ខេត្តព្រះសីហនុ និងកាន់តែស្រស់ស្អាតជាងមុនក្រោយ រាជរដ្ឋាភិបាលផ្ដល់ថវិកា១០០លានដុល្លារ ស្ថាបនាផ្លូវចំនួន១១ខ្សែបន្ថែមទៀតនៅខេត្តព្រះសីហនុ សម្រេច២២%
ព្រះសីហនុ៖ ការស្ថាបនាផ្លូវ ចំនួន ១១ ខ្សែបន្ថែមពីលើផ្លូវ៣៤ខ្សែ ដែលជាគម្រោងថវិកាសន្សំរបស់រាជរដ្ឋាភិបាលកម្ពុជាតាមរយៈក្រសួងសាធារណការស្ថាបនាបានជាង ២២%ហើយមកដល់ពេលនេះ។
ក្នុងនោះ ការជួសជុលស្ថាបនាផ្លូវលេខ២០០ បែកចេញពីផ្លូវឯករាជ្យត្រង់ស្ថានីយប្រេងសូគីម៉ិច ចូលទៅផ្សារលើ ដែលអនុវត្តន៍គម្រោងដោយមន្ទីរសាធារណការ និងដឹកជញ្ជូនខេត្តព្រះសីហនុ កំពុងដំណើរការ ទាំងការស្ថាបនាតួផ្លូវ ប្រព័ន្ធលូបង្ហូរទឹក និងហេដ្ឋារចនាសម្ព័ន្ធផ្សេងៗសងខាងផ្លូវ
ស្ថិតក្រោម គម្រោងវិនិយោគ ស្តារ និងអភិវឌ្ឍន៍ ហេដ្ឋារចនាសម្ព័ន្ធ នៅខេត្តព្រះសីហនុ ផ្លូវចំនួន ១១ ខ្សែដែលដ្ឋាភិបាលទម្លាក់កញ្ចប់ថវិកាស្ថាបនាដោយប្រើប្រាស់ថវិកាសន្សំរបស់ជាតិ ចំនួន ១០០ លានដុល្លារ តាមរយៈក្រសួងសាធារណការ និងដឹកជញ្ជូន។
លោក បូរី វង្សសានិត ប្រធានមន្ទីរសាធារណការ និងដឹកជញ្ជូនខេត្តព្រះសីហនុឲ្យCNCដឹងថា ផ្លូវទាំងអស់មានចាក់គ្រឹះបេតុងខាងក្រោម និងចាក់អ៊ុតកៅស៊ូពីលើ ហើយគម្រោងនេះ តាមការណែនាំពីលោក គួច ចំរើន អភិបាលខេត្តព្រះសីហនុ ក្រុមការងារបច្ចេកទេសនឹងខិតខំធ្វើឲ្យរួចរាល់ នៅមុនពិធីបុណ្យចូលឆ្នាំខ្មែរ ២០២១ ខាងមុខ។
ជាមួយគ្នានេះ មន្ត្រីជំនាញបានសុំការយោគយល់ពីពលរដ្ឋឬកន្លែងអាជីវកម្មផ្សេងៗ ជាប់សងខាងផ្លូវ ចំពោះការប៉ះពាល់មួយចំនួន ដូចជាករណី ពិបាកចេញ ចូលមុខផ្ទះជាដើម ក្នុងរយៈពេលការជួសជុលកំពុងដំណើរការ។
សូមគួរបញ្ជាក់ថាគម្រោងសាងសង់ ជួសជុលកំណាត់ផ្លូវក្រុងលេខ ២០០ (វិថី ៧ មករា) បានតភ្ជាប់គ្នាចាប់ពី ស្តុប ៣៣៣ រហូតដល់ ផ្លូវលេខ ៨០០ មានកម្រាលជាបេតុងសរសៃដែក កម្រាស់ ២៥ស.ម. និងអ៊ុតបេតុងកៅស៊ូ AC កម្រាស់ ៧ស.ម.។
ដូច្នេះហើយហេដ្ឋារចនាសម្ព័នក្នុងក្រុងព្រះសីហនុក្រៅពីរាជរដ្ឋាភិបាលទម្លាក់កញ្ចប់ថវិកាស្ថាបនាផ្លូវទាំង ៣៤ខ្សែ ក្នុងនោះក៏កំពុងនិងស្ថាបនាផ្លូវបន្ថែមចំនួន១១ខ្សែទៀតដើម្បីធ្វើយ៉ាងណាឲ្យក្រុងព្រះសីហនុកាន់តែមានភាពងាយស្រួល ក្នុងការធ្វើដំណើរដល់បងប្អូនប្រជាពលរដ្ឋភ្ញៀវទេសចរទាំងជាតិនិងអន្តរជាតិមកលេងកម្សាន្ត៕
