សៀមរាប៖ អាជ្ញាធរខេត្តសៀមរាប បានឲ្យដឹងថា ក្នុងពេលឆាប់ៗខាងមុខ អាជ្ញាធរ នឹងប្រែក្លាយតំបន់មាត់ស្ទឹង និងតំបន់ជុំវិញវត្តរាជបូណ៌ ជាតំបន់កម្សាន្តទី៣ បន្ទាប់ពីតំបន់អង្គរ និងតំបន់ផប់ស្រ្ទីត។
លោក យុន លីនណេ អភិបាលរងខេត្តសៀមរាប បានលើកឡើងបែបនេះ នៅក្នុងឱកាសដែលលោកអញ្ជើញចូលរួមក្នុងវេទិការ “ទស្សនៈមួយ សៀមរាបមួយ” កាលពីល្ងាចថ្ងៃទី១២ ខែកក្កដា ឆ្នាំ២០២៤។ លោក បានឲ្យដឹងថា នៅក្នុងខេត្តសៀមរាប មានតំបន់កម្សាន្តដ៏មានប្រជាប្រិយចំនួន២ រួចមកហើយ គឺតំបន់រមណីយដ្ឋានអង្គរ និងតំបន់ផប់ស្ទ្រីត។
ក្នុងគោលដៅទាក់ទាញអ្នកទេសចរមកកម្សាន្តនៅក្នុងខេត្តសៀមរាបបន្ថែមទៀត អាជ្ញាធរខេត្តគ្រោងនឹងបង្កើតតំបន់កម្សាន្តទី៣ ដែលគ្របដណ្តប់លើផ្ទៃដីទំហំ ៤០ហិកតា នៅតាមមាត់ស្ទឹងសៀមរាប និងតំបន់ជុំវិញវត្តរាជបូណ៌ ដែលគម្រោងនេះក៏ទទួលបានការគាំទ្រពីរាជរដ្ឋាភិបាលផងដែរ។
លោកបានបញ្ជាក់ថា រដ្ឋបាលខេត្តសៀមរាប បានកំពុងរៀបចំជាមួយអង្គការដៃគូរៀបចំតំបន់មាត់ស្ទឹង និងតំបន់វត្តបូណ៌ជាតំបន់ទេសចរណ៍ទី៣ ក្រៅពីតំបន់ប្រាសាទ និងតំបន់ផប់ស្ទ្រីត ដែលនឹងរៀបចំតំបន់នោះឲ្យក្លាយជាតំបន់ប្រកបដោយការរស់នៅសុខដមរម្យនាជាមួយគ្នាមិនមានសម្លេងរំខានដូចផប់ស្ទ្រីត។ បច្ចុប្បន្នគម្រោងមួយនេះក៏កំពុងអនុវត្តសាកល្បងនៅលើដងផ្លូវតូចមួយដែលតភ្ជាប់ពីផ្លូវជាតិលេខ៦ មកម្តុំវត្តរាជបូណ៌ផងដែរ។
លោក យុន លីនណេ ក៏បានឲ្យដឹងដែរថា វិបត្តិកូវីដ ១៩ បានធ្វើវិស័យទេសចរណ៍ ទទួលរងគ្រោះយ៉ាងធ្ងន់ធ្ងរ ជាពិសេសនៅក្នុងខេត្តសៀមរាប។ នៅក្នុងគោលដៅស្តារឡើងវិញ រាជរដ្ឋាភិបាលកម្ពុជា បានខិតខំកែលម្អនូវហេដ្ឋារចនាសម្ព័ន្ធនានា ដូចជា ការស្ថាបនាផ្លូវ ៣៨ខ្សែ ការកែលម្អសោភណ្ឌភាពស្ទឹងសៀមរាប និងការបើកដំណើរការព្រលានយន្តហោះថ្មី និងប្រព័ន្ធដឹកជញ្ជូនសាធារណៈជាដើម។
លោក យុន លីនណេ បានបន្តថា ជាមួយគ្នានេះ រដ្ឋបាលខេត្តក៏បានខិតខំសហការជាមួយដៃគូពាក់ព័ន្ធនានា រួមនឹងវិស័យឯកជន បានធ្វើយុទ្ធនាការបៃតង តាមរយៈការដាំកូនឈើនៅតាមបណ្តាដងផ្លូវមួយចំនួននៅក្នុងក្រុងសៀមរាប ក៏ដូចជាតាមបណ្តាក្រុងស្រុកនានាផងដែរ ដើម្បីលើកកម្ពស់សោភ័ណភាពទេសភាពរបស់ខេត្តសៀមរាប៕
