សៀមរាប៖ តាមសេចក្តីរាយការណ៍ពីប្រជាពលរដ្ឋ ដែលបានផ្តល់ព័ត៌មានមកកាន់ទីភ្នាក់ងារសារព័ត៌មាន «លឹម សំបូរ ញូស៍» និងសារព័ត៌មាន «មហាខ្មែរ» បានឱ្យដឹងថា នៅតាមបណ្តោយផ្លូវថ្មី ខាងលិចសាលារៀនវត្តបូព៌ា ស្ថិតក្នុងក្រុងសៀមរាប មានសំណង់ជាច្រើនកន្លែង កំពុងសាងសង់ ដែលត្រូវបានប្រជាពលរដ្ឋដាក់ការសង្ស័យថា អាចមានការរំលោភចូលលើចិញ្ចើម និងចំណីផ្លូវសាធារណៈ។
ក្រោយទទួលបានព័ត៌មាន រូបភាព និងឯកសារពាក់ព័ន្ធ អ្នកសារព័ត៌មានបានធ្វើការពិនិត្យបឋម និងបានបញ្ជូនរូបភាពទៅកាន់លោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ដើម្បីស្នើសុំឱ្យមានការចុះពិនិត្យ និងចាត់វិធានការតាមផ្លូវច្បាប់ជាបន្ទាន់ ក្នុងករណីរកឃើញថា មានការសាងសង់រំលោភលើចំណីផ្លូវសាធារណៈពិតប្រាកដមែន។
តាមរយៈរូបភាពដែលទទួលបាន គេសង្កេតឃើញថា សំណង់ខ្លះត្រូវបានសាងសង់ជិតទ្រូងផ្លូវខ្លាំង រហូតស្ទើរមិនទុកចន្លោះសម្រាប់ថ្មើរជើងឡើយ ដែលអាចបង្កការលំបាក និងហានិភ័យដល់ប្រជាពលរដ្ឋ ក៏ដូចជាភ្ញៀវទេសចរ ជាពិសេសតំបន់នេះជាតំបន់មានភ្ញៀវបរទេស និងអ្នកទេសចរចេញចូលច្រើនជារៀងរាល់ថ្ងៃ។
ប្រជាពលរដ្ឋមួយចំនួនបានលើកឡើងថា ប្រសិនបើសំណង់ ឬអាជីវកម្មភោជនីយដ្ឋានសាងសង់រំលោភចំណីផ្លូវបែបនេះ នៅពេលបើកដំណើរការអាជីវកម្ម អាចនឹងបង្កបញ្ហាខ្វះទីតាំងចតរថយន្ត និងម៉ូតូ ដែលអាចនាំឱ្យមានការចតលើទ្រូងផ្លូវ បង្កការកកស្ទះចរាចរណ៍ និងប៉ះពាល់ដល់សណ្តាប់ធ្នាប់សាធារណៈ។
ជាមួយគ្នានេះ ប្រជាពលរដ្ឋបានស្នើសុំដល់មន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប ព្រមទាំងអាជ្ញាធរពាក់ព័ន្ធ មេត្តាចុះពិនិត្យជាក់ស្តែង និងអនុវត្តវិធានការតាមច្បាប់ឱ្យបានតឹងរឹង ដើម្បីទប់ស្កាត់ការរំលោភលើចំណីផ្លូវសាធារណៈ និងធានាសុវត្ថិភាព សោភ័ណ្ឌភាព និងសណ្តាប់ធ្នាប់ក្នុងក្រុងសៀមរាប។
យោងតាមគោលការណ៍នៃការរៀបចំដែនដី និងបទប្បញ្ញត្តិសំណង់នៅកម្ពុជា ការសាងសង់អគារ ឬសំណង់គ្រប់ប្រភេទ ត្រូវគោរព “បន្ទាត់ថយសំណង់” (Setback) ពីចំណីផ្លូវសាធារណៈ ដើម្បីធានាសុវត្ថិភាព សណ្តាប់ធ្នាប់ និងសោភ័ណ្ឌភាពទីក្រុង។
ជាទូទៅ ផ្ទះស្នាក់នៅ ឬអគារតូចៗ ត្រូវទុកចម្ងាយប្រហែល ៤ម៉ែត្រ ពីព្រំចំណីផ្លូវ ខណៈអគារពាណិជ្ជកម្ម ភោជនីយដ្ឋាន សណ្ឋាគារ និងអគារធំៗ អាចត្រូវបានតម្រូវឱ្យទុកចន្លោះធំជាងនេះ អាស្រ័យលើប្រភេទផ្លូវ ទំហំដី និងផែនការរៀបចំទីក្រុងរបស់អាជ្ញាធរ។
ច្បាប់ក៏បានហាមឃាត់មិនឱ្យមានការសាងសង់រំលោភលើចិញ្ចើមផ្លូវសម្រាប់ថ្មើរជើង ឬយកធ្វើជាផ្នែកអគារ និងទីតាំងអាជីវកម្មឯកជនឡើយ។ ជាពិសេស នៅតំបន់ទេសចរណ៍ ឬតំបន់មានចរាចរណ៍មមាញឹក អាជ្ញាធរអាចកំណត់ឱ្យមានការថយសំណង់ច្រើនជាងធម្មតា ដើម្បីទុកទីធ្លាសម្រាប់ការធ្វើដំណើរ និងចតយានយន្តរបស់សាធារណជន។
គួរបញ្ជាក់ថា មុនចាប់ផ្តើមសាងសង់ ម្ចាស់សំណង់ត្រូវទទួលបានលិខិតអនុញ្ញាតសាងសង់ពីអាជ្ញាធរមានសមត្ថកិច្ចជាមុនសិន។ ក្នុងករណីមានការសាងសង់រំលោភលើចំណីផ្លូវ ឬផ្ទុយពីលក្ខខណ្ឌច្បាប់ អាជ្ញាធរមានសិទ្ធិផ្អាកការសាងសង់ ឬបញ្ជាឱ្យរុះរើតាមនីតិវិធីច្បាប់។
ជុំវិញករណីខាងលើនេះ គិតត្រឹមពេលចេញផ្សាយ អង្គភាពសារព័ត៌មានយើងខ្ញុំ នៅមិនទាន់ទទួលបានការបកស្រាយ ឬការបំភ្លឺជាផ្លូវការណាមួយពីលោក ហ៊ី សាយ ប្រធានមន្ទីររៀបចំដែនដី នគរូបនីយកម្ម សំណង់ និងសុរិយោដីខេត្តសៀមរាប នៅឡើយទេ។ យ៉ាងណាក៏ដោយ អង្គភាពយើងខ្ញុំនឹងរង់ចាំការបំភ្លឺពីសាមីមន្ទីរ ដើម្បីធ្វើការផ្សព្វផ្សាយជូនសាធារណជនឱ្យបានជ្រាបបន្ថែម៕
