គ្រូជោគជ័យ អ៊ួន សារ៉ាត់ និង គ្នីគ្នាបែកគំនិតធ្វើវីដេអូPrankបោកភ្នែកមហាជនត្រូវសមត្ថកិច្ចចាប់ឃាត់ខ្លួន (វីដេអូ)
លោក អ៊ួន សារ៉ាត់ និងគ្នីគ្នាចំនួន២នាក់ទៀតត្រូវបានសមត្ថកិច្ចចាប់ឃាត់ខ្លួន ហើយក្រុមនេះរងការចោទប្រកាន់ករណីញុះញង់ឱ្យប្រព្រឹត្តបទល្មើសជាអាថ៌ រឿងហេតុបានកើតឡើងកាលពីថ្ងៃទី២៩ ខែឧសភា ឆ្នាំ ២០២៣ នាចំណុចសួនអភិរក្សនិងសង្គ្រោះសត្វព្រៃ ក្នុងខេត្តតាកែវ។
ជនសង្ស័យដែលមានឈ្មោះ អ៊ួន សារ៉ាត់ (៤០ឆ្នាំ) ឃុន ណាគង់ (៣៥ឆ្នាំ) និង ប៊ុន ឆានន់ (២៣ឆ្នាំ) ព្រមទាំងក្រុមការងារបណ្ដាញសង្គមហ្វេសប៊ុកបានបង្ហោះវីដេអូនៅលើផេកហ្វេសប៊ុករបស់លោក អ៊ួន សារ៉ាត់ ដោយដាក់ចំណងជើងថា «សាងម៉េច បានអ៊ីចឹង វីដេអូអប់រំ»។ ប៉ុន្តែខ្លឹមសារនៅក្នុងវីដេអូដែលបង្ហោះនោះ គ្មានត្រង់ណាបង្ហាញពីសារអប់រំដូចជាចំណងជើងដែលបានបង្ហោះទេ ព្រោះរូបភាពក្នុងវីដេអូដែលផ្ទុះការចាប់អារម្មណ៍និងចែកចាយបន្តគ្នាយ៉ាងគគ្រឹកគគ្រេងខាងលើ មានចេតនាញុះញង់បង្កឱ្យកើតមានការភាន់ច្រឡំ និង ខ្លាចរអាចំពោះប្រជាជនរស់នៅខេត្តតាកែវ។
លោកឧត្តមសេនីយ៍ទោស្នងការនៃស្នងការដ្ឋានខេត្តតាកែវ បានចង្អុលបង្ហាញឱ្យមានការស៊ើបអង្កេតករណីនេះ តាមរយៈការសម្របសម្រួលពីព្រះរាជអាជ្ញាសាលាដំបូងខេត្តតាកែវ នៅថ្ងៃទី១ ខែឧសភា ត្រឹមវេលាម៉ោង១ថ្ងៃ លោកឧត្តមសេនីយ កែវ មុន្នី នគរបាលខេត្តតាកែវបានកោះហៅបុគ្គលទាំង៣ដែលបានរៀបរាប់ខាងលើដើម្បីសាកសួរ និងកសាងសំណុំរឿងទៅតាមនីតិវិធី។
បន្ទាប់ពីបានទទួលការអប់រំណែនាំ ពីសមត្ថកិច្ច រួចលោក អ៊ួន សារ៉ាត់ ត្រូវបានដោះលែងវិញ ដោយក្នុងនោះលោកបានទទួលស្គាល់កំហុស និង សុំទោសជាសាធារណៈចំពោះទង្វើរបស់ខ្លួនផងដែរ៕
