រដ្ឋមន្ត្រីក្រសួងដែនដី លោក សាយ សំអាល់ នៅថ្ងៃទី០៣ មករា បានបើកកិច្ចប្រជុំជាមួយធនាគារជាតិ រួមនឹងអ្នកធ្វើការលើវិស័យអចលនទ្រព្យ និងស្ថាប័នហិរញ្ញវត្ថុ ដើម្បីសម្របសម្រួល ឱ្យអតិថិជនដែលទិញផ្ទះ ដោយបង់រំលស់ជាមួយម្ចាស់បុរីអាចផ្ទេរបំណុលទៅបង់ជាមួយធនាគារ ឬមីក្រូហិរញ្ញវត្ថុវិញ។
ការពិភាក្សានេះ ធ្វើឡើងបន្ទាប់ពីអ្នកពាក់ព័ន្ធសង្កេតឃើញថាការទិញផ្ទះដោយបង់រំលស់ជាមួយម្ចាស់បុរី គឺមានអត្រាការប្រាក់ខ្ពស់ ខណៈការបង់ជាមួយធនាគារ ឬុមីក្រូហិរញ្ញវត្ថុមានអត្រាការប្រាក់ទាបជាង។
លោកស្រី ជា សេរី អគ្គទេសាភិបាលធនាគារជាតិនៃកម្ពុជាបានអះអាងថា យន្តការនេះ គឺជួយសម្រួលដល់អតិថិជនជាអ្នកបង់រំលស់ផ្ទះផង និងជួយដល់ម្ចាស់បុរីផង។
ត្រង់ចំណុចនេះ លោកស្រី ជា សេរី ពន្យល់ថា ធនាគារនឹងសងលុយទៅម្ចាស់បុរីជំនួសអតិថិជន ដ្បិតថា អតិថិជននៅបន្តបង់សងបំណុលត្រឡប់ទៅធនាគារវិញ តែស្ថិតក្នុងលក្ខខណ្ឌធូរស្រាលជាង។ ចំណែក ម្ចាស់បុរីទទួលបានទុនសម្រាប់បន្តការអភិវឌ្ឍរបស់ខ្លួនទៅមុខ។
ចំណែកលោក សាយ សំអាល់ រដ្ឋមន្ត្រីក្រសួងរៀបចំដែនដី នគរូបនីយកម្ម និងសំណង់ពុំបានបញ្ជាក់លម្អិតអ្វីឡើយពាក់ព័ន្ធនឹងការសម្របសម្រួលលក្ខខណ្ឌបង់រំលស់របស់អតិថិជនទិញលំនៅឋានលក្ខណៈបុរីនោះទេ។ ប៉ុន្តែលោករដ្ឋមន្ត្រីរូបនេះបានលើកឡើងថា ក្នុងរយៈពេលមួយឆ្នាំកន្លះមកនេះ ក្រសួងបានអនុវត្តនូវការងារចំនួន៦ ហើយបានសម្រេចនូវលទ្ធផលមួយដែលលោកចាត់ទុកថា គ្មានវិវាទក្នុងប្រទេស។
ការរៀបចំយន្តការសម្របសម្រួលដល់អតិថិជនបង់រំលស់ជាមួយម្ចាស់បុរីនេះ ធ្វើឡើងក្រោយអាជ្ញាធរ និងអ្នកធ្វើការលើវិស័យអចលនទ្រព្យ មើលឃើញ ការរឹបអូសផ្ទះដោយម្ចាស់បុរី បាននិងកំពុងក្លាយជាបញ្ហាដែលតែងកើតមានឡើងជាញឹកញាប់ ខណៈពលរដ្ឋជាច្រើនបានស្នើសុំកិច្ចអន្តរាគមន៍ពីក្រសួងស្ថាប័នពាក់ព័ន្ធ ពិសេសពីលោកនាយករដ្ឋមន្ត្រី។
គួរកត់សម្គាល់ថា កាលពីថ្ងៃទី០៩ ខែមិថុនា ឆ្នាំ២០២៣ លោកហ៊ុន សែន ដែលគ្រានោះនៅកាន់តំណែងជានាយករដ្ឋមន្ត្រីបានស្នើដល់ម្ចាស់បុរីទាំងអស់ឱ្យបញ្ឈប់ជាបន្ទាន់នូវសកម្មភាពរឹបអូសផ្ទះពីអតិថិជនដែលគ្មានលទ្ធភាពបង់រំលស់បន្ត។ ចំពោះលោក ហ៊ុន សែន ការរឹបអូសផ្ទះរបស់អតិថិជន ពុំមែនជារឿងល្អដល់សេដ្ឋកិច្ចជាតិនោះទេ។
លោក ប៉ូ អ៊ាវ គង់ អគ្គនាយកក្រុមហ៊ុន Advance Real estate បានថ្លែងមកវិទ្យុបារាំងអន្តរជាតិRFIថា ការរៀបចំយន្តការ និងនីតិវិធីជួយសម្រួលកម្ចីរបស់អតិថិជនដែលមានបំណងចង់ទិញលំនៅឋាន គឺជាពេលវេលាដែលល្អដើម្បីដោះស្រាយបញ្ចប់បញ្ហាវិវាទដែលធ្លាប់កើតមានកន្លងមករវាងអ្នកអភិវឌ្ឍន៍ និងអ្នកទិញ។ ក្នុងនាមជាអ្នកធ្វើការលើវិស័យអចលនទ្រព្យ លោក ប៉ូ អ៊ាវគង់ លើកទឹកចិត្តឱ្យអ្នកទិញលំនៅឋានត្រូវស្វែងរកកម្ចីពីវិស័យធនាគារ និងមីក្រូហិរញ្ញវត្ថុដែលមានការប្រាក់សមរម្យ និងមានការការពារហានិភ័យ៕ ប្រភព៖ RFI
