វៀតណាមប្រកាសបើកជើងហោះហើរជាមួយកម្ពុជាឡើងវិញ
ប្រព័ន្ធផ្សព្វផ្សាយរដ្ឋបានរាយការណ៍នៅថ្ងៃទី ៣ ខែកញ្ញានេះពីការចាប់ផ្តើមបើកដំណើរការជើងហោះហើរអន្តរជាតិជាមួយទីក្រុងចំនួន៦ នៅអាស៊ី ចាប់ពីពាក់កណ្តាលខែកញ្ញា ក្រោយពីផ្អាករយៈពេលជាច្រើនខែដោយសារការឆ្លងនៃជំងឺកូវីដ១៩។
ការបើកជើងហោះហើរជាថ្មីជាមួយទីក្រុងចំនួន៦ នៅអាស៊ីរួមមាន ទីក្រុងក្វាងចូវ ទីក្រុងសេអ៊ូល ទីក្រុងវៀងចន្ទ ទីក្រុងភ្នំពេញ ទីក្រុងតៃប៉ិ និងទីក្រុងតូក្យូ។ គូសបញ្ជាក់ផងដែរថា វៀតណាមបានប្រកាសបិទជើងហោះហើរជាមួយកម្ពុជាតាំងពីដើមខែមេសា ដោយសារការរីករាលដាលនៃជំងឺកូវីដ១៩៕
នាយកដ្ឋានអាកាសចរណ៍វៀតណាម បានផ្ញើលិខិតទៅកាន់ក្រសួងចរាចរណ៍ដឹកជញ្ជូន ស្តីពីគម្រោងបើកផ្លូវហោះហើរអន្តរជាតិឡើងវិញនៅថ្ងៃទី១៥ ខែកញ្ញា ក្រោយការផ្អាកជាច្រើនខែកន្លងមក ដោយសារតែកូវីដ-១៩។ នាយកដ្ឋានអាកាសចរណ៍វៀតណាម ស្នើតភ្ជាប់ជើងហោះហើរ ទីក្រុងហាណូយ-តូក្យូ និងទីក្រុង ហូជីមិញ-តូក្យូ មួយសប្តាហ៍ហោះហើរមួយជើងទៅ-មក ។ វៀតណាមបានកំណត់ឲ្យក្រុមហ៊ុនអាកាសចរណ៍ Vietnam Airlines សហការជាមួយ ក្រុមហ៊ុនអាកាសចរណ៍Pacific Airlines រៀបចំជើងហោះហើរខាងលើ ដោយប្រើយន្តហោះប្រភេទ Boeing B787 ហើយជើងហោះហើរនឹងធ្វើឡើងជារៀងរាល់ថ្ងៃអង្គារ ក្នុងសប្តាហ៍។ ជាមួយគ្នានេះដែរ ក្រុមហ៊ុន Vietjet Air នឹងហោះហើរពីទីក្រុងហូជីមិញទៅទីក្រុងតូក្យូ ដោយប្រើយន្តហោះ Airbus A321 រៀងរាល់ថ្ងៃអង្គារ។ ចំណែកអ្នកដំណើរដែលចូលមកទីក្រុងហូជីមិញនិងហាណូយត្រូវធ្វើចត្តាឡីស័ក ច្រើនបំផុត៥៦០នាក់ ក្នុងមួយសប្តាហ៍។ ជាមួយប្រទេសចិនវិញ នាយកដ្ឋានអាកាសចរណ៍វៀតណាម ក៏បានស្នើបើកជើងហោះហើរឡើងវិញពីទីក្រុងហូជីមិញទៅក្វាងចូវ១ជើងក្នុងមួយសប្តាហ៍ ដោយមានអ្នកដំណើរច្រើនបំផុត៥៤០ នាក់ក្នុងមួយសប្តាហ៍។ ជាមួយកូរ៉េខាងត្បូង នាយកដ្ឋានអាកាសចរណ៍វៀតណាមបានស្នើឲ្យបើកជើងហោះហើរ១ជើងមួយសប្តាហ៍ទៅមក ។ ជាមួយគ្នានេះក៏មានជើងហោះហើរទៅកាន់តៃវ៉ាន់ ឡាវនិងកម្ពុជាផងដែរ ដោយមានការហោះហើរ១ជើងក្នុងមួយសប្តាហ៍ តាមជើងហោះហើររបស់ក្រុមហ៊ុនVietnam Airlines៕
