វ៉ាក់សាំងកូវីដជាក្តីសង្ឃឹមជួយវិស័យទេសចរណ៍កម្ពុជាងើបឡើងវិញ
អ្នកធ្វើការនៅក្នុងវិស័យទេសចរណ៍បានបង្ហាញក្តីសង្ឃឹមថា វិស័យ ដែលរងគ្រោះពីជំងឺកូវីដ១៩មួយនេះ នឹងងើបឡើងវិញនៅពេលណា ដែលកម្ពុជាមានវ៉ាក់សាំងប្រឆាំងកូវីដ១៩។
ប៉ុន្តែការងើបឡើងវិញនេះ ត្រូវការពេលយូរ។ នេះបើតាមសមាគមទេសចរណ៍កម្ពុជា ខណៈរដ្ឋាភិបាលកំពុងរៃអង្គាសថវិកាទិញវ៉ាក់សាំងប្រឆាំងកូវីដ១៩។
លោក ហូរ វណ្ឌី ជាទីប្រឹក្សាសមាគមទេសចរណ៍កម្ពុជាបានអះអាងប្រាប់វិទ្យុបារាំងអន្តរជាតិនាថ្ងៃទី០៩ ខែធ្នូថា ប្រសិនបើមានការការពារដោយវ៉ាក់សាំងកូវីដ១៩ នោះនឹងធ្វើឲ្យវិស័យទេសចរណ៍ នៅក្នុងប្រទេសកម្ពុជាងើបឡើងវិញ។ ប៉ុន្តែលោកបញ្ជាក់ថា ការងើបឡើងវិញនៃវិស័យនេះ មិនលឿនដូចពេលមិនទាន់មានកូវីដ១៩នោះទេ។
លោក ហូរ វណ្ឌី បានលើកឡើងថា ចាប់តាំងពីខែមីនា ឆ្នាំ២០២០ រហូតមកដល់ពេលបច្ចុប្បន្ននេះ ចំណូលរបស់អ្នកប្រកបរបរ នៅក្នុងវិស័យទេសចរណ៍ធ្លាក់ចុះ រហូតជាង៩០ភាគរយ ដែលមានអ្នកខ្លះបានបិទក្រុមហ៊ុន និងកន្លែងអាជីវកម្មនៅក្នុងវិស័យនេះទៀតផង។ លោកបន្តថា នៅពេលមានវ៉ាក់សាំងកូវីដ១៩ នឹងធ្វើឲ្យវិស័យនេះមានសង្ឃឹមម្តងបន្តិចៗឡើងវិញ។
លោក តុប សុភ័ក អ្នកនាំពាក្យក្រសួងទេសចរណ៍ ក៏បានអះអាងប្រាប់វិទ្យុបារាំងអន្តរជាតិថា ចាប់តាំងពីមានព្រឹត្តិការណ៍សហគមន៍២៨វិច្ឆិកា បានធ្វើឲ្យចលនាទេសចរណ៍ក្នុងស្រុកថមថយ ដូច្នេះបើមានវ៉ាក់សាំងប្រឆាំងកូវីដ១៩ នឹងធ្វើឲ្យវិស័យទេសចរណ៍ត្រឡប់មករកលក្ខណៈល្អប្រសើរឡើងវិញ ប៉ុន្តែមិនអាចល្អប្រសើរភ្លាមៗនោះទេ។
លោកបន្ថែមថាក្រសួងក៏បានរៀបចំផែនការរួចរាល់ហើយ សម្រាប់ត្រៀមទទួលទេសចរ សំដៅប្រែក្លាយជាទេសចរណ៍សុវត្ថិភាព និងមានជំនឿទុកចិត្តពីភ្ញៀវទេសចរ។
ក្តីសង្ឃឹមសម្រាប់អ្នកធ្វើការនៅក្នុងវិស័យទេសចរណ៍កើតឡើងបន្ទាប់ពី លោកនាយករដ្ឋមន្ត្រីហ៊ុន សែន កាលពីថ្ងៃទី០៨ ខែធ្នូ អះអាងថា លោកមានបំណងចាក់វ៉ាក់សាំង ជូនប្រជាជនឱ្យបាន១០លាននាក់ ដែលត្រូវការវ៉ាក់សាំង រហូត២០លានដូស និងតម្រូវការចំពោះមុខ នាដំណាក់កាលទី១នេះ មានចំនួន១លានដូស សម្រាប់ចាក់ជូនប្រជាពលរដ្ឋ ៥០ម៉ឺននាក់ ដែលកំពុងបំពេញការងារនៅកន្លែង មានហានិភ័យ និងកំពុងមានហានិភ័យ។
តាមរយៈសារសំឡេង ដែលវិទ្យុបារាំងអន្តរជាតិទទួលបាននាថ្ងៃទី០៩ ខែធ្នូនេះ លោកស្រីវេជ្ជបណ្ឌិត ឱ វណ្ណឌីន រដ្ឋលេខាធិការ និងជាអ្នកនាំពាក្យក្រសួងសុខាភិបាល បានលើកឡើងថា ទោះបីកម្ពុជាមានវ៉ាក់សាំងក៏ដោយ តែវាមិនមែនជាចម្លើយតែមួយគត់សម្រាប់ការការពារមិនឲ្យមានការចម្លងកូវីដ១៩នោះទេ។
លោកស្រីបញ្ជាក់ថា នេះគឺជាគ្រោះថ្នាក់ ប្រសិនបើគ្រប់គ្នាគិតថាមានវ៉ាក់សាំងហើយ លែងខ្វល់ពីកូវីដ១៩។ លោកស្រីសង្កត់ធ្ងន់ថា ការពាក់ម៉ាស ការលាងដៃ និងការរក្សាគម្លាតសុវត្ថិភាព នៅតែជាវិធានការសំខាន់បំផុត៕ ប្រភព៖ RFI
