អាជីវកម្មតាមអនឡាញមានការកើនឡើងនាពេលបច្ចុប្បន្ន
ខណៈដែលសហគ្រាសធុនតូចនិងមធ្យមជាច្រើនកំពុងតែជួបប្រទះការលំបាកដោយសារតែបញ្ហាប្រឈមខាងសេដ្ឋកិច្ចនាពេលបច្ចុប្បន្ន សហគ្រិនជាច្រើននៅក្នុងព្រះរាជាណាចក្រកំពុងតែសម្របខ្លួននិងទាញយកអត្ថប្រយោជន៍ពីការបើកអាជីវកម្មតាមប្រព័ន្ធអនឡាញ ការប្រើប្រាស់បណ្តាញសង្គម និងបច្ចេកវិទ្យាជាឧបករណ៍ក្នុងការធ្វើជំនួញ។
ជាមួយនឹងការកើនឡើងនៃចំនួនប្រជាជនដែលប្រើប្រាស់ទូរស័ព្ទស្មាតហ្វូនរួមទាំងការភ្ជាប់បណ្តាញអ៊ីនធ័រណេតនៅទូទាំងប្រទេសកម្ពុជា ប្រជាជនកាន់តែច្រើនឡើងកំពុងតែមានការវិវត្តទៅមុខ។
ទិន្នន័យពីការសិក្សាឌីជីថលឆ្នាំ ២០២០ Digital 2020 Cambodia នៅប្រទេសកម្ពុជាបង្ហាញថា ក្នុងចំណោម ប្រជាជន ១៦,៦ លាននាក់ដែលរស់នៅក្នុងប្រទេសកម្ពុជា ៥៨ ភាគរយគឺជាអ្នកប្រើប្រាស់អ៊ីនធឺណេត ហើយអ្នកប្រើប្រាស់អ៊ិនធឺណិតទាំងអស់សុទ្ធតែសកម្មនៅក្នុងប្រព័ន្ធផ្សព្វផ្សាយសង្គម។
ទិន្នន័យក៏បានបង្ហាញពីចំនួនអ្នកលក់តាមអ៊ិនធឺរណែតដែលមានចំនួនច្រើននៅក្នុងប្រទេសកម្ពុជា។ លើសពីនេះទៀត ជាមួយក្រុមហ៊ុនដឹកជញ្ចូនដែលមានសុវត្ថិភាពដូចជា DHL និង UPS អាជីវកម្មអាចឈោងទៅរកអ្នកប្រើប្រាស់ប្រព័ន្ធផ្សព្វផ្សាយសង្គម ៣,៨ ពាន់លាននាក់នៅទូទាំងពិភពលោក។
លោក Anthony Murray សហគ្រិនជំនួញមួយរូបតាមប្រព័ន្ធអេឡិចត្រូនិចដែលលក់គ្រឿងសំអាងនៅក្នុងប្រទេសកម្ពុជាបានពន្យល់ថា រូបលោកនិងភរិយាបានបង្កើតប្រាក់ចំណូលរបស់ពួកគេប្រមាណជា ៣៥០០ ដុល្លារក្នុងមួយខែតាមរយៈបណ្ដាញសង្គម Facebook និង Instagram ។
លោកថា៖ «យើងបានចាប់ផ្តើមអាជីវកម្មនេះកាលពី ២ ឆ្នាំមុនហើយ យើងមានអ្នកគាំទ្រ (followers) ប្រមាណ ២ ម៉ឺននាក់ក្នុងគណនីហ្វេសប៊ុកនិង Instagram របស់យើង។ យើងអាចកំណត់គោលដៅទស្សនិកជនរបស់យើងហើយជ្រើសរើសសម្រាប់ការឃើញការផ្សាយពាណិជ្ជកម្មរបស់យើងនៅផ្នែកផ្សេងៗក្នុងប្រទេស។ ជាធម្មតាយើងចំណាយប្រាក់ប្រមាណជា ២០០ ដុល្លារក្នុងមួយសប្តាហ៍សម្រាប់បណ្ដាញសង្គមទាំងនេះក្នុងការផ្សព្វផ្សាយពាណិជ្ជកម្ម ហើយជាធម្មតាការផ្សាយរបស់យើងគឺបានទៅដល់មនុស្ស ១០០ ០០០ នាក់»។
