សារព័ត៌មានមហាខ្មែរ

ការធ្វើបាតុកម្មសុំដោះលែង លោក រ៉ុង ឈុន រាលដាលទៅដល់ខ្មែរនៅក្រៅប្រទេស

2

ពលរដ្ឋ​ខ្មែរ​នៅ​ក្រៅ​ប្រទេស​រាប់រយ​នាក់​បាន​ចាប់​ផ្តើម​ធ្វើ​បារតុកម្ម​ជា​ថ្មី​ទៀត​នៅ​ថ្ងៃអាទិត្យ​ម្សិលមិញ​នៅ ​ប្រទេស​កាណាដា​ ដោយ​ទាមទារ​ឲ្យ​តុលាការ​ខ្មែរ​ ទម្លាក់​ចោល​ការ​ចោទ​ប្រកាន់ ​ ហើយ​ដោះលែង​លោក​ រ៉ុង​ ឈុន​ និង​ អ្នកគាំទ្រ​ផ្សេង​ទៀត​ដែលកំពុង​ជាប់​ឃុំ​ទាក់​ទង​រឿង​ព្រំដែន។ នេះ​គឺ​ជា​បាតុកម្ម​លើក​ទី​១​សម្រាប់​ពលរដ្ឋ​ខ្មែរ​នៅ​ក្រៅ​ប្រទេស​ក្នុង​ករណី​លោក​ រ៉ុង​ឈុន ខណៈ​នៅ​ក្នុង​ស្រុក​​វិញ ​អ្នកគាំទ្រ​បាន​ធ្វើការ​តវ៉ា​ស្ទើរ​រាល់ថ្ងៃ​តាំង​ពី​ក្រោយ​ពេល​ចាប់ខ្លួន​ ហើយ​ពួកគេ​ក៏​គ្រោង​ធ្វើ​បាតុកម្ម​រយៈពេល​៩​ថ្ងៃ​ជាប់ៗ​គ្នា​នៅ​ទីលាន​ប្រជាធិបតេយ្យ​នៅ​សប្តាហ៍​ក្រោយ​នេះ​ទៀត​។

ការធ្វើបាតុកម្មដែលមានការចូលរួមពីពលរដ្ឋខ្មែរ និង​ព្រះសង្ឃផង នៅទីក្រុង​ Montreal ប្រទេសកាណាដានៅថ្ងៃទី៣០សីហា២០២០នោះ គឺដឹកនាំដោយលោក សោ ចាន់ដេត អតីតតំណាងរាស្ត្រនៃអតីតគណបក្សសង្រ្គោះជាតិ។ ចំណែក​បាតុកម្ម​ដែល​គ្រោង​ធ្វើ​ឡើង​រយៈ​ពេល​៩​ថ្ងៃចាប់ពីថ្ងៃទី៧ ដល់ថ្ងៃ១៥ ខែកញ្ញាខាងមុខ​នៅទីលានប្រជាធិបតេយ្យក្នុងទីក្រុងភ្នំពេញនោះ គឺដឹកនាំដោយក្រុមយុវជនខ្មែរថាវរៈ។

បាតុកម្មទាំងក្នុង និងក្រៅប្រទេស ជាបន្តបន្ទាប់នេះ ដើម្បីទាមទារដោះលែង លោក រ៉ុង ឈុន និងអ្នកគាំទ្រលោក៤នាក់ទៀត ក្រោយពីសមត្ថកិច្ចចាប់ខ្លួនពាក់ព័ន្ធរឿងព្រំដែន។ នេះបើតាម​លិខិត​ជូន​ដំណឹង​ទៅកាន់សាលារាជធានីភ្នំពេញ។

សម្រាប់អ្នកនាំពាក្យសាលារាជធានីភ្នំពេញ ការ​ធ្វើ​បាតុកម្ម​គឺជាសិទ្ធិរបស់​ពលរដ្ឋ ប៉ុន្តែត្រូវ​ធ្វើឡើងឲ្យស្របទៅតាមច្បាប់។ តែយ៉ាងណាក៏ដោយ​អាជ្ញាធរនៅមិនទាន់​សម្រេចថា​ឲ្យធ្វើបាតុកម្មទៅ​តាម​ផែន​ការ​ឬក៏អត់នោះទេ។

សូមជម្រាបថា ក្រៅពីលោក រ៉ុង ឈុន គឺមានអ្នកគាំទ្រ៤នាក់ទៀត​ដែល​ត្រូវបាន​ចាប់ខ្លួនជាបន្តបន្ទាប់គឺមានកញ្ញា ឈឿន ដារ៉ាវី លោក ហ៊ុន វណ្ណៈ កញ្ញា ស កន្និកា និង លោក សួង សោភ័ណ្ឌ ប្រធានគណបក្សខ្មែរឈ្នះ។ ការចាប់ខ្លួន លោក រ៉ុង ឈុន នៅយប់​ថ្ងៃទី៣១ ខែកក្កដា គឺក្រោយ​ពេល​ដែលលោក​ថ្លែង​ពាក់ព័ន្ធ​នឹង​បញ្ហា​ព្រំដែន​នៅខេត្តត្បូងឃ្មុំ។

បញ្ហាព្រំដែន​នៅខេត្ត​ត្បូង​ឃ្មុំ​នេះ កាលពីថ្ងៃទី២៥សីហា លោក​នាយក​រដ្ឋមន្រ្តី​ ហ៊ុន សែន​ ក៏​បញ្ជា​ឲ្យ​លោក​ វ៉ា គឹមហុង​ ប្រធាន​គណៈ​កម្មាធិការ​ចម្រុះ​កិច្ចការ​ព្រំដែន ​ចុះ​ជួប​ប្រជា​ពលរដ្ឋ​ជាក់ស្តែង ​ដែល​អះអាង​ថា​ បាត់​បង់​ដីស្រែ ដោយ​សារ​តែការ​បោះ​បង្គោល​ព្រំដែននោះ។ បន្ថែមពីនេះ លោកប្រមុខ​រដ្ឋាភិបាល​បានប្រកាសតាមរយៈហ្វេសប៊ុកថា នឹង​បើក​សិក្ខាសាលា​មួយ​ដើម្បី​ឲ្យ​ប្រជា​ពលរដ្ឋ​ សិស្ស ​និស្សិត​ចូល​ស្តាប់ ​និង​សួរ​អំពី​រឿង​ព្រំដែននេះផងដែរ៕​

អត្ថបទទាក់ទង