អង្គការសង្គមស៊ីវិល១១៦ និងសម្ព័ន្ធអ្នកសារព័ត៌មានកម្ពុជាសរសេរលិខិតស្នើសុំឲ្យប្រទេសស៊ុយអែតបន្តវត្តមានស្ថានទូតនៅកម្ពុជា
ក្រុមអង្គការសង្គមស៊ីវិលជាតិនិងអន្តរជាតិចំនួន១១៦ស្ថាប័ន ក្នុងនោះក៏មានសម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា បានសរសេរលិខិតទៅកាន់រដ្ឋមន្ត្រីក្រសួងការបរទេសស៊ុយអែត លោកស្រី Ann Linde អោយពិចារណាឡើងវិញចំពោះការបិទស្ថានទូតនៅក្នុងប្រទេសកម្ពុជា។
គួររំលឹកជូនថា ក្រសួងកាបរទេសស៊ុយអែតបានប្រកាសកាលពីខែវិច្ឆិកាថា ស្ថានទូតរបស់ខ្លួនប្រចាំនៅទីក្រុងភ្នំពេញនឹងត្រូវបិទទ្វារ នៅដំណាច់ឆ្នាំ២០២១ ដោយផ្លាស់ទៅកាន់ទីក្រុងបាងកកប្រទេសថៃវិញ។
«សូមកុំបោះបង់ចោល ដំណើរការអភិវឌ្ឍន៍លទ្ធិប្រជាធិបតេយ្យ និងសិទ្ធិមនុស្សពីប្រទេសកម្ពុជា»។ នេះគឺជាពាក្យទទូចអង្វររបស់ក្រុមអង្គការសង្គមស៊ីវិលជាតិនិងអន្តរជាតិចំនួន១១៦ ដែលបានសរសេរលិខិតរួមគ្នាមួយ ផ្ញើទៅកាន់រដ្ឋមន្ត្រីក្រសួងការបរទេសស៊ុយអែតប្រចាំនៅទីក្រុង Stockholm លោកស្រី Ann Linde។
លិខិតនេះ បានផ្ញើទៅកាលពីថ្ងៃទី ១៨ ធ្នូ ប៉ុន្តែទើបតែបានផ្សព្វផ្សាយដល់បណ្តាញសារព័ត៌មាននៅថ្ងៃទី ២៥ ធ្នូ។
តាមរយៈលិខិតដែលមានភ្ជាប់នូវបញ្ជីឈ្មោះរបស់ក្រុមអង្គការសង្គមស៊ីវិលទាំង១១៦នេះ បានស្នើសុំឲ្យលោកស្រីរដ្ឋមន្ត្រីការបរទេសស៊ុយអែត ពិចារណាឡើងវិញចំពោះសេចក្តីសម្រេចរបស់ខ្លួន កាលពីថ្ងៃទី ២៦ វិច្ឆិកា។
នៅក្នុងលិខិតរបស់ក្រុមអង្គការសង្គមស៊ីវិល ដែលក្នុងនោះរួមមានអង្គការធំៗដូចជា អង្គការ ActionAid Cambodia, Action for Health Development, វិទ្យាស្ថានតស៊ូមតិនិងគោលនយោបាយ សម្ព័ន្ធអ្នកសារព័ត៌មានកម្ពុជាហៅកាត់ថា ខេមបូចា រួមជាមួយអង្គការសង្គមស៊ីវិល និងសហជីព ជាច្រើនស្ថាប័នទៀត បានសរសេរថា៖ «បទពិសោធន៍កន្លងមកបានបង្រៀនយើងថា ការដាក់ឲ្យប្រទេសកម្ពុជានៅឯកោនៅពេលនេះមានន័យថា គឺជាការដើរជាន់លើដានចាស់ពីអតីតកាល»។
