លោកឧបនាយករដ្ឋមន្ត្រី ទៀ សីហា អតីតអភិបាលខេត្តសៀមរាប ក្លាយជារដ្ឋមន្ត្រីថ្មី នៃក្រសួងការពារជាតិ

ភ្នំពេញ៖ ឧបនាយករដ្ឋមន្ត្រី ទៀ សីហា ដែលជាអតីតអភិបាលខេត្តសៀមរាប ត្រូវបានតែងតាំងជារដ្ឋមន្ត្រីក្រសួងការពារជាតិ សម្រាប់គណៈរដ្ឋមន្ត្រី នីតិកាលទី៧ នៃរដ្ឋសភា ក្រោមការដឹកនាំរបស់លោកកិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី។

លោក ទៀ សីហា ត្រូវបានតែងតាំងជារដ្ឋមន្ត្រីក្រសួងការពារជាតិ ជំនួសតំណែងពីសម្តេចពិន័យសេនា ទៀ បាញ់ ដែលជាឪពុកបង្កើតរបស់លោក។

លោក ទៀ សីហា កើតថ្ងៃទី៣១ ខែសីហា ឆ្នាំ១៩៨០ ដែលមានសម្តេចពិជ័យសេនា ទៀ បាញ់ ជាឪពុក និងលោកស្រី តាវ តឿន ជាម្តាយ។

លោក ទៀ សីហា បានកាន់តំណែង ជាអភិបាលរងខេត្តសៀមរាប កាលពីខែសីហា ឆ្នាំ២០១៧ មុនពេលត្រូវបានព្រះមហាក្សត្រ តែងតាំងជាអភិបាលខេត្តសៀមរាប កាលពីខែធ្នូ ឆ្នាំ២០១៨ ជំនួសតំណែងពីលោក ឃឹម ប៊ុនសុង។

លោកបានទៅសិក្សា នៅប្រទេសបារាំង តាំងពីកម្រិតមធ្យមសិក្សា ហើយរហូតដល់ឆ្នាំ២០០១ លោកទទួលបានបរិញ្ញាបត្រ ផ្នែកពាណិជ្ជកម្ម ពីមហាវិទ្យាល័យ Passy Saint-Honore នៅក្រុងប៉ារីស។ បន្ថែមពី លើនេះ លោកក៏បានចូលសិក្សាពេញមួយឆ្នាំ នៅសាលាយោធា Ecole Speciale Militaire de Saint-Cyr នៃបណ្ឌិត្យសភាយោធាបារាំងផងដែរ។

លោកឧបនាយករដ្ឋមន្ត្រី បានវិលមកមាតុភូមិវិញ នៅឆ្នាំ២០០១ ក្រោយពីបញ្ចប់ការសិក្សាភ្លាមៗ នៅបារាំង។ លោកបានចាប់ផ្តើមបម្រើការងារ ជាមន្ត្រីកងរាជអាវុធហត្ថរាជធានីភ្នំពេញ និងបន្តការសិក្សានៅ រាជបណ្ឌិត្យសភារដ្ឋបាលជាន់ខ្ពស់ នៅឆ្នាំ២០០៧-២០០៨៕