លោក ហ៊ុន សែន៖ នៅសម័យកូវីដនេះ អាចធ្វើឲ្យប្រជាពលរដ្ឋកម្ពុជាស្គាល់ប្រទេសរបស់ខ្លួនឯង
លោកនាយករដ្ឋមន្ត្រី ហ៊ុន សែន ជាថ្មីម្តងទៀត បានលើកសរសើរដល់វិស័យឯកជន ដែលបានដើរតួនាទីយ៉ាងសំខាន់នៅក្នុងអំឡុងពេលនៃវិបត្តិកូវីដ១៩នេះ តាមរយៈការបន្តដំណើរការផលិតកម្មដែលមានស្រាប់ និងការវិនិយោគថ្មីៗបន្ថែមទៀតជាពិសេសលើវិស័យទេសចរណ៍។ ការថ្លែងរបស់លោក ហ៊ុន សែន ដូច្នេះគឺធ្វើឡើងខណៈដែលលោកជាអធិបតីនៃការសម្ពោធ ដាក់ឲ្យដំណើរការមណ្ឌលកំសាន្តខ្នាតអន្តរជាតិថ្មីមួយទៀតឈ្មោះ ព្រីនស៍ ម៉ាណ័រ(Prince Manor)នាព្រឹកថ្ងៃពុធនេះ ស្ថិតនៅក្នុងទឹកដីស្រុកកៀនស្វាយ ខេត្តកណ្តាល។
«ហេតុអ្វីបានជានៅសម័យកូវីដ ដែលទេសចរកំពុងតែធ្លាក់ចុះ ហើយបែរជានាំគ្នាសម្ពោធដាក់ឲ្យប្រើប្រាស់ នូវមជ្ឈមណ្ឌលកំសាន្តទៅវិញ?» គឺជាសំណួរដែលត្រូវបានចោទឡើងដោយលោកនាយករដ្ឋមន្ត្រី ហ៊ុន សែន អំឡុងពេលដែលលោក សម្ពោធដាក់ឲ្យដំណើរការមណ្ឌលកំសាន្តខ្នាតយក្សព្រីនស៍ ម៉ាណ័រ នៅស្រុកកៀនស្វាយ។ គឺជាការសម្ពោធមណ្ឌលកម្សាន្តលំដាប់អន្តរជាតិលើកទី២ ឃ្លាតគ្នាតែ២ខែប៉ុណ្ណោះ ពីការសម្ពោធដាក់ឲ្យដំណើរការនូវសួនទឹកកម្សាន្ត(Garden City Water Park) នៅក្នុងអំឡុងពេលនៃវិបត្តិកូវីដ១៩។
ចំណុចនេះ លោក ហ៊ុន សែន បានបកស្រាយថា «ទោះបីកូវីដ បានបំផ្លិចបំផ្លាញយើង តែវាមិនអាចសម្លាប់យើងបានទេ»។
ប្រទេសកម្ពុជាកាលពីឆ្នាំ២០១៩ ធ្លាប់បានទទួលភ្ញៀវទេចរបរទេសចំនួន ៦,៦លាននាក់ តែនៅឆ្នាំ២០២០នេះ កម្ពុជាទទួលបានទេសចរបរទេសតែ១,៦លាននាក់ប៉ុណ្ណោះ។ ការធ្លាក់ចុះនៃទេសចរបរទេសដ៏ច្រើនសន្ធឹកសន្ធាប់នេះ ធ្វើឲ្យលោកនាយករដ្ឋមន្ត្រី មិនរំពឹងថានឹងមានភ្ញៀវទេសចរអន្តរជាតិ ងើបឡើងវិញយ៉ាងឆាប់រហ័សនោះទេ ដោយសារតែស្ថានភាពនៃកូវីដ១៩នៅមិនទាន់ស្រាកស្រាន្ត។
តាមលោក ហ៊ុន សែន ការបង្កើតឲ្យមានមណ្ឌលកំសាន្តក្នុងស្រុកធំៗគឺជាជំរើសដែលត្រឹមត្រូវ ដែលអាចទាក់ទាញដល់តម្រូវការទេសចរក្នុងស្រុក ខណៈដែលប្រទេសនេះលែងរំពឹងលើទេសចរបរទេសនៅក្នុងអន្តរកាលនេះ។ លោកថា កាលពីមុនប្រជាជនកម្ពុជាជិត២លាននាក់ បានចេញទៅខាងក្រៅ តែសម័យកូវីដនេះ ប្រជាជនកម្ពុជាមានឱកាសច្រើនដើរលេងនៅក្នុងប្រទេស ដែលនេះជាការបង្វែទិសជាសត្យានុម័ត ដែលចាំបាច់ត្រូវតែមានការបង្វែទិសជាអត្តនោម័យ តាមរយៈការអភិវឌ្ឍទេសចរណ៍ក្នុងប្រទេស។
សូមរំលឹកថានៅក្នុងឱកាសនៃការឈប់សម្រាករយៈពេល៥ថ្ងៃ ដើម្បីសងថ្ងៃចូលឆ្នាំខ្មែរកន្លងទៅ មានពលរដ្ឋខ្មែរដើរលេងក្នុងស្រុកប្រមាណ១,៦លាននាក់ ហើយក្នុងឱកាសបុណ្យភ្ជុំបិណ្ឌកន្លងទៅថ្មីៗនេះដែរ មានភ្ញៀវទេសចរក្នុងស្រុក១,១លាននាក់ផងដែរ ដើរកំសាន្តក្នុងស្រុក។
សម្រាប់សម័យកូវីដនេះ គឺជាឱកាសដែលធ្វើឲ្យប្រជាពលរដ្ឋខ្មែរបានស្គាល់ប្រទេសខ្លួនឯង ខណៈមុនកូវីដ ពួកគេសម្រុកកក់សំបុត្រយន្តហោះ ទៅកំសាន្តនៅប្រទេសផ្សេង នៅពេលឈប់សម្រាកម្តងៗ។ នេះបើតាមលោកនាយករដ្ឋមន្ត្រី៕
