ការប្រឡងបាក់ឌុប!!! ជាប់ដោយស្វ័យប្រវត្តិ បូកពិន្ទុឆមាសចូលគ្នា ឬប្រលងតាមសាលា មួយណាជាជម្រើសល្អ ក្នុងស្ថានភាពនាពេលបច្ចុប្បន្ននេះ?
ឥទ្ធិពលនៃកូវីដ១៩ ធ្វើឲ្យការប្រលងសញ្ញាបត្រមធ្យមសិក្សាទុតិយភូមិ(បាក់ឌុប)នៅឆ្នាំនេះ ត្រូវបានលើកពេលម្តងហើយម្តងទៀត ហើយចុងក្រោយនេះ ត្រូវលើកទៅពាក់កណ្តាលខែមករាឆ្នាំ២០២១ ខណៈរៀងរាល់ឆ្នាំការប្រលងបាក់ឌុបត្រូវធ្វើយ៉ាងទៀងទាត់នៅអំឡុងខែសីហា។
ដោយមិនអាចទ្រំទ្រនូវស្ថានភាពបែបនេះបាន សមាគមគ្រឹះស្ថានឧត្តមសិក្សាកម្ពុជា ដែលកំពុងរង់ចាំស្វាគមន៍សិស្សជាប់បាក់ឌុបចូលទៅបន្តការសិក្សានៅតាមគ្រឹះស្ថានរបស់ពួកគេរៀងៗខ្លួននោះ កាលពីពេលថ្មីៗនេះ បានលើកជាសំណើរមួយទៅក្រសួងអប់រំដោយមាន២ចំណុច គឺទី១ស្នើសុំឲ្យសិស្សថ្នាក់ទី១២ជាប់ជាស្វ័យប្រវត្តិ ឬមួយទៀតយកពិន្ទុមធ្យមភាគនៃការប្រលងឆមាសថ្នាក់ទី១២ ដើម្បីកំណត់ជាប់ឬធ្លាក់។
ក៏ប៉ុន្តែអ្វីៗស្ថិតនៅជាសេនារីយោនៅឡើយ ថាតើមានដំណោះស្រាយយ៉ាងណា ក្នុងករណីការប្រលងបាក់ឌុបនៅថ្ងៃខាងមុខ នៅតែមិនអាចធ្វើទៅបាន។
សមាគមគ្រឹះស្ថានឧត្តមសិក្សាកម្ពុជានៅព្រឹកថ្ងៃទី៨ ខែឆ្នូ ឆ្នំា២០២០ បានដាក់សំណើរជាផ្លូវការមួយទៅក្រសួងអប់រំយុវជននិងកីឡា ស្នើឲ្យលុបចោលការប្រលងបាក់ឌុបក្នុងឆ្នាំនេះ និងជំនួសមកវិញអោយសិស្សានុសិស្សជាប់ដោយស្វ័យប្រវត្តិ ឬធ្វើការកំណត់ជាប់ធ្លាក់ដោយអាស្រ័យលើមធ្យមភាគប្រចាំឆ្នាំរបស់សិស្សានុសិស្សម្នាក់ៗ។
សំណើរនេះធ្វើឡើងដោយសមាគមមើលឃើញពីភាពមិនច្បាស់លាស់នៃជំងឺកូវីដ១៩ក្នុងសហគមន៍ ដែលអាចជាហានិភ័យខ្ពស់ដល់សុខភាព សិស្សានុសិស្ស រាប់ម៉ឺននាក់មកពីតាមបណ្តាខេត្តក្រុង នៅពេលប្រលងបាក់ឌុបនាពេលខាងមុខ។
លោក ហេង វ៉ាន់ដា ប្រធានក្រុមប្រឹក្សាភិបាលសមាគមគ្រឹះស្ថានឧត្តមសិក្សាកម្ពុជា ប្រាប់វិទ្យុបារាំងអន្តរជាតិRFIនៅថ្ងៃទី៨ខែធ្នូនេះថា ការប្រលងបាក់ឌុបក្នុងឆ្នាំនេះមិនអាចពន្យារពេលម្តងហើយម្តងទៀតបានទេព្រោះគេមិនអាចដឹងបានទេថា តើស្ថានភាពកូវីដ១៩ក្នុងសហគមន៍នឹងមានភាពប្រសើរឡើងនៅពេលណា។
ម៉្យាងវិញទៀតដោយក្រសួងអប់រំបានពន្យារពេលប្រលងចំនួន២ដងរួចមកហើយពោលគឺចាប់តាំងពីពាក់កណ្តាលខែសីហាឆ្នាំ២០២០រហូតមកដល់ខែមករាឆ្នាំ២០២១។
យ៉ាងណាមិញ ក្រសួងអប់រំមិនទាន់មានការសម្រចយ៉ាងណានៅឡើយទេជុំវិញសំណើរនេះ ដោយបានអះអាងថា ក្រសួងនឹងធ្វើការជួបប្រជុំជាមួយភាគីពាក់ព័ន្ធនៅដើមខែមករាឆ្នាំ២០២១ខាងមុខ ដើម្បីពិនិត្យ និងវាយតម្លៃពីស្ថានការណ៍វិវឌ្ឍន៍ជាក់ស្តែងនៃជំងឺកូវីដ១៩ក្នុងសហគមន៍ម្តងទៀត។
ដើម្បីសម្រេចថាតើការប្រលងដែលគ្រោងធ្វើនៅពាក់កណ្តាលខែមករាឆ្នាំ២០២១នោះអាចធ្វើទៅបានឬមិនបាន ហើយក្រសួងនឹងធ្វើការជូនដំណឹងនៅពេលក្រោយបន្ថែមទៀត។ នេះបើតាម លោក រស់ សុវាចា អ្នកនាំពាក្យក្រសួងអប់រំ ប្រាប់វិទ្យុបារាំងអន្តរជាតិ RFI។
គួរជម្រាបជូនដែរថា ក្រសួងអប់រំយុវជននិងកីឡាកាលពីថ្ងៃទី៧ធ្នូម្សិលមិញ បានសម្រេចលើកពេលប្រឡងសញ្ញាបត្រមធ្យមសិក្សាទុតិយភូមិឬបាក់ឌុបជាថ្មីម្តងទៀត ដែលគ្រោងរៀបចំនៅថ្ងៃទី២១ធ្នូ ដោយលើកទៅពាក់កណ្ដាលខែមករាឆ្នាំ២០២១វិញ ដោយសារតែស្ថានភាពមិនច្បាស់លាស់នៃផលប៉ះពាល់ដែលបណ្ដាលមកពីព្រឹត្តការណ៍សហគមន៍២៨វិច្ឆិកា៕
