ព្រំ សំណាង ប្រកួតជាមួយ និង Dave Leduc បានត្រឹមស្មើពិន្ទុគ្នា

ភ្នំពេញ៖ ទោះបីមុនពេលប្រកួត អ្នកលេងគុនខ្មែរ ព្រំ សំណាង និងស្ដេចប្រដាល់ភូមា Dave Leduc លេងសំដីឆ្លងឆ្លើយគ្នា យ៉ាងណាក៏ដោយ តែលទ្ធផលនៃការប្រកួត នាយប់ថ្ងៃទី ៥ វិច្ឆិកា លទ្ធផលត្រឹមស្មើគ្នាប៉ុណ្ណោះ។

Dave Leduc ជាម្ចាស់ខ្សែក្រវាត់ Lethwei World Cup ចំពោះសំណាង វិញ មួយរយៈនេះ គេហាក់ដូចជាពុំធ្លាប់ស្មើ ឬបរាជ័យឡើយ ហេតុនេះហើយ ទើបធ្វើឲ្យគេមានជំនឿចិត្តខ្លាំង ក្នុងការយកឈ្នះ លើគូប្រកួតរបស់ខ្លួន។

សូមបញ្ជាក់ថា ជំនួបរវាងជើងខ្លាំងទាំងពីរ គឺប្រើពេល ១ទឹកប៉ុណ្ណោះ និងមានរយៈពេល ៩នាទី ដោយប្រើអំបោះឆៅ ជំនួសហ្គង់។ យ៉ាងណាមិញ បន្ទាប់ពីឆ្លងកាត់ការប្រកួត ដ៏ស្វិតស្វាញ ចៅក្រមនៃការប្រកួត បានសម្រេចផ្ដល់ពិន្ទុ ឲ្យអ្នកលេងគុនខ្មែរ ព្រំ សំណាង និងម្ចាស់ខ្សែក្រវាត់ Lethwei World Cup កីឡាករ Dave Leduc ស្មើគ្នា ចំពោះមុខអ្នកទស្សនិកជន រាប់សិបម៉ឺននាក់ ដែលចូលរួមទស្សនា ។

ចំណែកគូមិត្តភាពអន្ដរជាតិ ៥ គូទៀត អ្នកលេងពូថៅដៃ ធឿន ធារ៉ា បានផ្ដួលកីឡាករ ប្រេស៊ីល DANIELTORRES ឲ្យសន្លប់ត្រឹមទឹកទី២។ កីឡាករ រឿង សោភ័ណ្ឌ បានផ្ដួលកីឡាករអេស្ប៉ាញ MIKEL JESUA ឲ្យបោះបង់ការប្រកួតត្រឹមទឹកទី១ គ្រាដែលមិត្តរួមជាតិ ផល សោភ័ណ្ឌ បានផ្ដួលកីឡាករចិន LI TIANTAO ឲ្យបោះបង់ការប្រកួតត្រឹមទឹកទី២។

ឈុត សេរីវ៉ាន់ថង បានផ្ដួលអ្នកប្រដាល់រុស្ស៊ី MAZORIEV SHARIF ឲ្យបោះបង់ការប្រកួត ត្រឹមទឹកទី២ ដូចគ្នា ។ ចំណែកកីឡាករ បឺត សង្ឃឹម បានយកឈ្នះ កីឡាករកៀហ្ស៊ីស្ថាន Timur ដោយពិន្ទុ ៕