«ខ្ញុំគិតថាការប្រើប្រាស់បច្ចេកវិទ្យាគោលដៅផ្សព្វផ្សាយបានធ្វើឲ្យអាជីវកម្មរបស់យើងរីកចម្រើនលឿនជាងអ្វីដែលយើងធ្លាប់គិត»។
លោកបន្ថែមថា៖ «ទោះជាយ៉ាងណា ខ្ញុំគិតថាបើអ្នកមិនដឹងថាអ្នកកំពុងធ្វើអ្វីនៅពេលដាក់លុយចូលទីផ្សារតាមប្រព័ន្ធអ៊ីនធឺណេតតាមរយៈបណ្តាញសង្គមនោះទេ អ្នកនឹងខាតបង់ប្រាក់ជាច្រើន» ។
បច្ចេកវិទ្យាកំណត់គោលដៅអនុញ្ញាតឱ្យមានការជ្រើសរើសជាពិសេសអ្នកដែលមើលឃើញការផ្សាយពាណិជ្ជកម្មដែលសមស្រប។ វាប្រើវិធីសាស្ត្រផ្សេងៗគ្នាដូចជាការប្រមូលទិន្នន័យពីអ្វីដែលពួកគេបានបញ្ចូលនៅលើវេទិកាប្រព័ន្ធផ្សព្វផ្សាយសង្គមក៏ដូចជាគេហទំព័រដែលពួកគេចូលទៅកាន់នានា។ ពួកគេក៏ទទួលបានទិន្នន័យពីក្រុមហ៊ុនភាគីទីបីផងដែរ។
រដ្ឋាភិបាលកម្ពុជាកំពុងគាំទ្រដល់ប្រជាជនដែលចាប់ផ្តើមអាជីវកម្មបែបពាណិជ្ជកម្មតាមប្រព័ន្ធអេឡិចត្រូនិច។ ទោះយ៉ាងណាក៏ដោយ ខ្លួនក៏ធ្វើការណែនាំដល់ម្ចាស់អាជីវកម្មអំពីច្បាប់ពាណិជ្ជកម្មតាមអ៊ិនធឺរណែតដែលមានស្រាប់ខណៈដែលពួកគេគួរតែគោរពឲ្យបានតឹងរឹង។
លោក ប៉ែន សុវិជាតិ អនុរដ្ឋលេខាធិការក្រសួងពាណិជ្ជកម្មថ្លែងថា៖ «យើងរីករាយក្នុងការមើលឃើញសកម្មភាពអាជីវកម្មរីកចម្រើននានាដែលកំពុងកើនឡើងនៅក្នុងប្រទេសកម្ពុជាមិនថានៅក្នុងឬក្រៅប្រព័ន្ធអនឡាញនោះទេ។ ទោះជាយ៉ាងណាក៏ដោយ ដើម្បីផលប្រយោជន៍នៃការប្រកួតប្រជែងដោយយុត្តិធម៌និងការការពារអតិថិជ នអាជីវកម្មទាំងពីរប្រភេទត្រូវគោរពតាមបទប្បញ្ញត្តិនានា។ ទាក់ទងនឹងអាជីវកម្មតាមប្រព័ន្ធអនឡាញ យើងមានច្បាប់និងបទបញ្ជាពាណិជ្ជកម្មតាមប្រព័ន្ធអេឡិចត្រូនិចយ៉ាងតឹងរឹងដើម្បីគ្រប់គ្រងសកម្មភាពអាជីវកម្ម។ យើងលើកទឹកចិត្តដល់អាជីវកម្មតាមអ៊ិនធរណេត ប៉ុន្តែវាជាកាតព្វកិច្ចរបស់ម្ចាស់អាជីវកម្មក្រោមច្បាប់ក្នុងការចុះឈ្មោះជាមួយស្ថាប័នពាក់ព័ន្ធ ក្រសួងពាណិជ្ជកម្ម និងក្រសួងប្រៃសណីយ៍ និងទូរគមនាគមន៍»។
