សារព័ត៌មានមហាខ្មែរ

សញ្ញា​គាំងបេះដូង ស្រីៗភាគ​ច្រើន​មិន​សូវ​ខ្វល់ តែ​គ្រោះ​ថ្នាក់​ធ្ងន់

1

សញ្ញា​ជំងឺ​គាំងបេះដូង​របស់​ស្រ្តី​មិន​ដូច​​បុរស​ទាំង​ស្រុងទេ ដូចជា ​ការ​ឈឺ​ចុក​ទ្រូង​រាលដាល​ដល់​ដៃ​ម្ខាង ជាដើម។ ជួន​កាល​ស្ត្រី​មួយ​ចំនួន​ធំមិន​បាន​ចាប់​អារម្មណ៍ ប៉ុន្តែ​កំពុង​តែ​ប្រឈម​នឹង​គ្រោះថ្នាក់​បេះដូង​ដំណើរការ​មិន​ល្អ​នេះ។ ម៉េច​បាន​កើត​ជំងឺ​គាំងបេះដូង? មាន​សញ្ញា​សម្គាល់​អី​ខ្លះដែល​អាច​ចំណាំថា​យើង​កំពុង​តែ​ប្រឈម​មុខ​បញ្ហា​នេះ? តោះ! មក​ស្វែងយល់​ប៉ុន្មាន​ចំណុចខាងក្រោម​នេះ៖

១- មូលហេតុ៖ ចម្លើយ​ខ្លីដែល​អាច​ធ្វើ​ឲ្យ​បេះដូង​គាំងដំណើរ​ការ​អត់​ល្អ ដោយ​សារ​តែកម្ទេចកំទី​សារជាតិ​ខ្លាញ់​កូលេស្ដេរ៉ូល​ (Plague) ​​កក​នៅ​ក្នុង​សរសៃឈាម​ចិញ្ចឹម​បេះដូង ​បាន​រាំងស្ទះ​ដំណើរ​ឈាម​រត់​ទៅ​កាន់​បេះដូង។ អ្នក​ប្រឈម​ជំងឺ​​នេះខ្ពស់ គឺអ្នកជក់​បារី​ច្រើន ឆាប់​ ឬឧស្សាហ៍​ស្ត្រេស និង​​ធាត់​ជ្រុល។ អ្វី​ធ្វើ​គប្បីយល់ដឹង​ឲ្យ​ច្បាស់​ពីអាការៈ​ និង​រោគសញ្ញាដែល​ឧស្សាហ៍​កើត​ឡើង​ចំពោះ​ខ្លួន​ផ្ទាល់ ហើយ​ត្រូវ​ណាត់​ជួប​ពេទ្យ​​ឲ្យ​បាន​ទៀងទាត់​បំផុត។

២- រោគសញ្ញា​គ្រោះថ្នាក់​លាក់​មុខ៖ – ចុក​ទ្រូង ឬមិន​ស្រួល​ក្នុង​ខ្លួន៖ នេះ​ជា​រោគ​សញ្ញា​ធម្មតា​ទូទៅ​នៃ​ជំងឺ​គាំងបេះដូង យ៉ាង​ណា​មិញ​ របៀប​​ស្រ្ដី​ជួប​ប្រទះ​​អាច​ខុស​ពី​បុរស។ រោគសញ្ញា​អាច​មាន​លក្ខណៈឈឺ​ជាប់​រហូត ​ឬឈឺ​ចាក់ៗ (ម្ដង​ឈឺ​ម្ដង​អត់) ហើយ​អាការៈ​ឈឺ​​នេះ ​មិន​ស្ថិត​នៅ​ថេរ​ខាងឆ្វេង​រហូត​ទេ ​ប៉ុន្តែ​វា​អាច​រាលដាល​គ្រប់​កន្លែង​នៃ​ទ្រូង និង​រសេះរសោះ​ពិបាក​ក្នុង​ខ្លួន។ គ្រូពេទ្យ​ឯកទេស​ជំងឺបេះដូង​មួយ​ចំនួន​បង្ហាញ​ថា ស្រ្ដី​​អាច​ចេញ​សញ្ញា​ផ្សេងៗ​ទៀត​ ដូចជា ​ចង់​ក្អួតចង្អោរឬ​ដកដង្ហើម​ញាប់។

– ដកដង្ហើម​ញាប់ ចង់​ក្អួតចង្អោរ ​វិលមុខ​រក​ខ្យល់៖ បើ​សិន​ជា​នៅ​សុខៗ ស្រាប់​តែ​​មាន​អារម្មណ៍​ថា​ពិបាក​ដក​ដង្ហើម​ដោយ​គ្មាន​មូលហេតុ​ច្បាស់​លាស់ យើង​​អាច​​មាន​ជំងឺ​គាំងបេះដូង។ ​ពិសេស​ បើ​មាន​រោគសញ្ញា​គួរ​ឲ្យ​សង្ស័យ ដូចដែល​បាន​រៀប​រាប់​លើស​ពី​មួយ។

