សារព័ត៌មានមហាខ្មែរ

លោក ហ៊ុន សែន៖សំណុំរឿងលោក កឹម សុខា អាចនឹងពន្យារពេលដល់ឆ្នាំ២០២៤

1

នៅ​ក្នុង​កិច្ចប្រជុំ​គណៈរដ្ឋមន្ត្រី​កាលពី​ថ្ងៃ​សុក្រ​ចុង​ស​ប្តា​ហ៍​មុន​នេះ លោកនាយក​រដ្ឋមន្ត្រី ហ៊ុន សែន បាន​ថ្លែង​ថា សំណុំរឿង​របស់​លោក កឹ​ម សុខា អាច​ពន្យារពេល​រហូត​ដល់​៤​ឆ្នាំ គឺ​មាន​ន័យ​ថា​រហូត​ដល់​ឆ្នាំ​២០២៤ ។​

​បើ​តាម​កាសែត​ខ្មែរ​ថា​ម​ស៍​(Khmer Times) បាន​ស្រង់​ការ​ថ្លែង​របស់​លោក​ប្រមុខ​រាជរដ្ឋាភិបាល​ដោយ​បញ្ជាក់​ថា លោក​កឹ​ម សុខា បាន​ស្នើ​ឲ្យ​ព​ន្លឿ​ន​ការ​កាត់ក្តី​រូប​លោក​ក្នុង​ឱកាស​ដែល​លោក​បាន​ទៅ​ចូលរួម​ពិធី​បុណ្យសព​ម្តាយក្មេក​របស់​លោកនាយក​រដ្ឋមន្ត្រី ប៉ុន្តែ​លោក ហ៊ុន សែន ថា​វា​អាស្រ័យ​លើ​តុលាការ​។​

​លោក​ផៃ ស៊ី​ផា​ន អ្នកនាំពាក្យ​រដ្ឋាភិបាល​ដែល​បាន​ចូលរួម​កិច្ចប្រជុំ​គណៈរដ្ឋមន្ត្រី​ដែរ​នោះ​ដែរ ប្រាប់ VOA នៅ​ថ្ងៃ​អង្គារ​នេះ​ថា ការ​ថ្លែង​របស់​លោកនាយក​រដ្ឋមន្ត្រី​ជា​ការ​ព្យាករណ៍​តែ​ប៉ុណ្ណោះ តាម​រយៈ​ការ​សាកសួរ​អ្នក​ច្បាប់ ហើយ​លោក​ថា មិនមែន​ជា​ការ​បង្គាប់បញ្ជា​ទៅ​តុលាការ​នោះ​ទេ​។ លោក​ចាត់​ទុក​ករណី​លោក​កឹ​ម សុខា «​ស្មុគស្មាញ​»​និង​«​ត្រូវការ​ពេលវេលា​យូរ​ដើម្បី​រក​ភស្តុ​តាង​»​។​

​លោក​ផៃ ស៊ី​ផា​ន​មាន​ប្រសាសន៍​ថា​៖ «​ជា​ដែន​សមត្ថកិច្ច​របស់​តុលាការ​ហើយ​លោក​(​នាយក​រដ្ឋមន្ត្រី​)​សួរ​ទៅ​ខាង​តុលាការ សួរ អ្នកជំនាញ​ច្បាប់ ពីព្រោះ​ករណី​ឧក្រិដ្ឋកម្ម​អ៊ីចឹង វា​ត្រូវការ​ប្រើ​ពេល​យូរ​ក្នុង​ការ​ស្វែងរក​ផលប្រយោជន៍​ជូន​ជនជាប់ចោទ​(​លោក​កឹ​ម សុខា​)»​។​

​លោក​បន្ថែម​ថា​៖ «​លោក​(​ហ៊ុន សែន​) គ្មាន​សិទ្ធិ​ណា​ទៅ​សម្រេច​ទៅ​លើ​ការ​សម្រេចចិត្ត​របស់​តុលាការ​ទេ ពីព្រោះ​តុលាការ​ធ្វើ​ទៅ​តាម​អង្គហេតុ​និង​អង្គច្បាប់ ឈរ​ទៅ​លើ​ករណី​ជាក់ស្តែង​រឿង​ភស្តុ​តាង​»​។​

