នេះបើយោងតាមសេចក្ដីសម្រេចថេរសភាសង្ឃខេត្តសៀមរាប ដែលសម្រេចដោយ ព្រះមង្គលសិលាចារ្យ ជុំគឹមឡេង ព្រះមេគុណខេត្តសៀមរាប ចុះថ្ងៃទី ២១ ខែកញ្ញា ឆ្នាំ២០២៣ ហើយទើបយកមកអនុវត្តន៍ នៅព្រឹកថ្ងៃទី ១៣ ខែវិច្ឆិកា ឆ្នាំ២០២៣ នេះ។
ថេរសភាខេត្តសៀមរាប បានសម្រេចបញ្ចប់តំណែងភិក្ខុ កែវ ខូយ ពីចៅអធិការវត្ត ចោទប្រកាន់ភិក្ខុ កែវ ខូយ ចៅអធិការវត្តពោធិលង្កា ស្ថិតក្នុងសង្កាត់ស្លក្រាម ក្រុងសៀមរាប ឲ្យត្រូវអាបត្តិសង្ឃាទិសេស។ ថេរសភាសង្ឃ ក៏បានសម្រេចថា បានផ្អាក តួនាទី ភិក្ខុ កែវ ខូយ ពីអធិការវត្តពោធិលង្កា ជាបណ្ដោះអាសន្ន រហូតដល់មានការ សម្រេចជាថ្មី ពីគណៈសង្ឃនាយក នៃព្រះរាជាណាចក្រកម្ពុជា។
ការចុះអនុវត្ត នៅព្រឹកនោះដែរ សមត្ថកិច្ច បានសម្រចឱ្យគ្រប់សង្ឃ អ្នកស្នាក់នៅក្នុងវត្ត ខាងលើ ចាកចេញឱ្យអស់ ហើយថេរសភាសង្ឃខេត្ត ស្នើឱ្យអនុគណក្រុងសៀមរាប រៀបចំដឹកនាំវត្ត បណ្តោះអាសន្ន ដើម្បីរង់ចាំមានការសម្រេចជាថ្មី។
ប្រភពបាននិយាយថា ការបញ្ចប់តំណែង ចោទប្រកាន់ ភិក្ខុ កែវ ខូយ ចៅអធិការវត្ត ពោធិលង្កា ស្ថិតក្នុងសង្កាត់ស្លក្រាម ក្រុងសៀមរាប ខេត្តសៀមរាប ខាងលើនេះ ជាជំងឺរ៉ាំរ៉ៃមួយ កើតមានរាប់ឆ្នាំមកហើយ ដែលវត្តមួយនេះ បែងចែកបក្ខពួក មិនគោរព ឋានានុក្រមសង្ឃតាមលំដាប់ ដោយសារមានអ្នកមានអំណាចការពារវត្ត ក៏ដូចជាបុគ្គល សង្ឃ ជាអ្នកការពារ ។
ប្រភព បានបន្តថា ក្នុងវត្តនោះ ក៏មានរឿងអាស្រូវ ថ្នាំញៀន លោកសង្ឃផឹកស្រាក្នុងវត្ត លោកសង្ឃយកស្រី មកដេករួមភេទក្នុងវត្ត មានសង្ឃជាច្រើនអង្គ ដោះស្បង់ចីវរ ស្លៀកខោអាវ បន្លំជាគ្រហស្ថ មកមើលគេប្រណាំងទូក នៅក្នុងស្ទឹងសៀមរាប និងមានរឿង បន្តបន្ទាប់ទៀត ជាច្រើន៕