– ឈឺ​ដៃ ខ្នង ក ថ្គាម ឬក្រពះ៖ ស្ត្រី​អាច​នឹង​ជួប​បញ្ហា​ទាំង​នេះ​ជាង​បុរស។ ការឈឺចាប់​មិនមែន​កើត​មាន​តែ​នៅ​លើ​ទ្រូង​ និង​ដៃ​ឆ្វេង​ទេ ប៉ុន្តែក៏​អាច​មាន​នៅថ្គាម​ ឬខ្នង​ដែរ។ ការ​ធ្វើ​ទុក្ខ (ឈឺចាប់) អាច​ចាប់​ផ្ដើម​ម្ដង​បន្ដិចៗ ​ឬឈឺ​ភ្លាមៗ ​ហើយ​វា​អាច​មាន​លក្ខណៈ​ឡើង​ចុះ មុន​នឹង​ទទួល​អារម្មណ៍​ឈឺ​ចាប់​ខ្លាំង (ធ្វើ​ទុក្ខ​ខ្លាំង) ឬ​ពេល​ខ្លះ​ធ្វើ​ឲ្យ​ភ្ញាក់​ពី​ដំណេក​ក៏​មាន។

គ្រូពេទ្យ​ឯកទេស (ជំងឺបេះដូង)​ បាន​ឲ្យ​ដំបូន្មាន គ្នា​យើង​មាន​រោគសញ្ញាពិបាក​បកស្រាយ​ក្នុង​​ផ្នែក​ណាមួយ​នៃ​តួខ្លួន​ លើ​ចង្កេះ គួរ​តែ​ប្រាប់​ទៅ​វេជ្ជបណ្ឌិត​ ឬអ្នក​ផ្ដល់​សេវា​ថែទាំ​សុខភាព​ភ្លាមៗ។ ករណី​ខ្លះ ​ដូចជា ​ឈឺ​ក្រពះ ស្រីៗ​មាន​ជំងឺ​អាច​ច្រឡំ​ម្ដងម្កាល​ថា​ជា ​ដំបៅ​ក្រពះ​ ចុក​ចុងដង្ហើម​ ឬ​ផ្ដាសាយ។ ជំងឺបេះដូង អាច​សម្គាល់ថា ​ជួនកាល​គ្នា​យើង​មាន​​ជំងឺ (ស្ត្រីភាគច្រើន) អាច​ឈឺ​ក្នុង​ពោះ មាន​អារម្មណ៍ ដូច​មាន​សត្វ​ដ៏​ធំ​អង្គុយ​លើ​ពោះ​​អ៊ីចឹង។

– ហត់​អស់កម្លាំង៖ ស្រីៗមាន​ជំងឺ​គាំងបេះដូង ​អាច​ឆាប់​មាន​អារម្មណ៍​ ​ហត់​ អស់​កម្លាំង ​ទោះ​មិន​សូវ​បាន​ធ្វើ​អី​ច្រើន​ក៏​ដោយ។ មួយ​ចំនួន​ឧស្សាហ៍​ប្រាប់​ថា ហត់ ឈឺ​ក្នុង​ទ្រូង ហើយ​មិន​អាច​ធ្វើការ​ធម្មតាៗ​បាន។

– បែកញើស៖ រោគសញ្ញា​នេះ​មាន​លក្ខណៈ​ខុស​ពី​ការ​បែកញើស​ពេល​ហាត់ប្រាណ ​ឬអាកាស​ធាតុ​ក្ដៅ​ខ្លាំង ព្រោះ​បែក​ញើស​ម្ដង​នេះ ដែល​ជា​រោគសញ្ញា​ជំងឺ ​ទំនង​​បែក​ញើស​ដោយ​សារ​ស្ត្រេស។

៣- មើល​ថែខ្លួន៖ អ្វី​ដែល​គួរ​ធ្វើ មុន​បណ្ដោយ​ខ្លួន​ឲ្យ​ធ្លាក់​ក្នុង​ស្ថានភាព និង​ក្លាយ​ជា​ជនរងគ្រោះ​ដោយ​សារ​​ជំងឺ​គាំងបេះដូង​មាន៖ – គួរ​ឈប់​ជក់បារី៖ ផ្សែង​បារី​ដែល​បឺត​ស្រូប​ចូល​ខ្លួន ក៏​ជា​ចំណែក​បណ្ដាល​ឲ្យ​កក​ស្ទះ​សរសៃឈាម និង​ធ្វើ​ឲ្យ​បេះដូង​គាំង​បាន​ដែរ។ បើ​ស្រឡាញ់​ខ្លួន​ឯង និង​គ្រួសារ គួរ​តែ​បោះបង់ ដោយ​ចាប់​ផ្ដើម​ពី​ការ​កាត់​បន្ថយ​បន្តិច​ម្ដងៗ។ – គួរ​ហាត់​ប្រាណ៖ គួរ​ចំណាយ​ពេល​ដើរ ហោច​ណាស់​ឲ្យ​បានកន្លះម៉ោង​ រៀងរាល់​ថ្ងៃ។ – គួរ​ញ៉ាំ៖ បន្លែ ​និង​សាច់​សុទ្ធឲ្យ​បាន​ទៀតទាត់។ ក្នុង​ករណី​មាន​សំណួរ ឬ​មន្ទិលសង្ស័យ​ជុំវិញ​សុខភាព​អ្នក ជម្រើស​ល្អ​បំផុត​ សូម​ពិគ្រោះ និង​ប្រឹក្សា​យោបល់​ផ្ទាល់​ជាមួយ​ពេទ្យ​ជំនាញ។ “Hello គ្រូពេទ្យ”

អត្ថបទទាក់ទង