សុខ ទូច៖ កម្ពុជាត្រូវរក្សាកិច្ចសហប្រតិបត្តិការជាមួយបណ្ដាប្រទេសដើម្បីផលប្រយោជន៍សេដ្ឋកិច្ចក្នុងបរិបទនៃជំងឺរាតត្បាត COVID-19

នាថ្ងៃទី ២៨ ខែសីហាឆ្នាំ ២០២០ រាជបណ្ឌិត្យសភាកម្ពុជាបានរៀបចំវេទិកាតុមូលមួយជជែកពិភាក្សាស្តីពីការត្រៀមខ្លួនរបស់កម្ពុជាចំពោះមុខនៃបញ្ហាសេដ្ឋកិច្ចក្នុងអំឡុងវិបត្តិជំងឺរាតត្បាត COVID-19 និងការប្រឈមរបស់កម្ពុជាជុំវិញការប្រកួតប្រជែងឥទ្ធិពលពីប្រទេសមហាអំណាចលើពិភពលោក ដែលធ្វើឡើងនៅរាជបណ្ឌិត្យសភាកម្ពុជា។
កម្ពុជាត្រូវរក្សាកិច្ចសហប្រតិបត្តិការជាមួយបណ្ដាប្រទេសដើម្បីផលប្រយោជន៍សេដ្ឋកិច្ចក្នុងបរិបទនៃជំងឺរាតត្បាត COVID-19

លោក សុខ ទូច ប្រធាន​រាជបណ្ឌិត្យសភា​កម្ពុជា​បាន​លើកឡើង​នៅក្នុង​កិច្ចពិភាក្សា​នេះ​ថា កម្ពុជា​មិន​បាន​បញ្ជាក់ថា ខ្លួន​ចាប់ដៃ​ជាមួយ​ប្រទេស​ចិន​ផ្តាច់មុខ​បោះបង់​អាមេរិក ឬ​មហាអំណាច​ផ្សេងៗ​ទៀត​នោះទេ​។ លោក​អះអាង​ថា ថ្នាក់ដឹកនាំ​ប្រទេស​កម្ពុជា​គឺ​មិនមែន​រើសអើង​ថា ប្រទេស​នេះ​កុម្មុយនីស្ត​ ឬ​សេរី​នោះទេ គឺ​ចាប់ដៃ​សហការ​ទាំងអស់​ឱ្យតែ​ប្រទេស​ទាំងនោះ ផ្តល់​ផលប្រយោជន៍​ជូន​សង្គមជាតិ​។

លោក សុខ ទូច ថ្លែងថា​៖ «​កម្ពុជា​ត្រូវ​ប្រើប្រាស់​នយោបាយ​ផ្កា​ចម្រុះ​ពណ៌​ចាប់​ជាមួយ​ចិន តែ​កម្ពុជា​ត្រូវ​ត្រៀម​ខ្លួន មិនមែន​ចាប់​ហើយ​សប្បាយចិត្ត​ទេ ព្រោះ​ចិន​ក៏​ធ្វើ​កសិកម្ម ឧស្សាហកម្ម​ដូច​យើង​ដែរ​ហើយ​វាយនភណ្ឌ​របស់​ចិន​ថោក​ជាង​កម្ពុជា​ទៅទៀត​»​។

លោក​បញ្ជាក់ថា អ្វី​ដែល​កម្ពុជា​ត្រូវ​គិត​គឺ​បង្រៀន​មនុស្ស​ឲ្យ​មាន​បេះដូង​កុំ​ឈ្លានពាន​គ្នា​ហើយ​ការចាប់​ដៃ​ជាមួយ​ចិន​កម្ពុជា​មិន​ត្រូវ​សប្បាយ​ទេ ត្រូវ​មើល​ថា កម្ពុជា​ផលិត​អ្វី​បាន​ខ្លះ កម្ពុជា​មាន​អ្វីៗ​ជា​របស់ខ្លួន​ច្រើនណាស់​អាច​កែច្នៃ​បាន កុំ​គិតតែ​ទិញ​របស់​គេ ហើយ​គិតតែ​រឿង​សប្បាយៗ​នោះ​។

