តម្លៃលេចធ្លោជាសកលរបស់ «រមណីដ្ឋានប្រាសាទកោះកេរ»ដែលអាចចុះបញ្ជីបេតិកភណ្ឌពិភពលោក
ភ្នំពេញ ៖ ក្រសួងវប្បធម៌ និងវិចិត្រសិល្បៈបានបង្ហាញលក្ខណៈវិនិច្ឆ័យនៃតម្លៃលេចធ្លោជាសកលរបស់«រមណីយដ្ឋានប្រាសាទកោះកេរ» ដែលត្រូវបានចុះក្នុងបញ្ជីបេតិកភណ្ឌពិភពលោករបស់អង្គការយូណេស្ដូ ។
យោងតាមរយៈសេចក្ដីជូនដំណឹងរបស់ក្រសួងវប្បធម៌ចេញផ្សាយនាពេលថ្មីៗនេះបានលើកឡើងថា គណៈកម្មាធិការបេតិកភណ្ឌពិភពលោកបានសម្រេចជាឯកច្ឆន្ទចុះ«រមណីយដ្ឋានប្រាសាទកោះកេរ» ក្នុងបញ្ជីបេតិកភណ្ឌពិភពលោកនៃអង្គការយូណេស្កូដោយផ្អែកលើលក្ខណៈវិនិច្ឆ័យចំនួនពីរ គឺ ៖
១-រមណីយដ្ឋានបុរាណវិទ្យាកោះកេរ បង្ហាញក្នុងលក្ខណៈដ៏វិសេសវិសាលមួយនូវចំណុចគួបប្រសព្វរវាងតម្លៃមនុស្សដែលបង្កើតបានជារចនាបថកោះកេរ ដែលក្នុងនោះក្បាច់ចម្លាក់បដិមាបង្ហាញពីភាពក្លាហានរូបភាពបង្កប់នូវការស្រមៃ និងវិញ្ញាណរស់រវើកអំពីចលនារបស់ក្បាច់ចម្លាក់ដែលកើតចេញពីការបញ្ចូលគ្នានៃនិមិត្ដរូបសាសនា និងសិល្បៈរបស់ឥណ្ឌាជាមួយគោលគំនិតរចនាក្នុងស្រុក និងសិល្បៈហត្ថកម្ម ។
ទោះបីត្រូវបានបង្កើតឡើង ក្នុងរយៈពេលដ៏ខ្លីត្រឹមតែ២៣ឆ្នាំ ក្នុងសតវត្សទី១០ ក៏ដោយក៏រចនាបថកោះកេរបានជះឥទ្ធិពលយូរអង្វែងទៅលើការបញ្ចេញទឹកដៃសិល្បៈនៅក្នុងសម័យកាលក្រោយៗមកទៀតនៃអាណាចក្រខ្មែរ និងនៅតាមបណ្តាប្រទេសអាស៊ីអាគ្នេយ៍ផ្សេងទៀត ។
២-រមណីយដ្ឋានបុរាណវិទ្យាកោះកេរ គឺជាគំរូដើមស្ដីពីដែនទេសភាពទីក្រុងថ្មី ដែលមានសំណង់អគារធំៗដោយសារការប្រើប្រាស់ផ្ទាំងថ្មដុំធំៗដ៏ច្រើនសន្ធឹកសន្ធាប់នៅក្នុងការសាងសង់ និងការឆ្លាក់ក្បាច់ និងបដិមា ។ គំរូដើមនេះបានសម្ពោធឡើងនូវសម័យកាលនៃការសាងសង់ប្រាសាទថ្មអស់ជាច្រើនសតវត្សនៅទូទាំងអាណាចក្រខ្មែរ ហើយ បានក្លាយជាប្រភពនៃការបំផុសគំនិតសម្រាប់ការសាងសង់ប្រាសាទដ៏អស្ចារ្យនានានៅអង្គរ និងនៅក្នុងអាស៊ីអាគ្នេយ៍ក្នុងសតវត្សក្រោយៗមកទៀត ។
ក្រសួងវប្បធម៌បានបន្ដថា ការទទួលស្គាល់ជាផ្លូវការរមណីយដ្ឋានប្រាសាទកោះកេរ ជាបេតិកភណ្ឌពិភពលោកនាពេលនេះ គឺជាមោទនភាពជាតិដ៏ធំធេងថ្មីមួយទៀតបន្ទាប់ពីតំបន់រមណីយដ្ឋានអង្គរ ប្រាសាទ ព្រះវិហារ និងតំបន់ប្រាសាទសំបូរព្រៃគុក ត្រូវបានចុះក្នុងបញ្ជីបេតិកភណ្ឌពិភពលោកជាបន្តបន្ទាប់នៅឆ្នាំ១៩៩២ ឆ្នាំ២០០៨ និងឆ្នាំ២០១៧ ។
ក្រសួងបន្ថែមថា សមិទ្ធផលទាំងនេះ គឺពិតជាកើតចេញពីការចូលរួម និងទឹកចិត្តស្រឡាញ់មោះមុតរបស់ប្រជាជនកម្ពុជាគ្រប់រូប ជាពិសេសកិច្ចខិតខំប្រឹងប្រែងជាប់មិនដាច់របស់សម្ដេចតេជោ ហ៊ុន សែន និងការដឹកនាំដ៏ប៉ិនប្រសប់របស់សម្ដេចធិបតី ហ៊ុន ម៉ាណែត នាយករដ្ឋមន្ដ្រីនៃកម្ពុជាដែលជានិច្ចជាកាល តែងតែផ្ដល់អាទិភាពខ្ពស់ដល់កិច្ចការអភិវឌ្ឍ និងអភិវឌ្ឍបេតិកភណ្ឌដែលជាដួងព្រលឹង និងអត្តសញ្ញាណជាតិ ៕
