លោក សម រង្ស៊ី ប្រកាសវិលចូលស្រុកសារជាថ្មីតែមិនកំណត់ថ្ងៃជាក់លាក់
លោក សម រង្ស៊ី អតីតប្រមុខដឹកនាំគណបក្សប្រឆាំងបានប្រកាសជាថ្មីទៀតអំពីផែនការធ្វើមាតុភូមិនិវត្តន៍មកកម្ពុជាវិញនៅពេលខាងមុខ ប៉ុន្តែលោកមិនទាន់បានកំណត់ថ្ងៃជាក់លាក់នៅឡើយ។ ការប្រកាសវិលចូលស្រុកសារជាថ្មីទៀតនេះ គឺបន្ទាប់ពីផែនការមាតុភូមិនិវត្តន៍របស់ លោក សម រង្ស៊ី កាលពីថ្ងៃទី៩វិច្ឆិកាឆ្នាំ២០១៩ត្រូវបានខកខាន។
«ខ្ញុំចង់និយាយពីមាតុភូមិនិវត្តន៍របស់ខ្ញុំ ពីព្រោះខ្ញុំក៏បានឃើញសាររបស់បងប្អូនថា ចាំតែ សម រង្ស៊ី ចាំតែលោកប្រធាន មកទេ ប្រជារាស្ត្រនឹងងើបហើយ ពីព្រោះតែងើបយូរហើយចាំតែឱកាសមកដល់! ខ្ញុំមានកិត្តិយសជម្រាបបងប្អូនថ្ងៃនេះថា ខ្ញុំនឹងវិលត្រឡប់ទៅប្រទេសកម្ពុជាក្នុងពេលឆាប់ៗខាងមុខនេះ។ ប៉ុន្តែខ្ញុំអត់ប្រាប់មុនទេ គឺទៅដល់តែម្តង! សូមបងប្អូនត្រៀមខ្លួនទៅ!…»។ នេះគឺជាការថ្លែងរបស់ លោក សម រង្ស៊ី នៅថ្ងៃទី២០កញ្ញា២០២០ ដែលអះអាងថា លោកប្តេជ្ញាវិលត្រឡប់ មកប្រទេសកម្ពុជាវិញឲ្យទាល់តែបាននៅពេលខាងមុខ តែមិនប្រកាសពីពេលវេលាជាក់លាក់។
បើទោះបីជាត្រូវបានខកខានវិលចូលស្រុកកាលពីថ្ងៃទី៩វិច្ឆិកា២០១៩ក៏ដោយ តែអតីតប្រមុខបក្សប្រឆាំងរូបនេះ នៅតែប្រកាសពីភាពជោគជ័យរបស់ខ្លួន នូវផែនការធ្វើមាតុភូមិនិវត្តន៍កាលណោះ។ ជោគជ័យសម្រាប់លោក សម រង្ស៊ី កាលណោះ គឺបានធ្វើឲ្យដំណឹងនោះបានលាន់ឮយ៉ាងកងរំពងពាសពេញពិភពលោកតាមរយៈការចុះផ្សាយរបស់សារព័ត៌មានល្បីៗ។
ប៉ុន្តែលោក សុខ ឥសាន អ្នកនាំពាក្យគណបក្សកាន់អំណាចមិនជឿថា លោក សម រង្ស៊ី ហ៊ានវិលត្រឡប់មកកម្ពុជាវិញឡើយ ហើយថារដ្ឋាភិបាលភិបាលក៏មិនចាំបាច់ត្រៀមកម្លាំងប្រដាប់អាវុធដើម្បីចាប់ខ្លួនដូចលើកមុននោះឡើយ។
សូមរំឭកថា កាលពីថ្ងៃទី៩វិច្ឆិកាឆ្នាំមុន កងកម្លាំងប្រដាប់អាវុធរាបរយនាក់ត្រូវបានដាក់ពង្រាយនៅព្រំដែនខេត្តបន្ទាយមានជ័យ ខណៈដែលលោក សម រង្ស៊ី ប្រកាសធ្វើដំណើរដោយថ្មើជើងតាមទឹកដីថៃចូលមកម្ពុជា។ ប៉ុន្តែនាយករដ្ឋមន្ត្រីថៃ ប្រាយុទ្ធ ចាន់អូចា បានដាក់បញ្ជាក្រុមហ៊ុនយន្តហោះមិនឲ្យដឹកលោក សម រង្ស៊ី ឆ្លងកាត់ប្រទេសថៃនោះទេ៕