លោកបន្ថែមថា៖ «យើងអាចយល់បានថាក្នុងកំឡុងពេលដែលមានករណីឆ្លងរីករាលដាលនៃវីរុសកូវីដ១៩ ប្រជាពលរដ្ឋជួបប្រទះការលំបាកនិងព្យាយាមបង្កើតគំនិតថ្មីៗដើម្បីរកប្រាក់ចំណូល។ ប៉ុន្តែដូចដែលយើងបានលើកឡើងរួចមកហើយ សកម្មភាពអាជីវកម្មតាមប្រព័ន្ធអនឡាញត្រូវតែគោរពតាមច្បាប់នានា»។
កាលពីថ្ងៃទី ២៧ ខែសីហា អនុក្រឹត្យកំណត់ប្រភេទ បែបបទ និងនីតិវិធីនៃការផ្តល់លិខិតអនុញ្ញាត ឬអាជ្ញាបណ្ណដល់អន្តរការី និងបុគ្គលផ្តល់សេវាពាណិជ្ជកម្ម តាមប្រព័ន្ធអេឡិចត្រូនិក ត្រូវបានចុះហត្ថលេខាដោយលោកនាយករដ្ឋមន្ត្រី ហ៊ុន សែន។ លិខិតអនុញ្ញាតប្រកបអាជីវកម្មតាមប្រព័ន្ធអេឡិចត្រូនិក ត្រូវផ្តល់ឱ្យរូបវន្តបុគ្គលឬសហគ្រាសឯកបុគ្គលដែលនឹងប្រកបអាជីវកម្មតាមប្រព័ន្ធអេឡិចត្រូនិកក្នុងព្រះរាជាណាចក្រកម្ពុជា រួមទាំងរូបវន្តបុគ្គលឬសហគ្រាសឯកបុគ្គល ដែលប្រើប្រាស់បណ្តាញសង្គមឬប្រព័ន្ធអេឡិចត្រូនិកជាមធ្យោបាយក្នុងការផ្គត់ផ្គង់ឬទិញ-លក់ទំនិញ និង/ឬសេវា។
អាជ្ញាប័ណ្ណពាណិជ្ជកម្មអេឡិចត្រូនិចសម្រាប់ប្រជាជនកម្ពុជាមានសុពលភាពរយៈពេលពីរឆ្នាំហើយអាចបន្តជាថ្មីបាន។ សម្រាប់ក្រុមហ៊ុនបរទេស សហគ្រាសនិងបុគ្គល អាជ្ញាប័ណ្ណពាណិជ្ជកម្មអេឡិចត្រូនិកមានសុពលភាពរយៈពេល ៣ ឆ្នាំហើយអាចបន្តជាថ្មីបាន។
អាជីវកម្មតាមប្រព័ន្ធអេឡិចត្រូនិចដែលត្រូវបានលើកលែងពីអាជ្ញាប័ណ្ណនៅកម្ពុជារួមមានអាជីវកម្មខ្នាតតូចនៅលើប្រព័ន្ធផ្សព្វផ្សាយសង្គមដូចជាហ្វេសប៊ុកនិង Instagram ខណៈដែលពួកគេអាចលក់អ្វីគ្រប់យ៉ាងស្របច្បាប់តាមប្រព័ន្ធអនឡាញ។
កាលពីសប្តាហ៍មុនក្រសួងប្រៃសណីយ៍ និងទូរគមនាគមន៍ និងអគ្គនាយកដ្ឋានពន្ធដារបានឲ្យដឹងថាខ្លួននឹងចាប់ផ្ដើមសកម្មភាពក្នុងការប្រមូលពន្ធលើការផ្សាយពាណិជ្ជកម្មឌីជីថលដោយក្រុមហ៊ុនបច្ចេកវិទ្យាបរទេសដែលមិនបានចុះឈ្មោះនៅក្នុងប្រទេសកម្ពុជា៕ ប្រភព៖ Khmer Times
