សៀមរាប៖ យើងខ្ញុំទាំងអស់គ្នាជា នាយក នាយករង នាយទាហាន នាយទាហានរង ព្រមទាំងពលទាហាន ទាំងអស់នៃមន្ទីរពេទ្យយោធភូមិភាគទី៤ សូមប្រកាសគាំទ្រយ៉ាងពេញទំហឹងដោយស្មារតីគោរព ស្រលាញ់ ស្មោះត្រង់បំផុត និងសូមអបអសាទរយ៉ាងក្លៀវក្លា ប្រកបកដោយសេចក្ដីសប្បាយរីករាយយ៉ាងក្រៃលែង និង មោទនភាពក្នុងឱកាសដែល ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ទទួលបាននូវតំណែង ដ៏ខ្ពង់ខ្ពស់ជា “ នាយករដ្ឋមន្ត្រីនៃព្រះរាជាណាចក្រកម្ពុជា ” នីតិកាលទី៧ នៃរដ្ឋសភា។
ការទទួលបាននូវតួនាទីភារកិច្ចដ៏ឧត្តុងឧត្តមនេះ គឺពិតជាស័ក្តិសមបំផុតដែល ឯកឧត្តម កិត្តិទេសាភិបាល បណ្ឌិត ទទួលបានការគាំទ្រពីមហាជនដ៏លើសលប់តាមរយះ ការបោះឆ្នោតជាតិជ្រើសតាំងតំណាងរាស្ត កន្លងទៅថ្មីៗនេះ។
ហើយនេះជាសក្ខីភាពឆ្លុះបង្ហាញអំពីការខិតខំប្រឹងប្រែង ប្រកបដោយឆន្ទៈមោះមុត អង់អាចក្លាហានរបស់ ឯកឧត្តម កិត្តិទេសាភិបាលបណ្ឌិត ដែលបានលះបង់កម្លាំងកាយចិត្ត ពេលវេលា និងប្រាជ្ញាស្មារតីមិនខ្លាចនឿយហត់ដើម្បីបម្រើដល់ឧត្តមប្រយោជន៍ជូនប្រជាជន និងសង្គមជាតិយើងទាំងមូល។
យើងខ្ញុំទាំងអស់គ្នាសង្ឃឹមជឿជាក់ថា រាជរដ្ឋាភិបាលកម្ពុជាក្នុងអាណត្តិថ្មី ក្រោមមាគ៌ាដឹកនាំប្រកប ដោយស្មារតីស្មោះស្ម័គ្រចំពោះជាតិ មាតុភូមិ និងប្រជាជន របស់ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត ជានាយករដ្ឋមន្ត្រី នឹងធ្វើឲ្យប្រទេសជាតិយើងបន្តទទួលបាននូវជោគជ័យថ្មីៗ ថែមទៀត
ប្រកបដោយសុខសន្តិភាព ស្ថិរភាពនយោបាយ និងការអភិវឌ្ឍ រីកចម្រើនទៅមុខឥតឈប់ឈរ លើ គ្រប់វិស័យ ស្របតាមមាគ៌ា និងមរតកនយោបាយដ៏ថ្លៃថ្លាជាប្រវត្តិសាស្ត្រ ក្រោមការដឹកនាំប្រកបដោយ គតិបណ្ឌិត និងភាពប៉ិនប្រសប់ របស់សម្តេចតេជោ ហ៊ុន សែន វីវបុរសសង្គ្រោះជីវិតជាតិកម្ពុជា ពីរបប ប្រល័យពូជសាសន៍ ស្ថាបនិកមគ្គុទេសក៍ឯក នយោបាយ ឈ្នះ ឈ្នះ ដែលបាននាំមកនូវសន្តិភាព និង ការឯកភាពជាតិពេញលេញ ដឹកនាំអភិវឌ្ឍប្រទេសរីកចម្រើន ដែលធ្វើឲ្យជាតិមាតុភូមិមានភាពសម្បូរ សប្បាយរុងរឿង ប្រជាជនរស់នៅប្រកបដោយសុភមង្គល និងវិបុលភាព ព្រមទាំងទទួលបាននូវកិត្យានុ ភាពល្បីល្បាញទាំងក្នុងតំបន់ និងសកលលោក។
ជាថ្មីម្តងទៀតយើងខ្ញុំទាំងអស់គ្នាសូមលើកហត្ថបួងសួងដល់គុណបុណ្យព្រះរតនត្រ័យ កែវទាំងបី និង វត្ថុសក្កិសិទ្ធទាំងឡាយ សូមជួយអភិបាលគ្រងថែរក្សា និងការពារ ប្រសិទ្ធពរ បវរមហាប្រសើរ ជូន ឯកឧត្តម កិត្តិទេសាភិបាលបណ្ឌិត ហ៊ុន ម៉ាណែត នាយករដ្ឋមន្ដ្រីនៃព្រះរាជាណាចក្រកម្ពុជា និងលោក ជំទាវ ព្រមទាំងក្រុមគ្រួសារជាទីស្រលាញ់ បានប្រកបនូវពុទ្ធពរទាំងបួនប្រការគឺ អាយុ វណ្ណៈ សុខៈ ពលៈ កុំបីឃ្លៀងឃ្លាតឡើយ ។
ដោយសេចក្តីគោរព ស្រលាញ់ដ៏ជ្រាលជ្រៅ និងស្មោះស្ម័គ្របំផុតអំពីយើងខ្ញុំ។
សេចក្តីគួរ ឬពុំគួរ សូមឯកឧត្តមមេត្តាខន្តី និងអភ័យទោស៕
ថ្ងៃអង្គារ ៦កើត ខែស្រាពណ៌ ឆ្នាំថោះ បញ្ចស័ក ព.ស ២៥៦៧
សៀមរាប ថ្ងៃទី២២ ខែសីហា ឆ្នាំ២០២៣
នាយកមន្ទីរពេទ្យ
វរសេនីយ៍ឯក វេជ្ជ. ហៅ ទិត្យប៊ុនរ៉ា
