ចូលរួមត្រេកអរ!!! ទីបំផុត វ៉ាក់សាំង ប្រឆាំងជំងឺកូវីដ១៩ អាចនិងមកដល់កម្ពុជា នាខែ……
ភ្នំពេញ ៖ ប្រធានអង្គការសុខភាពពិភពលោក (WHO) ប្រចាំនៅកម្ពុជាបាននិយាយថា ប្រទេសកម្ពុជាអាចនឹងទទួលថ្នាំវ៉ាក់សាំងប្រឆាំងវីរុសកូវីដ ១៩ សម្រាប់ការដឹកជញ្ជួនលើកទី១ មកកម្ពុជានាខែមីនា ឆ្នាំ ២០២១ ចាត់ទុកថានេះគឺជាតំណឹងល្អមួយបន្ថែមទៀតសម្រាប់កម្ពុជា ។
លោកស្រីវេជ្ជបណ្ឌិត Li Ailan ប្រធានអង្គការសុខភាពពិភពលោកត្រូវបានស្រង់សម្តីដោយ សារព័ត៌មានសម្លេងសហរដ្ឋអាមេរិក (VOA) ថា សម្រាប់វ៉ាក់សាំងកូវីដ១៩ ដំបូងបង្អស់ប្រទេសកម្ពុជាអាចទទួលបានវ៉ាក់សាំងនោះ គឺនៅខែមីនាឆ្នាំ ២០២១ ដ៏ខ្លីខាងមុខនេះ ពីព្រោះក្រុមហ៊ុនឱសថទើបតែទទួលបានការយល់ព្រមពីនិយតករវេជ្ជសាស្ត្រដើម្បីផលិតវ៉ាក់សាំងក្នុងបរិមាណច្រើន ។
ទោះយ៉ាងណាក្តីលោកស្រីបានបញ្ជាក់ថា «ទោះបីជាមានវ៉ាក់សាំងមានប្រសិទ្ធភាពយ៉ាងណា ក៏វាមិនអាចឈ្នះកូវីដ១៩ភ្លាមៗនោះដែរ ។ បុគ្គលម្នាក់ៗនិងរដ្ឋជាទូទៅទាមទារឲ្យបន្តប្រុងប្រយ័ត្ន និងចាត់វិធានការអនាម័យឲ្យបានខ្ជាប់ខ្ជួន» ។
សូមជម្រាបថា គិតត្រឹមម៉ោង៧ព្រឹកថ្ងៃទី០៩ ខែធ្នូនេះ កម្ពុជាបានរកឃើញអ្នកឆ្លងកូវីដ១៩សរុបចំនួន ៣៥៤នាក់ ក្នុងនោះអ្នកជាសះស្បើយចំនួន ៣០៧នាក់ និងអ្នកកំពុងសម្រាកនៅមន្ទីរពេទ្យចំនួន ៤៧នាក់៕