នៅសហរដ្ឋអាមេរិក មហាសេដ្ឋីលំដាប់ពិភពលោក អេឡុន ម៉ាសក៍ ដែលជាចៅហ្វាយក្រុមហ៊ុន Space X, ឡាន Tesla និងបណ្តាញសង្គម X បានប្រកាសបង្កើតគណបក្សនយោបាយថ្មី ក្រោយពីឈ្លោះប្រកែកឌឺដងគ្នាជាមួយលោកប្រធានាធិបតី ដូណាល់ ត្រាំ ជុំវិញរឿងច្បាប់ថវិកាជាតិ។ មហាសេដ្ឋីរូបនេះបានរិះគន់ច្បាប់ថវិការបស់រដ្ឋបាលលោក ដូណាល់ ត្រាំ ថាមិនត្រឹមតែបង្កើនបំណុលសាធារណៈ ជាង ៣ ០០០ ពាន់លានដុល្លារប៉ុណ្ណោះទេ តែថែមទាំងធ្វើឲ្យអាមេរិកអាចនឹងក្ស័យធនទៀតផង។
ក្រោយដកខ្លួនចេញពីរដ្ឋបាលអាមេរិករបស់ចៅហ្វាយសេតវិមាន លោកដូណាល់ ត្រាំ កាលពីចុងខែឧសភា កន្លងទៅ និងបន្តឈ្លោះប្រកែកគ្នា អស់ជាច្រើនសប្តាហ៍ ពាក់ព័ន្ធនឹងច្បាប់ថវិកាជាតិ លោក មហាសេដ្ឋី អេឡុន មាសក៍ បានសម្រេចចិត្តចូលប្រឡូកក្នុងនយោបាយ ដោយបានប្រកាសបង្កើតគណបក្សនយោបាយថ្មី ឈ្មោះថា គណបក្សអាមេរិក (America Party)។ ការបង្កើតគណបក្សនេះដើម្បីចូលរួមប្រកួតប្រជែងជាមួយបក្សសាធារណរដ្ឋនិងបក្សប្រជាធិបតេយ្យ ក្នុងការបោះឆ្នោតពាក់កណ្តាលអាណតិ្ត នៅឆ្នាំ២០២៦ ខាងមុខ។ នេះបើតាមការបញ្ជាក់របស់លោក អេឡុន មាសក៍ នៅលើបណ្តាញសង្គម X នៅថ្ងៃសៅរ៍ ទី៥ កក្កដា។ លោកមហាសេដ្ឋីរូបនេះបានបន្តទៀតថា គណបក្សអាមេរិករបស់លោកនឹងផ្តល់សិទ្ធិសេរីភាពដល់ប្រជាជនអាមេរិកឡើងវិញ។
ចៅហ្វាយក្រុមហ៊ុន Space X, ឡាន Tesla និងបណ្តាញសង្គម X រូបនេះ បានរិះគន់ ច្បាប់ថវិកាជាតិរបស់រដ្ឋបាលលោក ដូណាល់ ត្រាំ ថានឹងបន្ថែមបំណុលសាធារណៈអាមេរិក ចំនួនជាង៣ ៤០០ ពាន់លានដុល្លារ ពីលើបំណុលសាធារណៈដែលមានស្រាប់ សរុបចំនួន ប្រមាណ ៣៦ ២០០ ពាន់លានដុល្លារ ហើយថែមទាំងអាចធ្វើឲ្យសហរដ្ឋអាមរិកក្ស័យធនទៀតផង។
ប្រមុខបក្សថ្មីរូបនេះ បានបញ្ជាក់ទៀតថា បច្ចុប្បន្ន ប្រជាជនអាមេរិកកំពុងរស់នៅក្នុងប្រព័ន្ធឯកបក្ស គឺមានតែបក្សសាធារណរដ្ឋ ឬ បក្សប្រជាធិបតេយ្យតែប៉ុណ្ណោះ។ គណបក្សទាំងពីរនេះ ត្រូវលោក អេឡុន មាសក៍ ចាត់ទុកថា ជាសត្វជ្រូកដើរស៊ីចំណីច្រើនហួសប្រមាណ ព្រមទាំងចោទថាខ្ជះខ្ជាយថវិកាជាតិ និងប្រព្រឹត្តអំពើពុករលួយ។
ទោះជាម្តេចក្តី មហាសេដ្ឋី អេឡុន មាសក៍ មិនបានគិតថា ការបង្កើតគណបក្សនយោបាយថ្មីរបស់លោក អាចប្រមូលកម្លាំងនិងបង្កើនសំឡេងភាគច្រើនទេ តែវាជាទម្ងន់បន្ថែម ដើម្បីកំណត់ថា តើច្បាប់ថវិកាជាតិ ត្រូវអនុម័តក្នុងរដ្ឋសហព័ន្ធ ត្រឹមកម្រិតណា។ លោក អេឡុន ម៉ាសក៍ ក៏ចង់ធានាថា ការបោះឆ្នោតថវិកាជាតិនេះ គឺធ្វើទៅតាមឆន្ទៈរបស់ប្រជាពលរដ្ឋអាមរិកពិតប្រាកដ។
មានដើមកំណើតមកពីអាហ្វ្រិកខាងត្បូង លោក អេឡុន មាសក៍ បានទទួលសញ្ជាតិអាមេរិក នៅឆ្នាំ ២០០២។ ដូច្នេះ លោក អាឡុន មាសក៍ នឹងមិនអាចមានសិទ្ធិឈរឈ្មោះ ក្នុងការបោះឆ្នោតជ្រើសរើសប្រធានាធិបតីនាពេលខាងមុខបានឡើយ។ តាមច្បាប់របស់សហរដ្ឋអាមេរិក បេក្ខជនប្រធានាធិបតី ត្រូវតែកើតនៅលើទឹកដីអាមេរិក។ នាពេលថ្មីនេះ លោកប្រធានាធិបតីអាមេរិក ដូណាល់ ត្រាំ ក៏ធ្លាប់បានគំរាមដកសញ្ជាតិអាមេរិកពីលោកមហាសេដ្ឋី អេឡុន មាសក៍ និង លុបចោលរាល់កិច្ចសន្យារបស់ក្រុមហ៊ុនរបស់លោកទាំងអស់ជាមួយនឹងរដ្ឋាភិបាលអាមេរិក។ ក៏ប៉ុន្តែលោក អេឡុន មាសក៍ មិនខ្វល់ខ្វាយពីការគំរាមកំហែងរបស់ចៅហ្វាយសេតវិមានឡើយ៕
