លោកឧត្តមសេនីយ៍ទោ ហួត សុធី ជាអ្នកស្រុកបាត់ដំបង កើតក្នុងគ្រួសារមួយ ដែលមានជីវភាពខ្វះខាត។ លោកជាកូនកំព្រាឪពុកតំាងពីកើតមក។ ប៉ុន្តែ កុមារ ហួត សុធី ជាមនុស្ស មិនចេះចុះចាញ់ នឹងព្រហ្មលិខិត ជាមនុស្សឧស្សាហ៍ព្យាយាមរៀនសូត្រ និងជាសិស្សរៀនពូកែម្នាក់ទើបមានវាសនាមកដល់ថ្ងៃនេះ។
កាលពីកុមារភាព លោក ហួត សុធី ជាសិស្ស រៀននៅសាលាបឋមសិក្សា អូតាគំា២ បន្តមកមធ្យមសិក្សា រៀននៅ អនុវិទ្យាល័យ វត្តដំរីស និងបានបញ្ជប់ការសិក្សា ទុតិយភូមិនៅ វិទ្យាល័យបាត់ដំបង ឬវិទ្យាល័យព្រះមុនីវស្ស។ នេះតាមអ្វីដែលសារព័ត៌មានយើងខ្ញុំបានបានដឹង និងដឹងតាមរយៈលោកស្ត្រាចារ្យម្នាក់ដែលជាមិត្តភ័ក្ត្រដ៏ជិតស្និត និងរៀនជុំគ្នាជាមួយលោក ហួត សុធី តំាងពីក្មេងរហូតមក។
ក្រោយបញ្ជប់ការសិក្សាទុតិយភូមិ លោក ហួត សុធី ពុំទាន់បានបន្តទៅរៀនថ្នាក់មហាវិទ្យាល័យ នៅឡើយ នោះក៏ដោយសារជីវភាពគ្រួសាររបស់លោកមានការខ្វះខាត។ ទើបលោក ហួត សុធី នៅជួយលក់ដូរអាវខោជជុះជាមួយម្តាយ នៅផ្សារភ្នំសំពៅ និងដើរលក់តាមជនបទ ដូចជាតំបន់កំពីងពួយ តាក្រាម…..ជាដើម និងពេលទំនេរពីការងារជួយម្តាយ លោកឆ្លៀតរត់ម៉ូតូឌុប។
ក្នុងពេលរត់ម៉ូតូឌុបនោះ លោកត្រូវបានសាលាភាសាជប៉ុនYamamoto ជ្រើសឱ្យចូលរៀនភាសាជប៉ុន និងក្រោយរៀនចប់នៅបាត់ដំបង លោកក៏បានមកបន្តការសិក្សានៅខេត្តសៀមរាប និងបានប្រលងជាប់ជាមគ្គុទេស៍ទេសចរណ៍ ភាសាជប៉ុន។ ដោយសារលោកចេះភាសាជប៉ុនយ៉ាងស្ទាត់ជំនាញនេះហើយ ទើបលោកមានឳកាសបំរើការងារជូនភ្ញៀវទេសចរណ៍ និងបានជួយបំរើផលប្រយោជន៍ប្រជាជន ក៏ដូចជួយដល់សង្គមជាតិ។ ក្នុងនោះមានការសាងសង់សាលារៀនជាច្រើន និងមជ្ឈមណ្ឌលបណ្តុះបណ្តាលវិជ្ជាជីវៈ សម្រាប់កុមារ និងយុវជន យុវនារីបានរៀនសូត្រ តាមរយៈការបកប្រែភាសាជប៉ុនជូន ឯកឧត្តម អ្នកឧកញ៉ាបណ្ឌិត សៀង ណាំ តំណាងរាស្ត្រមណ្ឌលខេត្តសៀមរាប។
ក្រោយមកលោកបានប្រលងចូលបំរើការងារជានគរបាលជាតិ ទើបលោកមានឱកាស បន្តចូលរៀនថ្នាក់ឧត្ដមសិក្សា និងថ្នាក់ក្រោមឧត្តម។
ក្នុងពេលតំណាលគ្នានោះដែរ លោក ហួត សុធី បានព្យាយាមរៀនភាសា បរទេស មាន ភាសាអង់គ្លេស និងភាសាជប៉ុនបន្តទៀត។
លោក ហួត សុធី បានចូលបម្រើការងារជាមន្ត្រីនគរបាលជាង២០ឆ្នាំមកហើយ។ ដោយសារលោក ហួត សុធី ជាមនុស្សព្យាយាមប្រឹងប្រែង អត់ធ្មត់និងការងារ ទើបត្រូវបាន រាជរដ្ឋាភិបាលផ្តល់ទំនុកចិត្ត និងតម្លើងឋានន្តរស័ក្ត និងតួរនាទី ជាលំដាប់លំដោយ រហូតលោកត្រូវបានតែងតាំងជាស្នងការ នៃស្នងការដ្ឋាននគរបាលខេត្តឧត្ដរមានជ័យ។
