ប្រុងប្រយ័ត្នទាំងអស់គ្នា !! បន្តរកឃើញអ្នកឆ្លងកូវីដ-១៩ ក្នុងសហគមន៍ចំនួន៦៤ករណីបន្ថែមទៀតក្នុងចំណោមអ្នកឆ្លងថ្មីៗ សរុបទាំងអស់១១០ ករណីនៅប្រទេសថៃ
បើតាមសារព័ត៌មានរ៉យទ័របានចេញផ្សាយថានៅថ្ងៃទី២៦ ខែធ្នូ ឆ្នាំ២០២០ ប្រទេសថៃ បានរកឃើញអ្នកឆ្លង កូវីដ១៩ ថ្មីៗសរុប១១០ករណី ដោយក្នុងនោះមាន៦៤នាក់ជាករណីឆ្លងក្នុងតំបន់ ដែលមានជាប់ទាក់ទិននឹងករណីឆ្លងក្នុងខេត្ត សាមុត សាខន ភាគនិរតីប្រទេស ។
លោកវេជ្ជបណ្ឌិត Taweesilp Visanuyothin អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩ CCSA បញ្ជាក់ថា នៅក្នុងចំណោមករណីឆ្លងថ្មីៗខាងលើនេះ ៣០នាក់គឺជាពលករចំណាកស្រុក និង ១៦នាក់ទៀតជាប្រភេទករណីនាំចូលពីក្រៅប្រទេស ។
យ៉ាងណាមិញករណីឆ្លងយ៉ាងគំហុកនៅក្នុងប្រទេសថៃនេះ បានផ្ទុះឡើងកាលពីសប្តាហ៍មុននេះ ទៅលើក្រុមពលករចំណាកស្រុក មកពីប្រទេសមីយ៉ាន់ម៉ា ដែលស្ថិតនៅក្នុងខេត្តសាមុតសាខន និងកំពុងបង្កឲ្យមានការរើសអើង យ៉ាងធ្ងន់ធ្ងរនៅក្នុងសង្គមថៃផងដែរ ។ គិតចាប់តាំងពីថ្ងៃអាទិត្យសប្តាហ៍មុន ពលករបរទេសនៅក្នុងប្រទេសថៃ សរុបជាង១ពាន់នាក់ហើយ ត្រូវបានធ្វើតេស្តចេញលទ្ធផលវិជ្ជមាន ចំពោះជំងឺកូវីដ១៩នេះ។
