុងលិខិតកិច្ចសន្យាគឺមានតែស្នាមមេដៃរបស់អ្នកឧកញ៉ាម្នាក់ប៉ុណ្ណោះ ។
ក្នុងកិច្ចសន្យានេះមានចំនួន៥ចំនុចបន្ថែមទៀត ក្នុងនោះមាន ទី១. សុំទុកពេល៣៦ខែបន្ត រាប់គិតចាប់តាំងកិច្ចសន្យាទី១បានផុតកំណត់ ដើម្បីបញ្ចប់ការសាងសង់ជូនអតិថិជន។
ទី២. បើសិនជាក្នុងករណី ស្ថានភាពសដ្ឋកិច្ចល្អ ឬក្រុមហ៊ុនមានលទ្ធភាពណាមួយ ក្រុមហ៊ុនអាចនឹងបញ្ចប់ការសាងសង់មុនជូនអតិថិជន ។
ទី៣ . ករណីក្រុមហ៊ុនមិនបញ្ចប់ការសាងសង់ជូនទៅអតិថិជនបានតាមកាលកំណត់ក្នុងកិច្ចសន្យានេះ ក្រុមហ៊ុនសន្យាប្រមូលលក់ទ្រព្យសម្បត្តិរបស់ខ្លួន ដើម្បីប្រគល់ថវិកាជាសំណងជូនអតិថិជនវិញ តាមតម្លៃដើមដែលបានចុះកិច្ចសន្យាទិញលក់។
៤. អតិថិជនត្រូវទទួលយកសំណង នៅថ្ងៃបរិច្ឆេទទទួលសោរផ្ទះ តាមកិច្ចព្រមព្រៀងនេះ ។
ទី៥ អតិថិជនត្រូវតែយល់ព្រម មិនធ្វើសកម្មភាព និងផ្សព្វផ្សាយអវិជ្ជមានក្នុងអំឡុងពេលកិច្ចព្រមព្រៀងនេះ ដែលធ្វើឱ្យប៉ះពាល់ដល់កេរ្តិ៍ឈ្មោះ និងផលប្រយោជន៍ដល់ក្រុមហ៊ុនឡើយ ។
ក្នុងរយៈពេលចុងក្រោយនេះ អតិថិជនដែលទិញគម្រោងលំនៅឋានរបស់បុរីឡេងណាវ៉ាត្រានៅផ្លូវជាតិលេខ៦អាបាននាំគ្នាតវ៉ាសុំឱ្យអ្នកឧកញ៉ាពន្លឿនការសាងសង់ផ្ទះជូនពួកខ្លួន ខ្លះទៀតបានសុំឱ្យអ្នកឧកញ៉ាឡេង ណាវ៉ាត្រាទិញផ្ទះរបស់ពួកគេយកទៅវិញពីព្រោះខ្លះហួសកុងត្រា១ឆ្នាំហើយនៅតែមិនទាន់ទទួលបានផ្ទះនៅឡើយ ។
អតិថិជនមួយរូបដែលបានទិញគម្រោងរបស់អ្នកឧកញ៉ាឡេង ណាវាត្រា បានសរសេររៀបរាប់លើគណនីហ្វេសប៊ុកមួយឈ្មោះ Leanghy Chan ថាខ្លួនបានទិញផ្ទះល្វែងEo, BU52 គម្រោងយក្ស6A តម្លៃបង់ផ្តាច់$18,800 ក្នុងកិច្ចសន្យាសាងសង18ខែកាន់សោរចូលនៅ តែជាក់ស្តែងលើសកិច្ចសន្យា10ខែជាងហើយ សូម្បីតែបុកគ្រឹះមួយសសរមិនទាន់បុកគ្រឹះផង ។
គណនីហ្វេសប៊ុកដដែលនេះ បានសរសេរថា កាលពីថ្ងៃទី៣០ ខែកក្កដា ឆ្នា ២០២៣ អ្នកឧកញ៉ាស្នើសុំចិត្តអតិថិជនយោគយល់បន្តកិច្ចសន្យាព្រមព្រៀង36ខែទៀត អ្នកឧកញ៉ាបាននិយាយថាគ្មានលុយបង្វិលសាងសង់ទេ រង់ចាំអតិថិជនបង់ប្រាក់ប្រចាំខែ និងលក់ផ្ទះគម្រោងថ្មីបានសិនទើបសាងសង់បណ្តើរៗ(ចុះលុយអតិថិជនបង់ផ្តាច់យកលុយទៅណា) ។ តើអ្នកឧកញ៉ាមានគិតដល់ចិត្តអតិថិជនវិញអត់ ដែលជឿជាក់លើគម្រោងយក្សរបស់អ្នកឧកញ៉ា ខំប្រឹងធ្វើការសន្សំលុយ ខ្ចីលុយម៉ែ បងប្អូនខ្លះយកមកទិញដើម្បីមានផ្ទះរស់នៅសមរម្យនិងគេ។ បើនិយាយពីបុគ្គលិករបស់អ្នកឧកញ៉ាពូកែដោះស្រាយបញ្ហាជាមួយអតិថិជនណាស់ គឺទន្ទិញពាក្យឡើងរត់មាត់ហើយ “កំពុងពន្លឿនការសាងសង” និយាយលេសដោះសារ១លានហេតុផង ។
អង្គភាពសារព័ត៌មានយើងខ្ញុំនៅតាមដានស្ថានការទំាងនេះ ដើម្បីយកមកផ្សាយជូនពុកម៉ែបងប្អូនអានជាបន្តទៀត៕