លោក​ថា​៖ «​ខ្មែរ​ត្រូវតែ​រៀបចំ​ខ្លួន​ធ្វើ​យ៉ាងណា​ឲ្យ​បានល្អ អ៊ីចឹង​កម្ពុជា​ត្រូវ​តែ​ចាប់ដៃ​ទាំងអស់ ដើម្បី​ប្រយោជន៍​ដល់​ប្រទេស​មួយ​នេះ រដ្ឋាភិបាល​ខំប្រឹង​ហើយ សូម​ឲ្យ​អភិបាលខេត្ត​នីមួយៗ ស្ថាប័នរដ្ឋ​មន្ត្រី​នីមួយៗ​ត្រូវ​តែ​សហការគ្នា​ចង​ជា​គ្រួសារ​របស់​កម្ពុជា​កុំ​ឲ្យ​ទៅ​ជា​ស្តេចត្រាញ់ បើ​ទៅជា​ស្តេចត្រាញ់ ខ្ញុំ​ជឿជាក់​ថា មិន​អាចជួយ​កម្ពុជា​បានទេ​»​។

លោក​ ដៀប សុផល អ្នក​ស្រាវជ្រាវ និង​ជា​សាស្ត្រាចារ្យ​ប្រវត្តិសាស្ត្រ​ក៏​បាន​ថ្លែង​នៅក្នុង​កិច្ចពិភាក្សា​តុមូល​នេះដែរ​ថា អ្វី​ដែល​កម្ពុជា​ត្រូវធ្វើ នៅពេល​នេះ​គឺ​កម្ពុជា​ចង់​ទាក់ទង​ទាំងអស់ សំខាន់​ទាក់ទង​ដៃគូ​សហប្រតិបត្តិការ​ណា​ដែលមាន​ផលប្រយោជន៍​អាច​ធ្វើឲ្យ​កម្ពុជា​មាន​ស្ថិរភាព សន្តិភាព បូរណភាព​ទឹកដី ដើម្បី​បម្រើ​ឲ្យ​ផលប្រយោជន៍​ប្រទេស​។

លោក គិន ភា ប្រធាន​វិទ្យាស្ថាន​ទំនាក់ទំនង​អន្តរជាតិ​នៃ​រាជបណ្ឌិត្យ​សភា​កម្ពុជា​បាន​លើកឡើង​ថា កម្ពុជា​ត្រូវមាន​ទំនាក់ទំនង​ល្អជា​បងប្អូន​ជាមួយ​ប្រទេស​ជិតខាង​ទំនាក់ទំនង​ជា​ដៃគូ​យុទ្ធសាស្ត្រ​ជាមួយ​មហាអំណាច​មធ្យម​ក្នុង​តំបន់ ទំនាក់ទំនង​ល្អជា​មួយ​បណ្តា​ប្រទេស​ក្រៅ​តំបន់ បន្ត​ទំនាក់ទំនង​យុទ្ធសាស្ត្រ​ជា​ប្រពៃណី​ជាមួយ​រុស្ស៊ី ថ្នម​ទំនាក់ទំនង​ជាមួយ​សហរដ្ឋអាមេរិក ពង្រឹង​បន្ថែម​នូវ​ទំនាក់ទំនង​ជា​ដៃគូ​សហប្រតិបត្តិការ​យុទ្ធសាស្ត្រ​គ្រប់​ជ្រុងជ្រោយ ជាមួយ​ចិន និង​រក្សា​តុល្យភាព​ទំនាក់ទំនង​ជាមួយ​អឺរ៉ុប​។

លោក គិន ភា បញ្ជាក់​ថា ពួក​មហាអំណាច​មួយចំនួន​ធ្វើ​អ្វីៗ ដើម្បី​ចំណេញ​នយោបាយ​ប៉ុណ្ណោះ​។ លោក​បញ្ជាក់​ថា​៖ «​យើង​ត្រូវ​ដឹងថា ពួក​មហាអំណាច​មួយចំនួន គេ​ធ្វើ​នយោបាយ​ដើម្បី​ផលចំណេញ​របស់​គេ​ទេ គឺ​គេ​មិនមែន​ធ្វើ​ដើម្បី​ប្រជាធិបតេយ្យ​ឲ្យ​យើង​ដើម្បី​សិទ្ធិមនុស្ស ដើម្បី​នីតិរដ្ឋ ដើម្បី​យុត្តិធម៌​អ្វី​នោះទេ ពោល​បើ​គ្មាន​ផលចំណេញ​ដល់​ពួកគេ ពាក្យ​ប្រជាធិបតេយ្យ សិទ្ធិមនុស្ស នីតិរដ្ឋ និង​យុត្តិធម៌​មិន​ត្រូវ​បាន​ប្រើ​ឡើយ​»​។