​លោក​កឹ​ម សុខា ដែល​មាន​វ័យ​៦៦​ឆ្នាំ ត្រូវ​បាន​សមត្ថកិច្ច​ចាប់ខ្លួន នៅ​យប់​ថ្ងៃ​ទី​០២ ឆ្លង​ចូល​ថ្ងៃ​ទី​៣ កញ្ញា ២០១៧ ដោយ​សមត្ថកិច្ច​ចោទ​លោក​ពី​បទ​ពាក់ព័ន្ធ​នឹង​ការ​ប្រព្រឹត្ត​អំពើ «​ស​ន្ទិ​ដ្ឋិ​ភាព​ជាមួយ​បរទេស​» ឬ​បទ​ក្បត់ជាតិ ដោយ​លោក​ត្រូវ​បាន​ចោទប្រកាន់​ថា បាន​ឃុបឃិត​ជាមួយ​បរទេស​ក្នុង​បំណង​ផ្តួលរំលំ​រាជរដ្ឋាភិបាល ស្របច្បាប់ ដែល​ដឹកនាំ​ដោយ​លោកនាយក​រដ្ឋមន្ត្រី ហ៊ុន សែន​។​

​ក្រោយ​ការ​ចាប់ខ្លួន លោក កឹ​ម សុខា ត្រូវ​បាន​បញ្ជូន​ទៅ​ឃុំខ្លួន នៅ​ក្នុង​ពន្ធនាគារ ត្រពាំង​ផ្លុ​ង ក្នុង​ខេត្ត​ត្បូងឃ្មុំ ជាប់​ព្រំដែន​វៀតណាម​។ រហូត​ដល់​យប់​ថ្ងៃ​ទី​០៩ ឆ្លង​ចូល​ថ្ងៃ​ទី​១០ កញ្ញា ២០១៨ ទើប​តុលាការ ដាក់​ឲ្យ​លោក កឹ​ម សុខា ស្ថិត​នៅ​ក្រោម​ការ​ត្រួតពិនិត្យ​របស់ តុលាការ ដោយ​ផ្ទេរ​ការ​ឃុំខ្លួន ពី​ពន្ធនាគារ មក​នៅ​ក្នុងផ្ទះ​របស់​លោក ក្នុង​ខណ្ឌទួលគោក រាជធានី​ភ្នំពេញ​។​

​នៅ​ថ្ងៃ​ទី​១០ វិច្ឆិកា ២០១៩ សាលាដំបូង​រាជធានី​ភ្នំពេញ បាន​បន្ធូរបន្ថយ​លក្ខខណ្ឌ​នៃ​ការ​ឃុំខ្លួន​លោក​កឹ​ម​សុខា ដោយ​អនុញ្ញាត​ឲ្យ​លោក អាច​ធ្វើ​ដំណើរ​ទៅ​គ្រប់​ទិស​ទី នៅ​ក្នុង​ទឹកដី​កម្ពុជា ព្រមទាំង​អាច​ជួប​ទូត​បរទេស តែ​លោក កឹ​ម សុខា នៅ​បន្ត​ជាប់​បម្រាម មិន​អាច​ធ្វើ​នយោបាយ​បាន​នោះ​ទេ​។​

​មាត្រា ៤៤៣ នៃ​ក្រមព្រហ្មទណ្ឌ បាន​ចែង​ថា «​បទ​ស​ន្ទិ​ដ្ឋិ​ភាព​ជាមួយ​បរទេស គឺជា​អំពើ​ត្រូវ រ៉ូ​វ​គ្នា ដោយ​សម្ងាត់​ជាមួយ​រដ្ឋ​បរទេស ឬ​ភ្នាក់ងារ​បរទេស ដើម្បី​បង្កើត​ឲ្យ​មាន​អំពើ​ប្រទូស្ត​រ៉ា​យ ឬ​ឲ្យ​មាន​អំពើ​ឈ្លានពាន​ប្រឆាំង​នឹង​ព្រះរាជាណាចក្រ​កម្ពុជា​។ បទ​ស​ន្ទិ​ដ្ឋិ​ភាព​ជាមួយ​បរទេស ត្រូវ​ផ្តន្ទាទោស​ដាក់​ពន្ធនាគារ​ពី ១៥ ទៅ ៣០​ឆ្នាំ​»​។​

​លោក កឹ​ម សុខា ដែល​ត្រូវ​បាន​ដាក់​ឲ្យ​នៅ​ក្រៅ​មន្ទីរឃុំឃាំង និង​លើកលែង​ការ​ឃុំ​នៅផ្ទះ​នោះ ត្រូវ​បាន​គេ​ឃើញ​ថា បាន​ចេញដំណើរ​ទៅ​ទស្សនកិច្ច​នៅ​តាម​ខេត្ត​ជុំវិញ​បឹង​ទន្លេសាប និង​បណ្ដា​ខេត្ត​ផ្សេង​ទៀត ដូច​ជា​ខេត្តកំពង់ចាម និង​ត្បូងឃ្មុំ​ជាដើម ទោះបី​លោក​ត្រូវ​តុលាការ​ព្រមាន​ដាស់តឿន​ក្រើនរំឭក​ពី​លក្ខខណ្ឌ​តម្រូវ​នៃ​នីតិវិធី​ឃ្លាំមើល​របស់​តុលាការ​យ៉ាងណា​ក្តី​៕

អត្ថបទទាក់ទង