បណ្ឌិតសភាចារ្យសុខ ទូច ស្នើដល់ប្រជាកសិករកុំឲ្យលក់ដីស្រែ ព្រោះចិននឹងទទួលទិញអង្ករពីកម្ពុជា២លានតោន
ភ្នំពេញ ៖ លោកបណ្ឌិតសភាចារ្យសុខ ទូច បានបង្ហាញឲ្យដឹងថា ចិននឹងបញ្ជាទិញអង្ករពីកម្ពុជាក្នុងទំហំ២លានតោនក្នុងពេលអនាគតខាងមុខនេះ។ ហេតុនេះលោកបណ្ឌិតធ្វើការអំពាវនាវដល់ប្រជាកសិករដែលមានផ្ទៃដីស្រែធំកុំឲ្យលក់ដីស្រែឲ្យសោះ ទុកធ្វើស្រូវ អង្ករ សំរាប់ការនាំចេញ តែបើមិនធ្វើស្រែខ្លួនឯងក៏អាចជួលដីស្រែទាំងនោះក៏អាចបានចំណូលផ្គត់ផ្គង់ជីវភាពគ្រួសារបានល្អប្រសើរដែរ។
ទន្ទឹមនឹងនោះរាជបណ្ឌិត្យសភាកម្ពុជានឹងសិក្សាចងក្រងជាឯកសារសម្រាប់ជាធាតុចូលជូនដល់រាជរដ្ឋាភិបាល អំពីការធ្វើប្រព័ន្ធទឹកដោយសិក្សាពីប្រទេសជិតខាងដែលជោគជ័យលើការគ្រប់គ្រងប្រព័ន្ធទឹកយ៉ាងដូចម្តេចដើម្បីជួយដល់ប្រជាកសិករក្នុងការធ្វើកសិកម្មឲ្យបានទិន្នផលខ្ពស់ព្រោះទឹកដើរតួនាទីសំខាន់ណាស់។” បើគ្មានទឹកកុំនិយាយពីកសិកម្ម គ្មានទឹកកុំនិយាយពីការរីកចំរើននៃវិស័យកសិឧស្សាហកម្ម”។
លោកបណ្ឌិតសភាចារ្យ សុខ ទូច ប្រធានរាជបណ្ឌិត្យសភាកម្ពុជាបានអំពាវនាវបែបនេះនៅក្នុងពិធីសម្ពោធដាក់ឲ្យប្រើប្រាស់សៀវភៅ” មាគ៌ាដ៏ត្រឹមត្រូវសំរាប់កម្ពុជា ដើម្បីរក្សាសន្តិភាពនិងឆ្ពោះទៅកាន់ការអភិវឌ្ឍ២០០៨–២០២០” ដែលចងក្រងស្រាវជ្រាវឡើងដោយក្រុមអ្នកស្រាវជ្រាវរាជបណ្ឌិត្យសភាកម្ពុជាចំនួន៨រូបនិងរូបលោកជាអ្នកដឹកនាំស្រាវជ្រាវ កាលពីថ្ងៃទី៦ខែវិច្ឆិកាឆ្នាំ២០២០នៅរាជបណ្ឌិត្យសភាកម្ពុជា។
សៀវភៅ” មាគ៌ាដ៏ត្រឹមត្រូវសំរាប់កម្ពុជា ដើម្បីរក្សាសន្តិភាពនិងឆ្ពោះទៅកាន់ការអភិវឌ្ឍ២០០៨-២០២០” មាន៥៩៦ទំព័រ និងមាន៣ជំពូកធំៗទី១និយាយអំពីនយោបាយក្នុងប្រទេស ទី២ កម្ពុជាក្នុងតួនាទីនយោបាយការបរទេស និងទី៣ការអភិវឌ្ឍន៍ប្រទេសកម្ពុជាប្រកបដោយចីរភាព។
សៀវភៅនេះក៏បានបង្ហាញអំពីដំណើរវិវត្តន៍នយោបាយសេដ្ឋកិច្ច សង្គមនៃព្រះរាជាណាចក្រកម្ពុជា ក្រោមការដឹកនាំរបស់រាជរដ្ឋាភិបាលកម្ពុជារយៈពេល២នីតិកាលនៃរដ្ឋសភាជាតិដោយអនុលោមទៅតាមរដ្ឋធម្មនុញ្ញនៃព្រះរាជាណាចក្រកម្ពុជានិងបានបង្ហាញផងដែរអំពីភាពចាស់ទុំនៃអ្នកនយោបាយ ដោយបានបញ្ចប់អត្ថិភាពដៃគូប្រកួតប្រជែងនយោបាយដែលមានចេតនាផ្តួលរំលំរាជរដ្ឋាភិបាល និងប្រព្រឹត្តិផ្ទុយទៅនឹងរដ្ឋធម្មនុញ្ញ នៃព្រះរាជាណាចក្រកម្ពុជា ហើយរក្សាបាននូវសុខសន្តិភាពនិងការអភិវឌ្ឍជូនជាតិមាតុភូមិ៕
