សូមកុំរើសអើងពួកគាត់ ! តែត្រូវការពារខ្លួន បើធ្លាប់ប៉ះពាល់ជាមួយពួកគាត់ សូមប្រញាប់ទៅធ្វើតេស្តជាបន្ទាន់ !
ភ្នំពេញ៖អ្នកដែលធ្លាប់បានប៉ះពាល់ផ្ទាល់ជាមួយអ្នកទាំងអស់ នេះ សូមទៅពិនិត្យធ្វើតេស្ត នៅមណ្ឌលចត្តាឡីសក្តិជាបន្ទាន់ ដើម្បីរកវីរុសកូវីដ-១៩ ។ សូមចូលរួមគោរពតាមគោលការណ៍ណែនាំរបស់ក្រសួងសុខាភិបាល ដើម្បីកម្ពុជាចៀសផុតពីការរាតត្បាតជំងឺកូវីដ-១៩ ទ្រង់ទ្រាយធំ ចូលក្នុងសហគមន៍ ។
ទន្ទឹមនេះ សម្តេចតេជោ ហ៊ុន សែន នាយករដ្ឋមន្ត្រីនៃកម្ពុជា បង្ហើបថា សម្តេច បានត្រៀមរួចរាល់ហើយ ដើម្បីថ្វាយស្នើទៅព្រះមហាក្សត្រដើម្បីដាក់ប្រទេសស្ថិតក្នុងគ្រាមានអាសន្ន ។ ប៉ុន្តែ សម្តេច មិនចង់ដើរដល់ជំហាន នេះទេ ព្រោះវាធ្វើអោយសេដ្ឋកិច្ចកម្ពុជា គាំងទាំងស្រុងតែម្តង ។
តាមរយៈសារសំឡេង នាព្រឹកថ្ងៃទី៦ ខែធ្នូ ឆ្នាំ២០២០ នេះ សម្តេចតេជោ ហ៊ុន សែន មានប្រសាសន៍ថា បើសិនជាបិទប្រទេស ឬ ផ្នែកណាមួយរបស់ប្រទេស ដូចជារាធានីភ្នំពេញ ឬ ខេត្តណាមួយ នោះ វានឹងធ្វើអោយគាំងដំណើរការសេដ្ឋកិច្ច ជាពិសេសប៉ះពាល់ដល់ការរកស៊ីរបស់ប្រជាពលរដ្ឋ ។
ប៉ុន្តែ អ្វីដែលអាចចម្រុះបាន គឺ សម្តេច ខិតខំចម្រុះតាមរយៈនៃការខិតខំប្រឹងប្រែងរបស់អាជ្ញាធរគ្រប់លំដាប់ថ្នាក់ ជាពិសេសការចូលរួមរបស់ប្រជាពលរដ្ឋ តែម្តង ។ សម្តេច សូមអោយប្រជាពលរដ្ឋ មានការយោគយល់ចំពោះស្ថានការណ៍ បែបនេះ ។
ជាមួយគ្នានេះ សម្តេចតេជោ ហ៊ុន សែន ក៏បានស្នើអោយអាជ្ញាធរយកចិត្តទុកដាក់ ចំពោះអាជីវកម្ម ទាំងអស់ដែលមិនគោរពតាមការណែនាំរបស់ក្រសួងសុខាភិបាល ពាក់ព័ន្ធការទប់ស្កាត់ ការីករាលដាល ជំងឺកូវីដ-១៩ ។ សម្តេច អោយអាជ្ញាធរ សម្រេចបិទអាជីវកម្ម ទាំងអស់នោះ បើសិនជាមិនគោរពតាមការណែនាំ នេះ ។
ក្រសួងសុខាភិបាល បង្ហាញថា គិតពីថ្ងៃទី២៩ ខែវិច្ឆិកា ដល់ថ្ងៃទី៥ ខែធ្នូ ឆ្នាំ២០២០ ពោលគឺរយៈពេល៦ថ្ងៃ ក្រសួងសុខាភិបាលបានធ្វើតេស្តអ្នកប៉ះពាល់សរុបទាំងអស់បានចំនួន ១០.៧៧២សំណាក ក្នុងព្រឹត្តិការណ៍សហគមន៍២៨វិច្ឆិកា ដែលនៅក្នុងចំនួននេះ មានអ្នកវិជ្ជមានជំងឺកូវីដ-១៩ សរុបចំនួន៣០នាក់ ៕
