ភ្នំពេញ៖ ករណីជេរប្រមាថ ឬបន្ទាបតម្លៃអ្នកដទៃតាមបណ្ដាញសង្គម អាចមិនបញ្ចប់ត្រឹមការលុបវីដេអូ ឬចេញមុខសុំទោសនោះទេ ប្រសិនបើខ្លឹមសារនោះមានធាតុផ្សំនៃបទល្មើសព្រហ្មទណ្ឌ។ បច្ចុប្បន្ន ក្រុមការងារសីលធម៌ ដែលដឹកនាំដោយក្រសួងកិច្ចការនារី កំពុងរៀបចំវិធាន និងនីតិវិធីសម្រាប់ចាត់ការករណីជេរប្រមាថតាមបណ្ដាញសង្គម។
លោកស្រី ហ៊ូ និរមិត្តា អ្នកនាំពាក្យក្រសួងកិច្ចការនារី បានឱ្យដឹងថា នៅពេលរកឃើញមាតិកាដែលអាចប៉ះពាល់ដល់សីលធម៌សង្គម ក្រុមការងារអន្តរក្រសួងនឹងពិនិត្យលើខ្លឹមសារ ពាក្យសម្ដី កាយវិការ និងរូបភាពដែលត្រូវបានបង្ហោះ មុននឹងទាក់ទងទៅម្ចាស់គណនី ឬម្ចាស់មាតិកា ដើម្បីស្នើឱ្យកែសម្រួល ឬដកមាតិកាចេញ។
លោកស្រីបានបញ្ជាក់ថា ការដក ឬលុបមាតិកាដែលមានផលប៉ះពាល់ខ្លាំង អាចជួយទប់ស្កាត់ការរីករាលដាល និងកាត់បន្ថយផលប៉ះពាល់ដល់អ្នករងគ្រោះ។ ទោះជាយ៉ាងណា ប្រសិនបើករណីនោះមានធាតុផ្សំនៃបទល្មើសព្រហ្មទណ្ឌ ការដោះស្រាយអាចបន្តតាមនីតិវិធីច្បាប់។
លោកស្រី ហ៊ូ និរមិត្តា បានលើកឡើងថា៖ «ករណីសារ ឬវីដេអូដែលអាចមានទោសដល់កម្រិតព្រហ្មទណ្ឌ ការលុបចេញ ឬត្រឹមសុំទោស មិនទាន់ចាត់ថាចប់នោះទេ»។
តាមការបញ្ជាក់របស់អ្នកនាំពាក្យ ក្រុមការងារនឹងវាយតម្លៃករណីនីមួយៗតាមស្ថានភាពជាក់ស្តែង។ ប្រសិនបើចាំបាច់ ក្រុមការងារអាចកោះប្រជុំវិភាគករណីពិសេស និងស្តាប់ការបកស្រាយពីគ្រប់ភាគី ដោយអព្យាក្រឹត មុនសម្រេចថាតើត្រូវអនុវត្តវិធានការអប់រំ ណែនាំ វិធានការរដ្ឋបាល ឬវិធានការតាមផ្លូវច្បាប់។
សម្រាប់ករណីស្រាល អាចមានការព្រមាន អប់រំ ឬណែនាំឱ្យម្ចាស់មាតិកាកែប្រែអាកប្បកិរិយា និងដកខ្លឹមសារដែលបង្កផលប៉ះពាល់។ ចំពោះករណីធ្ងន់ធ្ងរ អ្នកបង្កើតមាតិកាអាចប្រឈមនឹងវិធានការរដ្ឋបាល ឬនីតិវិធីផ្លូវច្បាប់ ប្រសិនបើអំពើនោះពាក់ព័ន្ធនឹងបទល្មើស។
ក្រុមការងារបានរៀបចំលក្ខខណ្ឌ និងនីតិវិធី ដើម្បីកំណត់ថា ករណីណាត្រូវអប់រំ ណែនាំ ឬព្រមាន ករណីណាត្រូវចាត់វិធានការរដ្ឋបាល និងករណីណាត្រូវបន្តតាមផ្លូវច្បាប់។ ក្រុមការងារក៏បានកំណត់តួនាទីជាដើមបណ្ដឹងទៅតាមវិស័យ និងដែនសមត្ថកិច្ចរបស់ស្ថាប័ននីមួយៗ ដើម្បីឱ្យការដោះស្រាយមានភាពច្បាស់លាស់ និងអាចសហការជាមួយស្ថាប័នអនុវត្តច្បាប់ និងតុលាការ។
ដើម្បីជៀសវាងការបកស្រាយខុសគ្នា និងការត្រួតស៊ីគ្នានៃសមត្ថកិច្ច ក្រុមការងារក៏បានរៀបចំនិយមន័យ និងឯកសារយោងសម្រាប់ប្រើជាមូលដ្ឋានក្នុងការអនុវត្ត ដោយរួមមានសេចក្តីប្រកាសរួម ក្រមព្រហ្មទណ្ឌ ច្បាប់ស្តីពីរបបសារព័ត៌មាន ច្បាប់ស្តីពីទូរគមនាគមន៍ និងលិខិតបទដ្ឋានគតិយុត្តពាក់ព័ន្ធផ្សេងទៀត។
