ខ្លាំងជាងមុន៧០% ប្រយ័ត្នផង !! អ៊ីតាលីក្លាយជាប្រទេសទី៥ រកឃើញវីរុសកូវីដ-១៩ទម្រង់ថ្មី! ក្រៅពីចក្រភពអង់គ្លេស
ទីក្រុងរ៉ូម ៖ ប្រទេសអ៊ីតាលី បានរកឃើញអ្នកជំងឺម្នាក់ ដែលឆ្លងវីរុសកូវីដ-១៩ទម្រង់ថ្មី! នៅចក្រភពអង់គ្លេស ដែលអ៊ីតាលីក្លាយជាប្រទេសទី៥ ក្រៅពីចក្រភពអង់គ្លេស ដែលរាយការណ៍ពីករណីនេះ នេះបើយោងតាមសារព័ត៌មាន dailymail របស់អង់គ្លេសចេញនៅថ្ងៃទី២១ ធ្នូ ២០២០ ។
រដ្ឋមន្ត្រីក្រសួងសុខាភិបាលអ៊ីតាលី បាននិយាយថា អ្នកជំងឺជនជាតិអ៊ីតាលី បានហោះហើរពីចក្រភពអង់គ្លេស ទៅទីក្រុងរ៉ូម ក្នុងរយៈពេលប៉ុន្មានថ្ងៃចុងក្រោយ ជាមួយដៃគូរបស់គាត់ ដែលបានធ្វើតេស្ត វិជ្ជមាន ។ ឥឡូវនេះ អ្នកទាំង២ កំពុងដាក់នៅដាច់ដោយឡែកដើម្បីព្យាបាល ។
ករណីនៃវីរុសកូវីដ-១៩ទម្រង់ថ្មី ត្រូវបានអ្នកជំនាញអះអាងថា វាឆ្លងរាតត្បាតយ៉ាងឆាប់រហ័ស ពោលគឺវាឆ្លងលើស ៧០ភាគរយ ច្រើនជាងវីរុសកូវីដ-១៩ធម្មតា ដែលរហូតមកដល់ពេលនេះ គេប្រទះឃើញនៅក្នុងប្រទេសដាណឺម៉ាក ហូល្លង់ អូស្ត្រាលី និងបែលហ្ស៊ិក ។
នៅក្នុងខែវិច្ឆិកា មានករណីចំនួន ៩ករណី នៅក្នុងប្រទេសដាណឺម៉ាក និង០១ករណី នៅក្នុងប្រទេសអូស្ត្រាលី ខណៈប្រទេសហូឡង់ បានប្រកាសថា ខ្លួនបានរកឃើញ ០១ករណី នៅក្នុងខែធ្នូនេះ ។ ក៏មានរបាយការណ៍ដែលមិនទាន់បានប្រកាសផងដែរអំពីករណីទម្រង់ថ្មីនេះ មានយ៉ាងហោចណាស់ ០១ករណី នៅក្នុងប្រទេសបែលហ្ស៊ិក ។
រដ្ឋមន្ត្រីក្រសួងសុខាភិបាល នៃប្រទេសបារាំង បាននិយាយនៅព្រឹកថ្ងៃទី២១ ធ្នូនេះថា ប្រទេសយ៉ាងហោចណាស់ ១២ រួមមានបារាំង អាឡឺម៉ង់ អ៊ីតាលី អៀរឡង់ និងកាណាដា បានហាមឃាត់ការធ្វើដំណើរ ទៅនិងមក ពីចក្រភពអង់គ្លេស ដែលជាផ្នែកមួយ នៃការបង្ការជាអន្តរជាតិ ដើម្បីទប់ទល់នឹងមេរោគទម្រង់ថ្មីនេះ ។
មេដឹកនាំសហគមន៍អ៊ឺរ៉ុប កំពុងបើកការប្រជុំជាបន្ទាន់មួយនៅថ្ងៃនេះ ដើម្បីការពារកុំអោយមានវិបត្តិ នៃការរីករាលដាលកាន់តែទូលំទូលាយ នៅលើទ្វីបមួយនេះ ។
ឥឡូវនេះ ក៏មានការព្រួយបារម្ភផងដែរថា ភាពច្របូកច្របល់ អាចរំខានដល់ការផ្គត់ផ្គង់វ៉ាក់សាំង Pfizer / BioNTech coronavirus ទៅចក្រភពអង់គ្លេស ដែលផលិតផលស្តុកនៅប្រទេសប៊ែលហ្សិក ត្រូវការផ្គត់ផ្គង់ដោយយន្តហោះយោធា ប្រសិនបើការបិទព្រំដែនមានរយៈពេលយូរជាង ៤៨ម៉ោង ៕