ដំណឹងល្អ សង្ឍឹមថាមកដល់ប្រទេសកម្ពុជាឆាប់ៗនេះដែរ!!! ដំណើរការចែកចាយវ៉ាក់សាំងបង្ការជំងឺកូវីដ១៩បានចាប់ផ្តើមធ្វើឡើងនៅក្នុងសហរដ្ឋអាមេរិក
វ៉ាស៊ីនតោន៖ វ៉ាក់សាំបង្ការជំងឺកូវីដ១៩ត្រូវបានចាប់ផ្តើមចែកចាយនៅសហរដ្ឋអាមេរិកជាលើកដំបូងកាលពីថ្ងៃអាទិត្យដែលជាកិច្ចខិតខំប្រឹងប្រែងដើម្បីបញ្ឈប់ការឆ្លងរាលដាលនៃជំងឺនេះដែលបានសម្លាប់មនុស្សជាង២,៤០០នាក់ក្នុងមួយថ្ងៃនៅអាមេរិក។
បុគ្គលិកនៅរោងចក្ររបស់ក្រុមហ៊ុនឱសថ ហ្វាយហ្ស័រ (Pfizer) នៅក្នុងរដ្ឋមីឈីហ្គេន (Michigan) បានចាប់ផ្តើមវេចខ្ចប់វ៉ាក់សាំងដែលផលិតរួមគ្នាជាមួយក្រុមហ៊ុនឱសថ បាយអូ អិនថិច (BioNTech) ស្តុកក្នុងទឹកកកស្ងួត។
ការបញ្ចេញវ៉ាក់សាំងឈុតដំបូងត្រូវបានគេរំពឹងថានឹងមានប្រហែល៣លានដូស ហើយអ្នកដែលមានអាទិភាពចាក់មុនគេគឺបុគ្គលិកសុខាភិបាលនិងអ្នករស់នៅមណ្ឌលថែទាំ ខណៈដែលចំនួនអ្នកឆ្លង, អ្នកបាត់បង់ជីវិត និងអ្នកកំពុងសម្រាកនៅមន្ទីរពេទ្យនៅអាមេរិកមានការកើនឡើង។
វ៉ាក់សាំងនេះបានបង្ហាញក្តីសង្ឃឹមក្នុងការប្រយុទ្ធប្រឆាំងនឹងការរាតត្បាតជំងឺកូវីដ១៩ស្របពេលដែលចំនួនអ្នកឆ្លងនិងបាត់បង់ជីវិតអាចនឹងកាន់តែធ្ងន់ធ្ងរនៅថ្ងៃឈប់សម្រាកនាពេលខាងមុខ។
មន្ត្រីអាមេរិកបាននិយាយថា វ៉ាក់សាំងបង្ការជំងឺកូវីដ១៩របស់ក្រុមហ៊ុនឱសថ ហ្វាយហ្ស័រ (Pfizer) នឹងត្រូវបានដឹកជញ្ជូនទៅដល់មជ្ឈមណ្ឌលចែកចាយ១៤៥កន្លែងនៅថ្ងៃចន្ទនេះ, ៤២៥កន្លែងទៀតនៅថ្ងៃអង្គារ និង៦៦កន្លែងដែលនៅសល់នៅថ្ងៃពុធ។
វ៉ាក់សាំងនេះតម្រូវឲ្យស្តុកទុកក្នុងសីតុណ្ហភាពដក៧០អង្សារសេ ហើយនៅក្នុងដំណាក់កាលសាកល្បងចុងក្រោយបានបង្ហាញថាវាមានប្រសិទ្ធភាព៩៥%ក្នុងការប្រឆាំងនឹងវីរុសកូវីដ១៩។
គួរបញ្ជាក់ថា និយ័តករអាមេរិកបានអនុម័តឲ្យប្រើប្រាស់វ៉ាក់សាំងបង្ការជំងឺកូវីដ១៩របស់ក្រុមហ៊ុន ហ្វាយហ្ស័រ (Pfizer) សហការផលិតជាមួយក្រុមហ៊ុន បាយអូ អិនថិច (BioNTech) ក្នុងគ្រាបន្ទាន់នៅអាមេរិកកាលពីថ្ងៃសុក្រ៕
