នាយករដ្ឋមន្ត្រីថៃ បញ្ជាឱ្យត្រៀមបិទការចេញចូលខេត្តបន្ថែម ឬឈានដល់បិទប្រទេសទាំងមូលម្តងទៀត
ថៃ៖ លោក ប្រាយុទ្ធ ចាន់អូចា នាយករដ្ឋមន្ត្រីថៃ បានបញ្ជាឱ្យរដ្ឋមន្ត្រីក្រសួងសុខាភិបាល រៀបចំគោលការណ៍រួចជាស្រេច ក្នុងករណីខេត្តបន្ថែមទៀត ឬខេត្តទាំងអស់ ត្រូវបិទការចេញចូលទាំងស្រុង។ នេះបើយោងតាមការចុះផ្សាយរបស់កាសែតបាងកកប៉ុស្តិ៍ នៅរសៀលថ្ងៃទី២១ ខែធ្នូ ឆ្នាំ២០២០នេះ។
ក្រសួងសុខាភិបាលថៃ បាននិងកំពុងរៀបចំគោលការណ៍សម្រាប់ការបិទការចេញចូលខេត្តបន្ថែមទៀត ប្រសិនបើការផ្ទុះរីករាលដាលនៃវីរុសកូវីដ១៩ កាន់តែអាក្រក់ទៅៗ។ លោក Taweesilp Visanuyothin អ្នកនាំពាក្យមជ្ឈមណ្ឌលគ្រប់គ្រងស្ថានភាពជំងឺកូវីដ១៩
នៅប្រទេសថៃ បានប្រាប់នៅថ្ងៃដដែលថា រដ្ឋមន្ត្រីសុខាភិបាល លោក Anutin Charnvirakul ត្រូវបានលោក ប្រាយុទ្ធ ផ្ដល់កិច្ចការរៀបចំគោលការណ៍សម្រាប់បិទការចេញចូលខេត្តបន្ថែមទៀត អំឡុងកិច្ចប្រជុំមួយ ដែលមានការចូលរួមពីក្រុមប្រឹក្សាសន្តិសុខជាតិថៃ និងមន្ត្រីជាន់ខ្ពស់ជាច្រើនរួប។
សូមជម្រាបថា ករណីឆ្លងវីរុសកូវីដ១៩ថ្មី ចេញពីផ្សារលក់អាហារសមុទ្រ នៅខេត្តសាមុតសាខន បានកើនដល់ជាង ៨០០ករណីហើយ នៅថ្ងៃចន្ទ ទី២១ ខែធ្នូ ឆ្នាំ២០២០នេះ។ ករណីឆ្លងថ្មី ក៏ត្រូវបានរកឃើញនៅក្នុងក្រុងបាងកក សាមុតប្រាខាន់ ណាក់ខនផាថំ រាចាបូរី និងស៊ូផានបូរី ផងដែរ ប៉ុន្តែមានចំនួនតិចប៉ុណ្ណោះ៕ ប្រភព៖ Bangkok Post