ការរិះគន់ស្ថាបនា ខុសពីការប្រមាថ
ក្រុមការងារក៏បានពិភាក្សាអំពីព្រំដែនរវាង ការរិះគន់ស្ថាបនា និង ការប្រមាថ ឬបន្ទាបតម្លៃអ្នកដទៃ។
លោកស្រី ហ៊ូ និរមិត្តា ពន្យល់ថា ការរិះគន់ស្ថាបនា គួរផ្តោតលើសកម្មភាព មានហេតុផល និងផ្តល់យោបល់សម្រាប់កែលម្អ ដោយមិនវាយប្រហារលើបុគ្គល។ ផ្ទុយទៅវិញ ការប្រើពាក្យជេរប្រមាថ ពាក្យអាសអាភាស ពាក្យមើលងាយ ឬការវាយប្រហារដែលមានគោលបំណងប៉ះពាល់ដល់កិត្តិយស និងកេរ្តិ៍ឈ្មោះអ្នកដទៃ អាចបង្កផលប៉ះពាល់ដល់សីលធម៌សង្គម និងសេចក្តីថ្លៃថ្នូររបស់អ្នករងគ្រោះ។
លោកស្រីបានលើកឡើងថា មាតិកាអសីលធម៌មួយចំនួនត្រូវបានបង្កើតឡើង ដើម្បីទាក់ទាញការមើល ការចូលចិត្ត ការចែករំលែក ឬផលប្រយោជន៍ពាណិជ្ជកម្ម។
ចំពោះជនរងគ្រោះពីការជេរប្រមាថតាមបណ្ដាញសង្គម លោកស្រីបានណែនាំឱ្យរក្សាទុកតំណភ្ជាប់ រូបថតអេក្រង់ និងព័ត៌មានពាក់ព័ន្ធនឹងមាតិកាដែលចង់រាយការណ៍។ ប្រជាពលរដ្ឋក៏គួរជៀសវាងការចែករំលែកមាតិកានោះបន្ត ព្រោះការចុច Like, Share ឬ Comment អាចធ្វើឱ្យមាតិកាអវិជ្ជមានកាន់តែរីករាលដាល។
ក្រុមការងារសីលធម៌មានសមាសភាពពីស្ថាប័នជាច្រើន
ក្រុមការងារសីលធម៌នេះ មានសមាសភាពមកពីក្រសួងប្រៃសណីយ៍ និងទូរគមនាគមន៍ ក្រសួងព័ត៌មាន ក្រសួងមហាផ្ទៃ ក្រសួងយុត្តិធម៌ ក្រសួងវប្បធម៌ និងវិចិត្រសិល្បៈ ព្រមទាំងលេខាធិការដ្ឋាននៃគណៈកម្មាធិការជាតិលើកកម្ពស់សីលធម៌សង្គម តម្លៃស្ត្រី និងគ្រួសារខ្មែរ។
ក្រុមការងារមានតួនាទីតាមដាន ចែករំលែកព័ត៌មាន សម្របសម្រួល និងឆ្លើយតបចំពោះបញ្ហាពាក់ព័ន្ធនឹងសីលធម៌សង្គម តម្លៃស្ត្រី និងគ្រួសារខ្មែរ។
តាមការបញ្ជាក់របស់ក្រសួង ការងារលើកកម្ពស់សីលធម៌សង្គមមិនមែនទើបតែចាប់ផ្តើមនៅពេលនេះទេ ប៉ុន្តែត្រូវបានអនុវត្តតាំងពីឆ្នាំ២០០៦មកម្ល៉េះ។
ក្រសួងក៏មានគោលដៅធ្វើការជាមួយអ្នកផលិតមាតិកា តាមរយៈការរៀបចំគោលការណ៍អំពីអ្វីដែលគួរធ្វើ និងមិនគួរធ្វើ ការអប់រំអំពីការផលិតមាតិកាដោយគោរពសីលធម៌ និងការលើកទឹកចិត្តដល់អ្នកផលិតមាតិកាដែលបង្កើតខ្លឹមសារវិជ្ជមាន។
គោលដៅដែលបានលើកឡើង គឺការរួមចំណែកបង្កើតបរិយាកាសឌីជីថលដែលមានសុវត្ថិភាព និងការទទួលខុសត្រូវកាន់តែខ្ពស់ ដោយកាត់បន្ថយមាតិកាជេរប្រមាថ មើលងាយ និងបន្ទាបតម្លៃអ្នកដទៃ ជាពិសេសស្ត្រី។
សរុបមក ការលុបវីដេអូ ឬការចេញមុខសុំទោស មិនមានន័យថាករណីមួយត្រូវបានបិទដោយស្វ័យប្រវត្តិនោះទេ ប្រសិនបើការពិនិត្យឃើញថាខ្លឹមសារនោះអាចពាក់ព័ន្ធនឹងបទល្មើស និងត្រូវបន្តតាមនីតិវិធីច្បាប់៕
