ពលករខ្មែរកំពុងសម្រុកចូលស្រុកកំណើត តាមច្រកអន្តរជាតិអូរស្មាច់ បន្ទាប់ពីថៃផ្ទុះរាលដាលនូវជំងឺកូវីដ-១៩នៅ ខេត្តសាមុតសាខន
ឧត្តរមានជ័យ៖ យោងតាមសេចក្ដីរាយការណ៍ព័ត៌មានឲ្យដឹងថា នៅព្រឹកថ្ងៃទី២១ ខែធ្នូ ឆ្នាំ២០២០នេះ
ក្រុមពលករខ្មែរកំពុងសម្រុកចូលជាបន្តបន្ទាប់មកប្រទេសកំណើតវិញតាមច្រកអន្តរជាតិអូរស្មាច់ ខេត្តឧត្តរមានជ័យ
បន្ទាប់ពីមានការផ្ទុះរាលដាលនូវជំងឺកូវីដ-១៩ នៅក្នុងខេត្តសាមុតសាខន ប្រទេសថ្ងៃចន្លោះថ្ងៃទី១៩ និង ២០ ខែធ្នូ ឆ្នាំ២០២០។
ចំណែករថយន្តយោធាដែលសម្ដេចតេជោ ហ៊ុន សែន ប្រមុខរាជរដ្ឋាភិបាលកម្ពុជា បានបញ្ជាឲ្យមករង់ចាំដឹកក្រុមពលរដ្ឋទាំងនេះ ជិតទៅដល់គោលដៅហើយ។
សូមជម្រាបថា សម្តេចតេជោ ហ៊ុន សែន នាយករដ្ឋមន្រ្តីនៃកម្ពុជា បានដាក់បទបញ្ជាទៅអាជ្ញាធរខេត្តចំនួន៧ ដែលនៅជាប់ព្រំដែនកម្ពុជា-ថៃ ឲ្យពង្រឹងការធ្វើចត្តាឡីស័កសម្រាប់ពលករខ្មែរដែលត្រលប់មកប្រទេសថៃ រយៈពេល១៤ថ្ងៃពេញ ដើម្បីទប់ស្កាត់ការចម្លងជំងឺកូវីដ-១៩ ដែលកំពុងផ្ទុះឡើងយ៉ាងខ្លាំងក្លា
ជាង៥០០ករណីក្នុង១ថ្ងៃ នៅខេត្តសាមុតសាខន ប្រទេសថៃ។ ខេត្តទាំង៧ ដែលជាប់ព្រំដែនថៃនោះ រួមមានខេត្តបាត់ដំបង បន្ទាយមានជ័យ ប៉ៃលិន ព្រះវិហារ ឧត្តរមានជ័យ ពោធិ៍សាត់ និងកោះកុង៕
