ភ្នំពេញ៖ ថ្ងៃទី០២ ខែមេសា ឆ្នាំ២០២៥ វេលាម៉ោង១០និង១៥នាទីព្រឹក មន្ទីរពេទ្យគន្ធបុប្ផា មានកិត្តិយសបានទទួលដំណើរទស្សនកិច្ចរបស់អ្នកអង្គម្ចាស់ (Grand Duke) Guillaume Jean Joseph Marie នៃប្រទេសលុចសំបួ ដោយមានការអមដំណើរដោយឯកឧត្តម Xavier Bettel, ឧបនាយករដ្ឋមន្ត្រី រដ្ឋមន្រ្តីការបរទេស និងពាណិជ្ជកម្មបរទេស។
ក្នុងការទទួលដំណើរមកដល់របស់ប្រតិភូ មានវត្តមាន ឯកឧត្តម ឌិត ឌីណា រដ្ឋមន្ត្រីក្រសួងកសិកម្ម រុក្ខាប្រមាញ់ និងនេសាទ ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការ តំណាងដ៏ខ្ពង់ខ្ពស់ឯកឧត្តមសាស្រ្តាចារ្យ ឈាង រ៉ា រដ្ឋមន្ត្រីក្រសួងសុខាភិបាល និងលោកជំទាវ អ៊ុំ សាម៉ុល អនុរដ្ឋលេខាធិការ ព្រមទំាងឯកឧត្តមបណ្ឌិត ចន ណារិទ្ធិ អនុរដ្ឋលេខាធិការក្រសួងសេដ្ឋកិច្ច និងហិរញ្ញវត្ថុ និងជាប្រធានប្រតិបត្តិមូលនិធិគន្ធបុប្ផាកម្ពុជា លោកវេជ្ជបណ្ឌិត Denis Laurent អគ្គនាយកមូលនិធិមន្ទីរពេទ្យគន្ធបុប្ផា បានជូនដំណើរប្រតិភូទស្សនកិច្ចតាមផ្នែកនិមួយៗ មានបន្ទប់សង្រ្គោះបន្ទាន់កុមារ និងទារក, បន្ទប់សង្រ្គោះក្រោយវះកាត់បេះដូង មន្ទីរពិសោធន៍ និងផ្នែកថតឆ្លុះរូបភាពវេជ្ជសាស្ត្រ។
ក្រោយទស្សកិច្ចរយ:ពេលជាង១ម៉ោង អ្នកអង្គម្ចាស់ (Grand Duke) Guillaume Jean Joseph Marie និងប្រតិភូ បានស្វែងយល់អំពីសកម្មភាព និងប្រព័ន្ធការងាររបស់មន្ទីរពេទ្យ ដោយបានវាយតម្លៃខ្ពស់ និងមានចំណាប់អារម្មណ៍ល្អលើទិដ្ឋភាពជាក់ស្តែងទូទៅរបស់មន្ទីពេទ្យ។
ឯកឧត្តមសាស្ត្រាចារ្យ យីត ស៊ុនណារ៉ា រដ្ឋលេខាធិការជាតំណាងដ៏ខ្ពង់ខ្ពស់ឯកឧត្តមសាស្ត្រាចារ្យរដ្ឋមន្ត្រីក្រសួងសុខាភិបាល បានជម្រាបលាអ្នកអង្គម្ចាស់(Grand Duke) Guillaume Jean Joseph Marie និងថ្លែងអំណរគុណចំពោះទស្សនកិច្ចស្វែងយល់អំពីវិស័យសុខាភិបាលនៅកម្ពុជា ពិសេសមន្ទីរពេទ្យគន្ធបុប្ផា ដែលបានព្យាបាលកុមារកម្ពុជា ដោយឥតគិតថ្លៃ ប្រកបដោយគុណភាព និងប្រសិទ្ធភាពខ្ពស់។
ឯកឧត្តមឧបនាយករដ្ឋមន្ត្រី Xavier Bettel តំណាងអ្នកអង្គម្ចាស់ បានចងចាំនូវទស្សនកិច្ចនាថ្ងៃនេះ និងពិចារណាលើលទ្ធភាពជំនួយសប្បុរសធម៌ណាមួយនាថ្ងៃអនាគត៕ ប្រភព៖Dr. Beat Richner, ដោយ៖ លឹម សំបូរ
