រដ្ឋាភិបាលថៃគ្រោងបញ្ចេញកម្ចីអនុគ្រោះ ជិត ៣,២ពាន់លានដុល្លារ ដើម្បីជួយវិស័យទេសចរណ៍និងសេវាកម្ម
រដ្ឋាភិបាលប្រទេសថៃគ្រោងថវិកាកម្ចីអនុគ្រោះមួយកញ្ចប់ថ្មីទៀត ដែលមានទឹកប្រាក់ជិត ៣,២ពាន់លានដុល្លារអាមេរិក ដើម្បីជួយដល់សហគ្រាសខ្នាតតូចនិងមធ្យម នៅក្នុងវិស័យទេសចរណ៍ និងសេវាកម្ម ដែលរងគ្រោះដោយសារវីរុសកូវីដ១៩។ នេះបើយោងតាមសារព័ត៌មានក្នុងស្រុកថៃ ដែលដកស្រង់សម្ដីរដ្ឋមន្ត្រីហិរញ្ញវត្ថុ ។
កម្ចីនេះនឹងផ្ដល់នូវលក្ខខណ្ឌធូរស្រាលជាងកម្មវិធីកម្ចីអនុគ្រោះ ៥០០ប៊ីលានបាត របស់ធនាគារកណ្ដាល ។
រដ្ឋមន្ត្រីហិរញ្ញវត្ថុថៃ លោក អ៊ុតតាម៉ា សាវ៉ាណាយ៉ាណា បានប្រាប់អ្នកសារព័ត៌មានថា “កម្ចីអនុគ្រោះនេះនឹងជួយកាត់បន្ថយការចំណាយរបស់ប្រតិបត្តិករវិស័យទេសចរណ៍និងសេវាកម្ម និងផ្ដល់នូវសាច់ប្រាក់ដល់ពួកគេដើម្បីរក្សាការងារបុគ្គលិកនៅក្នុងវិស័យនេះ ។ ហើយកញ្ចប់កម្ចីនេះនឹងបញ្ចេញក្នុងពេលឆាប់ៗខាងមុខ ។”
កញ្ចប់កម្ចីនេះ នឹងត្រូវផ្ដល់ដោយធនាគារសន្សំរបស់រដ្ឋាភិបាល (Government Savings Bank) ហើយនឹងអនុវត្តតាមវិធានការសង្គ្រោះនានាសម្រាប់សហគ្រាសតូចនិងមធ្យម ដែលផ្ដល់ការងារដល់ប្រមាណ ៨០% នៃកម្លាំងពលកម្មសរុបរបស់ប្រទេសថៃ ។
វីរុសកូវីដ១៩ បានជះឥទ្ធិពលអវិជ្ជមានយ៉ាងធ្ងន់ធ្ងរទៅលើសេដ្ឋកិច្ចរបស់ប្រទេសថៃ ជាពិសេស វិស័យទេសចរណ៍ ដោយសារតែការបិទច្រកព្រំដែន និងការបិទការហោះហើរអន្តរជាតិ ។ ហើយឆ្នាំ២០២០នេះ ចំនួនភ្ញៀវទេសចរអន្តរជាតិ ត្រូវធនាគារកណ្ដាលថៃព្យាករថា នឹងធ្លាក់ចុះដល់ទៅ ៨០% ៕