លោកប៉ា ចន្ទរឿន ប្រធាន​វិទ្យាស្ថាន​ប្រជាធិបតេយ្យ​កម្ពុជា​បាន​ថ្លែង​ពី​ម្សិលមិញ​ថា ជា​ការពិត​កម្ពុជា​ត្រូវ​តែ​មាន​ភាពវៃឆ្លាត មិន​ត្រូវ​ចាប់​តែ​មហាអំណាច​ណាមួយ​ហើយ​បោះបង់​មហាអំណាច​ណាមួយ​ទេ​។

លោក ចន្ទរឿន បន្ត​ថា​៖ «​បើសិន​ជា​យើង​អាច​រក្សា​ទំនាក់ទំនង ឬ​ក៏​មាន​គោលនយោបាយ​ការបរទេស​ដែល​ត្រូវដង​ត្រូវផ្លែ​​ជាមួយ​នឹង​មហាអំណាច​ទាំងអស់​ហ្នឹង យើង​រឹតតែ​មាន​ឱកាស​នៅក្នុង​ការពង្រឹង​នូវ​កិច្ចសហប្រតិបត្តិការ​ក៏ដូចជា​ពាណិជ្ជកម្ម​ជាមួយ​ប្រទេស​ទាំងអស់​នោះ​»​។

យ៉ាងណា​ក៏ដោយ​ប្រធាន​វិទ្យាស្ថាន​ប្រជាធិបតេយ្យ​កម្ពុជា​រូបនេះ​កត់សម្គាល់​ឃើញថា​នៅ​កម្ពុជា​មិនទាន់​មាន​គោលនយោបាយ​បែប​នេះ​ច្បាស់លាស់​នៅឡើយ ច្រើនតែ​ផ្អៀង​ ឬ​ក៏​លម្អៀង​តែ​ម្ខាងៗ នៅក្នុង​សម័យកាល​នីមួយៗ​។

លោក​ថា​៖ «​ការលម្អៀង​ធ្វើឲ្យ​បាត់​តុល្យភាព​នៃ​ជំហរ​របស់​យើង​ជា​ប្រទេស​ដែលមាន​គោលនយោបាយ​ការបរទេស​អព្យាក្រឹត មិន​ចូលបក្ស​សម្ព័ន្ធ ហើយ​នៅពេល​ដែល​យើង​លម្អៀង​ផ្នែក​គោលនយោបាយ​ការបរទេស​ហ្នឹង​អាច​ធ្វើឲ្យ​ប្រទេស​ធ្លាក់​ក្នុង​ស្ថានភាព​មហន្តរាយ ជាពិសេស​គឺ​ក្លាយ​ទៅ​ជា​ដែនដី​នៃ​ការប្រទាញ​ប្រទង់​រវាង​មហាអំណាច ដូច​ដែល​យើង​ឃើញ​តាំងពី​សម័យ​សង្គ្រាម ត្រជាក់ រហូត​ដល់​ពេល​បច្ចុប្បន្ន​នេះ​ដែល​កម្ពុជា​ក៏​ក្លាយ​ជា​ដែនដី​នៃ​សង្គ្រាមត្រជាក់​បែប​ថ្មី​គឺ​បញ្ហា​ការប្រកួតប្រជែង​ឥទ្ធិពល​ភូមិសាស្ត្រ​នយោបាយ​នៅក្នុង​តំបន់​អាស៊ីអាគ្នេយ៍​»៕

ហាមដាច់ខាតការយកអត្ថបទ ពីវេបសាយ www.mahakhmer.com ដោយគ្មានការអនុញាត។ សម្រាប់​ការ​ប្រើ​ប្រាស់ ឬ​ផ្សាយ​បន្ត សូមទាក់ទង​មក អ៊ីម៉េល info [at] mahakhme.com ឬទូរស័ព្ទលេខ​ 015 883 332។
អត្ថបទទាក់ទង