លិខិតនេះ បានទទូចអោយលោកស្រីរដ្ឋមន្ត្រីការបរទេសស៊ុយអែត កុំបោះបង់ចោលការរីកចម្រើនដែលខ្លួនបានធ្វើ នៅក្នុងការអភិវឌ្ឍន៍តាមបែបប្រជាធិបតេយ្យនៅកម្ពុជានេះឡើយ។
គួរជំរាបជូនថា កាលពីថ្ងៃទី ២៦ វិច្ឆិកា ក្រសួងការបរទេសស៊ុយអែតបានអះអាងថា ខ្លួននឹងបិទស្ថានទូតរបស់ខ្លួនប្រចាំនៅក្នុងទីក្រុងភ្នំពេញនៅដំណាច់ឆ្នាំ២០២១ខាងមុខ ហើយនឹងផ្លាស់ទៅកាន់ទីក្រុងបាងកកប្រទេសថៃវិញ។ ប៉ុន្តែសេចក្តីថ្លែងការណ៍នោះបានបន្ថែមថា ទីភ្នាក់ងារសហប្រតិបត្តិការអភិវឌ្ឍន៍អន្តរជាតិស៊ុយអែត នឹងបន្តធ្វើការងាររបស់ខ្លួននៅក្នុងប្រទេសកម្ពុជា។ ហើយថាខ្លួននឹងស្វែងរក «មធ្យោបាយថ្មី» ដើម្បីបន្តទំនាក់ទំនងជាមួយប្រទេសកម្ពុជា។
យ៉ាងណាក្តី លោក កុយ គួង រដ្ឋលេខាធិការនិងជាអ្នកនាំពាក្យក្រសួងការបរទេសកម្ពុជា ធ្លាប់បានមានប្រសាសន៍ប្រាប់បណ្តាញផ្សព្វផ្សាយព័ត៌មានកម្ពុជាថា ការសម្រេចចិត្តនេះ គឺជាបញ្ហាផ្ទៃក្នុងរបស់ប្រទេសស៊ុយអែត។
សូមបញ្ជាក់ថា កម្ពុជាមានទំនាក់ទំនងការទូតជាមួយប្រទេសស៊ុយអែតតាំងពីនៅឆ្នាំ១៩៦១មកម៉្លេះ ប៉ុន្តែទើបរហូតដល់ឆ្នាំ២០១០ប្រទេសនៅតំបន់អឺរ៉ុបមួយនេះ ទើបតែបានដាក់ស្ថានទូតរបស់ខ្លួននៅកម្ពុជាប៉ុណ្ណោះ។
នៅក្នុងរយៈពេល១០ឆ្នាំមកនេះ ស៊ុយអែតដែលជាសមាជិករបស់សហភាពអឺរ៉ុបបានគូសបញ្ជាក់ថា ខ្លួនបានរួមចំណែកយ៉ាងសកម្ម ក្នុងការសម្របសម្រួលបញ្ហានយោបាយ កិច្ចសហប្រតិបត្តិការអភិវឌ្ឍន៍ គោលនយោបាយពាណិជ្ជកម្ម និងវប្បធម៌ នៅក្នុងប្រទេសកម្ពុជា។
ប៉ុន្តែកាលពីខែមិថុនាកន្លងទៅ ប្រទេសស៊ុយអែត បានប្រកាសសម្រេចបង្វែរជំនួយសហប្រតិបត្តិការអភិវឌ្ឍន៍ទាំងអស់ពីរដ្ឋាភិបាលកម្ពុជា ដោយបង្វែរទៅផ្តល់ជំនួយលើការគាំទ្រការគោរពសិទ្ធិមនុស្ស និងលទ្ធិប្រជាធិបតេយ្យវិញ ដោយសំអាងថា លំហប្រជាធិបតេយ្យនៅកម្ពុជានាប៉ុន្មានឆ្នាំមកនេះ មានការរឹតត្បិតយ៉ាងធ្ងន់ធ្ងរ៕ ប្រភព៖ RFI