ក្នុងពេលនៅកាន់តួនាទីជាស្នងការ នៃស្នងការដ្ឋាននគរបាលខេត្តឧត្ដរមានជ័យ លោកត្រូវបានប្រជាពលរដ្ឋ និងមន្ត្រីក្រោមឱវាទ គោរពស្រឡាញ់ខ្លាំងណាស់។ មន្ត្រីនគរបាលនៅខេត្ដឧត្ដមានជ័យបានថ្លែងប្រាប់សារព័ត៌មានមហាខ្មែរថា លោកស្នងការជាមនុស្សគួរឱ្យគោរព ព្រោះថាលោកស្នងការ ស្រឡាញ់ អាណិត កូនចៅ និងប្រជាពលរដ្ឋ និងជាមនុស្សមិនចេះឆ្មើងឆ្មៃ ពោលគឺជាមនុស្សរាក់ទាក់។
ប៉ុន្តែអ្វីដែលធ្វើឱ្យលោកស្នងការ ផ្លាស់ប្តូរមកកាន់ជាស្នងការ នៃស្នងការដ្ឋាននគរបាល ខេត្តសៀមរាបវិញ អាចមកពីលោកស្នងការ ចេះភាសាបរទេស ដែលងាយស្រួលសម្រាប់ប្រតិភូ ឬបរទេស ទាក់ទងផ្លូវការ ជាពិសេសជនជាតិជប៉ុន។ ព្រោះលោកជាអ្នកជំនាញបកប្រែ និងធ្លាប់ជាអ្នកបកប្រែជូនឯកឧត្តម អ្នកឧកញ៉ាបណ្ឌិត សៀង ណាំ តំណាងរាស្ត្រមណ្ឌលខេត្តសៀមរាប។
មកកាន់ស្នងការដ្ឋាននគរបាលខេត្តសៀមរាបភ្លាម លោកឧត្តមសេនីយ៍ទោ ហួត សុធី ចាប់ផ្តើមកែលម្អស្នងការដ្ឋាន មានសោភ័ណ្ឌភាពយ៉ាងស្រស់ស្អាត និងកែលម្អ រួមទំាងសាងសង់ថ្មីនូវ អធិការដ្ឋាននគរបាល ប៉ុស្តិ៍នគរបាលរដ្ឋបាល និងប៉ុស្តិ៍ចំាបញ្ជារជាច្រើន ដើម្បីឱ្យប្រជាពលរដ្ឋងាយស្រួលក្នុងការទាក់ទង ឬរាយការណ៍ នូវសុខទុក្ខរបស់ខ្លួន និងបទល្មើសផ្សេងៗ។
យើងសង្កេតឃើញថា ចាប់តំាងពីលោកឧត្តមសេនីយ៍ទោ ហួត សុធី មកកាន់ជាស្នងការ នៃស្នងការដ្ឋាននគរបាលខេត្តសៀមរាប ជាងមួយឆ្នំាមកនេះ រាល់បទល្មើសត្រូវបានកាត់បន្ថយយ៉ាងច្រើន ដែលធ្វើឱ្យប្រជាពលរដ្ឋ ក៏ដូចកងកម្លំាងនគរបាលក្រោមឱវាទ គោរពស្រឡាញ់។ ជាពិសេសទៅទៀតនោះ គឺក្មេងទំនើងត្រូវបានបាក់ស្បាត និងស្ងាត់ក្នុងខេត្តសៀមរាប។
នាពេលថ្មីៗនេះដែរ លោកឧត្តមសេនីយ៍ទោ ហួត សុធី ត្រូវបានថ្នាក់ដឹកនំាក្រសួងមហាផ្ទៃ សរសើរជា «ស្នងការគំរូ»។
ក្នុងបទសម្ភាន៍មួយរបស់សារព័ត៌មានមហាខ្មែរ ជាមួយលោកស្នងការ ហួត សុធី ក្នុងនោះយើងបានសួរថា«យប់ឡើងលោកស្នងការមិនសម្រាកខ្លះទេឬ បានជា រាល់ហេតុការកើតឡើង ឃើញលោកស្នងការទៅដល់ភ្លាមរហូតចឹង?»
លោកស្នងការឆ្លើយថា៖ សុខទុក្ខរបស់ប្រជាពលរដ្ឋ គឺជាសុខទុក្ខរបស់ខ្ញុំ ខ្ញុំជាអ្នកបំរើប្រជាពលរដ្ឋ ហើយថ្នាក់ដឹកនំាចាត់តំាងខ្ញុំឱ្យធ្វើជាស្នងការ គឺត្រូវតែបំរើប្រជាពលរដ្ឋ ទោះយប់ឬថ្ងៃ ក្តៅភ្លៀងរងាយ៉ាងក៏ដោយ។ សុវត្ថិភាពរបស់ប្រជាពលរដ្ឋ និងថ្នាក់ដឹកនំា ឬប្រតិភូអញ្ជើមក រួមទំាងការបង្ក្រាបបទល្មើសផ្សេងៗ គឺជាតួរនាទីដ៏សំខាន់បំផុតសម្រាប់យើងខ្ញុំ៕
