រដ្ឋមន្ត្រីការបរទេសចិន លោកវ៉ាង យី និយាយថាអាម៉េរិកគួរជំនួសការដាក់ទណ្ឌ កម្មដោយការសន្ទនាជំនួស
សមាជិកក្រុមប្រឹក្សារដ្ឋនិងជារដ្ឋមន្ត្រីក្រសួងការបរទេសចិន លោកវ៉ាង យីបាននិយាយកាលពីថ្ងៃសុក្រទី១៨ធ្នូថាសហរដ្ឋអាម៉េរិកគួរតែជ្រើសរើសការសន្ទនានិងការពិគ្រោះយោបល់ជាមួយចិនជំនួសឱ្យការបន្តដាក់ទណ្ឌ កម្មជាឯកតោភាគី “ដែលមិនអាចទទួលយកបាន” ចំពោះក្រុមហ៊ុនចិន។
លោកបានជំរុញឱ្យសហរដ្ឋអាមេរិកបញ្ឈប់ “ការបារម្ភហួសហេតុជ្រុលពេកអំពីសន្តិសុខជាតិ” និង “ការគាបសង្កត់ក្រុមហ៊ុនចិនទាំងបំពាន”។
លោកបាននិយាយនៅក្នុងសុន្ទរកថាពិសេសមួយទៅកាន់អង្គការសង្គមអាស៊ី ដែលផ្តោតសំខាន់លើស្ថានភាពនៃទំនាក់ទំនងចិន-អាម៉េរិក យ៉ាងដូច្នេះថា”យើងត្រូវជំនួសទណ្ឌ កម្មជាមួយការសន្ទនានិងការពិគ្រោះយោបល់”។
រដ្ឋាភិបាលក្រុងវ៉ាស៊ីនតោនបានបញ្ជាក់កាលពីថ្ងៃសុក្រថា ខ្លួនបានបន្ថែមក្រុមហ៊ុនចិនរាប់សិបរួមមានក្រុមហ៊ុនផលិតបន្ទះឈីបធំបំផុតរបស់ប្រទេស SMIC ទៅក្នុងបញ្ជីខ្មៅនៃពាណិជ្ជកម្មដែលជាការចាត់វិធានការថ្មីបំផុតនៅក្នុងកិច្ចប្រឹងប្រែងរបស់ប្រធានាធិបតីដូណាល់ ត្រាំ ក្នុងការពង្រឹងកេរ្តិ៍ដំណែលរបស់គាត់ដែលតឹងតែងចំពោះចិន។
លោកវ៉ាងបានបន្ថែមថា រដ្ឋាភិបាលក្រុងប៉េកាំងបានកត់សម្គាល់នូវអាទិភាពគោលនយោបាយចំនួន៤ របស់ប្រធានាធិបតីជាប់ឆ្នោតអាម៉េរិកលោកចូ បៃដិន ដែលគ្រោងនឹងចូលកាន់តំណែងនៅថ្ងៃទី ២០ ខែមករាហើយជឿយ៉ាងហោចណាស់ ៣ ចំណុចក្នុងចំណោមនោះ គឺ ការឆ្លើយតបទៅនឹងជំងឺកូវីដ១៩ ការស្តារសេដ្ឋកិច្ច និងបម្រែបម្រួលអាកាសធាតុនឹងផ្តល់ឱកាសសម្រាប់កិច្ចសហប្រតិបត្តិការរវាងប្រទេសទាំងពីរ។
លោកវ៉ាងបាននិយាយថា “យើងសង្ឃឹមថាយើងនឹងពង្រីកកិច្ចសហប្រតិបត្តិការនិងគ្រប់គ្រងការខ្វែងគំនិតគ្នាតាមរយៈការសន្ទនាគ្នា។វាជាការសំខាន់ណាស់ដែលគោលនយោបាយរបស់សហរដ្ឋអាម៉េរិកចំពោះចិនត្រឡប់ទៅរកវត្ថុបំណងនិងនិរន្តរភាពឱ្យបានឆាប់តាមដែលអាចធ្វើបាន”៕
